ᖃᐅᓱᐃᑦᑑᑉ ᑲᓇᑕᒥ ᒥᕐᖑᐃᓯᕐᕕᒃ ᒫᓐᓇ ᐃᖅᑲᓇᐃᔭᕐᑎᑭᑦᓴᖅᑐᖅ. ᑐᐊᕕᕐᓇᖅᑐᖃᑳᓪᓚᑉᐸᑦ ᐅᐸᑲᐅᖅᑐᕈᓐᓇᓪᖏᑦᑐᑦ ᐊᐃᔭᐅᔪᖃᑲᐅᕐᑐᕆᐊᖃᕐᐸᑦ. ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᑲᑐᔾᔨᖃᑎᒋᕙᑦᑕᖏᑦ ᖃᓄᖅᑑᖃᑎᖃᕐᑐᑦ ᐊᑦᑕᓇᕐᑐᒦᖁᔨᓇᑎᒃ ᐱᔨᑦᓯᕈᑕᐅᔪᓂᑦ, ᑭᓯᐊᓂᓕ ᐳᓛᕆᐊᕐᓂᐊᕐᑐᑦ ᐅᔾᔨᕐᑐᑦᓯᐊᕆᐊᓖᑦ ᐱᓕᒻᒪᑦᓯᒪᓂᖕᒥᓂᒃ, ᖃᐅᔨᒪᓂᖕᒥᓂᖕ ᐊᒻᒪ ᐃᒻᒥᓂᖕ ᐊᓐᓇᐅᒪᔪᓐᓇᕐᓗᑎᑦ ᐅᓗᕆᐊᓇᖅᑐᒦᖁᓇᒋᑦ ᐃᒻᒥᓂᖕᓗ ᐸᖅᑭᔪᓐᓇᑦᓯᐊᕐᓗᑎᑦ ᐅᖓᓯᑦᑐᒥ ᐅᑭᐅᖅᑕᖅᑐᒦᓐᓂᐊᕐᑎᓪᓗᒋᑦ ᐊᐅᓪᓚᓚᐅᖏᓂᕐᒥᓂ ᐅᐸᒐᓱᐊᕐᑕᒥᓄᑦ.

ᐊᓯᔾᔨᖅᓯᒪᔪᑦ ᓱᕐᕋᐃᑐᐃᓐᓇᕆᐊᓖᑦ ᐳᓛᕆᐊᕈᒪᓂᕐᓂᑦ

ᐅᖁᒪᐃᓐᓂᓂᐊᕐᑎᒃᑯᑦ ᓱᒃᑲᐃᑦᑐᒥᑦ ᖃᓱᑎᑦᓯᕙᓪᓕᐊᑎᑦᓯᓂᖏᑦ ᒪᓕᑦᑐᒋᑦ ᖃᓄᐃᓐᖏᑦᓯᐊᖁᓪᓗᒋᑦ ᓄᓇᕗᒥ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᒪᑐᐃᖅᓯᑲᓐᓂᖅᐳᑦ ᖃᐅᓱᐃᑦᑑᑉ ᑲᓇᑕᒥ ᒥᕐᖑᐃᓯᕐᕕᖓᓂᑦ ᐳᓚᕋᑎᓄᑦ ᔪᓚᐃ 1, 2022ᖑᑎᓪᓗᒍ.

ᓄᕙᕐᔪᐊᕐᓇᖅ ᑰᕕᑦ-19 ᐱᔾᔪᑎᒋᓪᓗᒍ, ᐱᔨᑦᓯᕈᑏᑦ ᐃᓪᓗᖁᑎᖏᓪᓗ ᖃᐅᓱᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᑕ ᑭᓪᓕᖃᕐᒪᑕ ᓱᓕ ᒫᓐᓇᒃᑯᑦ. ᓂᐅᕐᕈᔪᒪᔪᑦ ᓯᕗᕐᖓᑐᖄᒍᑦ ᐋᖅᑭᑦᓱᐃᒋᐊᓖᑦ ᑎᑭᓚᐅᖏᓂᖏᓂ ᐱᔨᑦᓯᕈᑏᑦ ᐊᑐᐃᓐᓇᐅᓂᐊᕋᓗᐊᕐᒪᖔᑕ. ᑐᓴᕋᑦᓴᑦ ᐊᓯᔾᔨᑲᑕᐃᓐᓇᕐᖓᑕ ᑐᓴᖅᑎᑦᓯᖃᑦᑕᓂᐊᕐᑐᒍᑦ ᑐᓴᕋᑦᓴᐃᑦ ᐊᓯᔾᔨᑐᐊᕋᐃᑉᐸᑕ.

  • ᖃᐅᓱᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᑕ ᐊᓪᓚᕝᕕᖓ ᐃᖃᓗᓐᓂ ᒪᑐᐃᖓᓕᖅᑐᑦ ᑭᒃᑯᑐᐃᓐᓇᕐᓄᑦ. ᑲᓇᑕᒥ ᒥᕐᖑᐃᓯᕐᕕᐅᑉ ᐃᖅᑲᓇᐃᔭᕐᑎᖏᓐᓂᑦ ᖃᐅᔨᒋᐊᕈᒪᒍᕕᑦ, ᐃᕐᖐᓈᖅᑕᐅᑎᒃᑯᑦ nunavut.info@pc.gc.ca ᐅᖄᓚᓗᑎᓪᓘᓐᓃᑦ 867-975-4673.
  • ᖃᐅᔨᒪᒋᐊᓕᓐᓂᑦ ᐃᓕᓐᓂᐊᕈᑏᑦ, ᐊᑎᓕᐅᕐᕖᓪᓗ, ᐱᔪᓐᓇᐅᑎᑖᕐᕖᓪᓗ ᐊᒻᒪ ᐊᑭᓕᕆᐊᓖᑦ ᓄᐊᑕᐅᖃᑦᑕᕐᑐᑦ ᐅᖓᓯᑦᑑᒦᑦᑐᓄᑦ. ᐳᓚᕋᑏᑦ ᖃᐅᔨᒃᑲᐃᖁᔭᐅᒻᒪᕆᑦᑐᑦ ᑲᓇᑕᐅᑉ ᒥᕐᖑᐃᓯᕐᕕᖓᑕ ᐃᖅᑲᓇᐃᔭᕐᑎᖏᓐᓂᑦ ᐱᓇᓱᐊᕈᓰᒃ ᒪᕐᕉᒃ ᓯᕗᕐᖓᒍᑦ ᑎᑭᕝᕕᑦᓴᐅᑎᖓᑕ ᐅᓪᓗᖓᓂᑦ ᐱᕕᖃᑦᓯᐊᖁᓪᓗᒋᑦ ᐃᓕᓐᓂᐊᖅᑕᐅᔭᕆᐊᖃᓪᓚᕆᑦᑎᑕᐅᔪᓂᑦ.
  • ᖃᐅᔨᒋᐊᕐᕕᒋᒃᑭᑦ ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᓚᐃᓴᓐᓯᓖᑦ ᐊᐅᓪᓚᕈᔾᔨᔪᓐᓇᖅᑐᑦ ᐊᒻᒪᓗ ᕿᒥᕐᕈᑎᒃᓯᔩᑦ ᓇᓐᒥᓂᖃᖅᑐᑦ ᐊᑎᖏᓐᓂᑦ.
  • ᐳᓚᕋᑏᑦ ᒪᓕᒋᐊᓖᑦ ᑕᒪᐃᓐᓂᑦᓯᐊᖅ ᐊᐅᓪᓚᖃᑦᑕᕐᑐᑦ ᒪᓕᒋᐊᓕᖏᓐᓂᑦ ᐊᒻᒪ ᑭᒃᑯᑐᐃᓐᓇᕐᓄᑦ ᐅᖁᒪᐃᓐᓂᓂᐊᕐᑏᑦ ᐊᑐᖅᑕᐅᖁᔭᖏᓐᓂᑦ ᐅᕙᓐᖓᑦ ᑲᓇᑕᐅᑉ ᒐᕙᒪᒃᑯᖏᑦ (ᐅᐃᕕᑎᑐᑦ ᑭᓯᐊᓂ) ᐊᒻᒪ ᓄᓇᕗᑦ ᒐᕙᒪᒃᑯᖏᑦ.

ᑐᐊᕕᕐᓇᕐᑐᓕᕆᔩᑦ ᐱᔨᑦᓯᕈᑎᖏᑦ ᐳᓚᕋᑏᓪᓗ ᐊᑦᑕᓇᖅᑐᒦᖁᓇᒋᑦ

ᖃᐅᓱᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᒍᑦ ᐃᖏᕐᕋᓂᐊᕈᕕᑦ, ᐊᐅᓪᓚᖃᑎᒋᓯᒪᔭᑎᑦ ᐃᖅᑲᐅᒪᔭᕆᐊᓖᑦ ᐊᑦᑕᓇᕐᑐᒃᑰᕈᓐᓇᕋᕕᑦ ᖃᖅᑲᓕᒃᑯᑦ ᒪᓃᑦᑐᒥ ᐅᑭᐅᖅᑕᖅᑐᒦᓐᓂᕐᓂ ᐃᖅᑲᓇᐃᔭᕐᑎᑭᑦᑐᒥ ᐃᒻᒪᖃᓗ ᖃᓄᐃᓕᔪᖃᑳᓪᓚᑉᐸᑦ ᐊᑯᓂᑲᓪᓚᒃ ᕿᓂᖅᑎᓂᑦ ᑎᑭᑦᑐᖃᕋᓱᒐᔭᕐᖓᑦ (ᐃᒻᒪᖃ ᐅᓪᓗᕋᓴᓂᑦ). ᐊᑦᑕᓇᕐᑐᓕᕆᔪᓐᓇᕐᑐᑦ, ᐋᓐᓂᖅᑐᓕᕆᔪᓐᓇᕐᑐᑦ ᐊᒻᒪ ᑐᐊᕕᕐᓇᕐᑐᓕᕆᔪᓐᓇᕐᑐᑑᒐᔭᕐᖓᑕ ᑭᓯᐊᓂ ᐊᐅᓪᓚᖃᑎᒋᓯᒪᔭᑎᑦ. ᐃᖏᕐᕋᖃᑎᑎᑦ ᖃᐅᔨᒪᒋᐊᓖᑦ ᐊᔪᖅᑕᒥᓂᖕ ᐊᒻᒪ ᐃᒻᒥᓂᖕ ᐊᓐᓇᐅᒪᔪᓐᓇᕐᓗᑎᑦ ᖃᓄᐃᓕᔪᖃᑳᓪᓚᑉᐸᑦ.

ᐊᑦᑕᓇᖅᑐᒦᑦᑕᐃᓕᓂᕐᒥᑦ ᖃᐅᔨᒃᑲᓐᓂᕈᒪᒍᑦᓯ, ᐅᕙᑦᑎᓐᓂᑦ ᖃᐅᔨᒃᑲᐃᒍᓐᓇᖅᑐᓯ.