ᑕᓪᓗᕈᑎᐅᑦ ᐃᒪᖓ ᑲᓇᖕᓇᒥᑦ ᐃᓯᕆᐊᕐᕕᐅᕗᖅ ᐊᖁᑎᖃᕋᓱᒃᑐᓄᑦ ᐅᑭᐅᕐᑕᕐᑐᒃᑯᑦ ᐅᒥᐊᕐᔪᐊᒃᑯᑦ ᐃᑳᕐᑐᓄᑦ, ᖃᐅᔨᒪᔭᐅᓪᓚᕆᒃᑐᖅ ᑲᓇᑕᐅᑦ ᐅᑭᐅᕐᑕᕐᑐᖓᒎᖓᔪᖅ. ᐊᕙᑎᖓ ᐱᓪᓚᕆᐅᔪᖅ ᐊᖑᓇᓱᒃᕕᐅᓪᓗᓂ ᐃᓕᖁᓯᖏᓐᓂᒃᓗ ᐊᑐᕐᕕᐅᓪᓗᓂ ᐃᓄᔾᔪᑕᐅᓯᒪᓪᓗᓂᓗ ᐃᓄᒃᓄᑦ ᓄᓇᒥᒃ ᑕᕆᐅᕐᒥᒃᓗ ᐊᒃᑐᐊᓂᖃᑦᑎᐊᕋᒥᒃ. ᐃᓂᒋᔭᐅᓪᓗᓂᓗ ᐊᔾᔨᒋᖏᑦᑐᓄᑦ ᑕᕆᐅᕐᒥᐅᑕᓄᑦ, ᐅᓄᕐᑐᓪᓗ ᓂᕿᒋᔭᐅᓪᓗᑎᒃ ᐃᓄᒃᓄᑦ ᐃᓄᓯᖏᓐᓄᓪᓗ ᐊᑐᕐᑕᐅᓪᓗᑎᒃ.

ᑕᓪᓗᕈᑎᐅᑦ ᐃᒪᖓ ᐆᒪᔪᖃᕐᓂᐅᓪᓚᕆᒃᑐᖅ ᐱᓪᓚᕆᐅᓪᓗᓂᓗ, ᐱᖃᓯᐅᑎᓪᓗᒋᑦ ᓇᑦᑏᑦ, ᕿᓚᓗᒐᐃᑦ, ᑑᒑᓖᑦ, ᖃᐅᓪᓗᕐᑕᐃᓪᓗ ᐊᒻᒪᓗ ᐊᕐᕖᑦ, ᐊᒻᒪᓗ ᐊᐃᕖᑦ ᓇᓄᐃᓪᓗ, ᓯᒃᔭᖏᓪᓗ ᑎᖕᒥᐊᓄᑦ ᑎᑭᑦᑕᕐᑐᓄᑦ ᐃᓂᒋᔭᐅᓪᓗᑎᒃ ᐅᑭᐅᕐᑕᕐᑐᒥ ᐅᓄᕐᓂᖏᑦ ᑕᐅᓴᖏᓐᓃᑦᑐᑦ.

ᑲᖏᕐᖢᖏᓪᓗ ᐊᒃᑐᐊᔪᑦ ᑕᓪᓗᕈᑎᐅᑦ ᐃᒪᖓᓂ ᑕᕆᐅᖏᓐᓂᓗ ᐊᓯᖏᓐᓄᑦ ᐊᒃᑐᐊᔪᑦ, ᓯᕐᒥᖏᓪᓗ ᓯᒃᔭᒧᑦ ᑎᑭᐅᒪᓪᓗᑎᒃ ᐅᐊᖕᓇᖓᓂ ᑲᓇᖕᓇᖓᓂ. ᑕᕆᐅᖓ ᐃᒪᖓ ᐃᓚᖓ ᓯᑯᖃᖃᑦᑕᖏᑦᑐᖅ, ᐃᓂᒋᔭᐅᓪᒪᕆᒃᖢᓂᓗ ᑎᖕᒥᐊᓄᑦ ᐳᐃᔨᓄᓪᓗ, ᓂᕆᓇᓱᒃᕕᐅᓪᓗᓂᓗ ᓯᑯᓯᒪᓕᕌᖓᑦ ᓯᑯᖓᖏᓐᓂᖓᓂ.

ᐃᓄᑐᐃᓐᓇᐃᑦ ᐅᐸᒃᓯᒪᖃᑦᑕᕐᓯᒪᔪᑦ ᑕᓪᓗᕈᑎᐅᑦ ᐃᒪᖓᓄᑦ ᑕᐅᓴᐃᑦ ᐊᕋᒍ ᐃᓗᐊᓂ ᑐᓃᑦ, ᐊᒻᒪᓗ ᑐᓂᔾᔪᐊᑦ ᐃᓄᐃᑦ ᓯᕗᓕᖏᑦ, ᒫᓐᓇᓗ ᐃᓄᐃᑦ ᓄᓇᖃᓕᕐᖢᑎᒃ. ᑕᕆᐅᒃ ᐊᑭᐊᓂᖔᕐᑐᑦ ᕿᓂᕐᑎᓪᓗᒋᑦ ᐊᖁᑎᒃᓴᒥᒃ ᐃᑳᖓᔪᒥᒃ ᑕᕆᐅᒃᑯᑦ ᐅᐸᒃᑕᕐᑕᐅᖃᑦᑕᓚᐅᕐᑐᖅ, ᐱᖃᓯᐅᑎᓪᓗᒍ ᐊᓯᐅᓂᑯ ᕗᓚᒃᓕᓐ. ᓯᒃᔭᖏᓐᓂ ᑕᑯᔭᒃᓴᐅᔪᑦ ᐊᕐᕕᒃᓂᐊᕐᑎᕕᓃᑦ ᐊᒻᒪᓗ ᓂᐅᕕᕐᕕᖃᕐᕕᕕᓃᑦ.

ᓯᓚ ᐊᓯᓪᓕᕐᐸᓪᓕᐊᑎᓪᓗᒍ ᐊᒻᒪᓗ ᑕᕆᐅᒃᑯᓪᓗ ᐊᖁᑎᒋᔭᐅᕙᓪᓕᐊᑎᓪᓗᒍ ᐅᒥᐊᕐᔪᐊᑦ ᐅᓄᕐᓯᕙᓪᓕᐊᓪᓗᑎᒃ, ᐱᓪᓚᕆᐅᒃᒪᑦ ᓴᐳᔾᔭᐅᓯᒪᓗᓂ ᐊᔾᔨᐅᖏᑦᑑᔪᖅ ᐅᑭᐅᕐᑕᕐᑐᒥ ᑲᓇᑕᒥ ᑕᕆᐅᖓᓂᒃ ᓴᐳᔾᔭᐅᓯᒪᓗᓂ.

ᖃᓄᐃᓕᖓᓚᐅᕐᓯᒪᓂᕕᓂᐊ ᑕᓪᓗᕈᑎᐅᑦ ᐃᒪᖓ ᓴᐳᔾᔭᐅᓯᒪᓇᓱᒃᓂᒃᑯᑦ ᑭᒃᓕᖓ

ᐃᓱᒪᒋᔭᐅᓚᐅᕐᓯᒪᔪᖅ ᓴᐳᔾᔭᐅᓯᒪᓗᓂ ᓄᓇᕐᔪᐊᕐᒥ, ᑲᓇᑕᒥ ᓄᓇᖃᕐᑐᓄᓪᓗ ᑕᓪᓗᕈᑎᐅᑦ ᐃᒪᖓ ᐱᓕᕆᐊᖑᐃᓐᓇᕐᓯᒪᔪᖅ ᑕᐃᒪᖓᑦ 1970. ᐊᕋᒍᖓᓂ 2009, ᐱᓕᕆᐊᖑᓕᓚᐅᕐᑐᖅ ᒐᕙᒪᑐᖃᒃᑯᑦ − ᓄᓇᕗᑦ ᒐᕙᒪᖏᑦ − ᐃᓄᐃᓪᓗ ᐊᖏᖃᑎᒋᓚᐅᕐᑐᑦ ᑲᑐᔾᔨᓗᑎᒃ ᐱᓕᕆᖃᑎᒌᒍᒪᓪᓗᑎᒃ ᖃᐅᔨᓇᓱᒃᓗᑎᒃ ᐱᔪᒪᔭᐅᒐᔭᕐᒪᖔᑦ ᐱᔭᒃᓴᐅᒐᔭᕐᒪᖓᓪᓗ ᑲᓇᑕᒥ ᑕᕆᐅᖓᓂ ᓴᐳᔾᔭᐅᓯᒪᔪᖅ ᑕᓪᓗᕈᑎᐅᑦ ᐃᒪᖓ. ᑕᓐᓇ ᐱᓕᕆᐊᖑᔪᖅ ᐊᔭᐅᕐᑎᐅᔪᓂᒃ ᑲᑎᒪᔨᕋᓛᓂᒃ ᑐᑭᒧᐊᒃᑎᑕᐅᓚᐅᕐᑐᖅ ᐅᑯᐊᖑᓪᓗᑎᒃ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᒐᕙᒪᒃᑯᑦ ᓄᓇᕗᑦ, ᐊᒻᒪᓗ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᑦ.

ᐊᕋᒍᒐᓴᒃᓄᑦ ᖃᐅᔨᓴᑲᑕᓕᓚᐅᕐᑐᑦ ᑐᓴᕋᓱᒃᐸᒃᖢᑎᒃᓗ ᐊᕙᑎᓕᕆᓂᕐᒥᒃᓗ, ᐳᓚᕋᑦᑐᓕᕆᓂᕐᒥᒃᓗ, ᐃᖃᓗᒐᓱᒃᓂᕐᒥᒃᓗ, ᐅᒥᐊᕐᔪᐊᓕᕆᓂᕐᒥᒃᓗ, ᐊᒻᒪᓗ ᐅᕐᓱᐊᓗᒃᓯᐅᕈᒪᓯᒪᔪᑦ. ᐊᑐᕐᑕᐅᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᑭᒃᓕᓯᓂᐊᕐᓂᕐᒧᑦ ᖃᐅᔨᒪᔨᐅᔪᑦ ᑐᑭᓯᕙᐅᕚᓪᓕᓚᐅᕐᑐᖅ ᐊᑐᕐᑕᐅᓂᖓᓂᒃ ᐊᒻᒪᓗ ᐃᒃᐱᒋᔭᐅᓂᖓᓂᒃ. ᖃᐅᔨᒋᐊᕐᕕᐅᓐᓗᑎᒃ ᑲᑎᒪᑎᑦᑎᑲᑕᒃᓂᒃᑯᑦ ᑕᓪᓕᒪᐃᑦ ᓄᓇᓕᐅᔪᑦᐊᒃ ᖃᓂᒋᔮᓂ ᓄᓇᖃᕐᑐᑦ ᑕᕆᐅᖓᓂ ᐃᒪᖓᓂ ᓴᐳᔾᔭᐅᓯᒪᔭᐅᔪᒪᔫᑦ ᐊᒻᒪᓗ ᑐᓴᕐᑕᐅᔪᑦ ᓄᓇᓕᒐᓚᒃᓄᑦ ᑐᖓᕕᐅᔪᓂᑦ ᐊᒻᒪᓗ ᑲᓇᑕᒥ ᑎᒍᒥᐊᕐᑎᐅᔪᓂᑦ ᐱᖃᓯᐅᑎᓪᓗᒋᑦ ᑮᓇᐅᔭᒃᓴᕐᕕᓕᑦ ᒐᕙᒪᐅᖏᑦᑐᓪᓗ.

ᒐᕙᒪᒃᑯᑦ ᑲᓇᑕᒥ ᐊᒻᒪᓗ ᓄᓇᕗ ᒐᕙᒪᖏᑦ ᐊᒻᒪᓗ ᕿᑭᕐᑕᓂ ᐃᓄᐃᑦ ᑲᑐᔾᔨᖃᑎᒋᖏᑦ ᐋᕿᒃᓯᓚᐅᕐᑐᑦ ᑭᒃᓕᒋᓂᐊᕐᑕᖓᓂᒃ ᐊᖏᖃᑎᒋᒃᖢᑎᒃ ᑕᓪᓗᕈᑎᐅᑦ ᐃᒪᖓᓂ ᖃᐅᔨᒋᐊᕐᕕᐅᓚᐅᕐᑎᓪᓗᒋᑦ ᑲᑎᒪᑎᑦᑎᑲᑕᒃᖢᑎᒃᓗ, ᖃᐅᔨᓴᕐᖢᑎᒃᓗ, ᐊᒻᒪᓗ ᐊᔭᐅᕐᑎᐅᔪᑦ ᑲᑎᒪᔨᕋᓛᖏᑕ ᐱᓕᕆᐊᕆᔭᖏᓐᓂᑦ ᐊᑐᓕᖁᔭᐅᔪᓂᒃᓗ.

ᑲᓇᑕᒥ ᑕᕆᐅᖓᓂ ᐱᑕᖃᐃᓐᓇᕐᑎᑦᑎᓂᕐᒧᑦ ᐃᒪᖓ

ᑲᓇᑕᒥ ᑕᕆᐅᖓᓂᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᐃᒪᖓᓃᑦᑐᓂᒃ ᓴᐳᔾᔭᐅᓯᒪᓪᓗᑎᒃ ᐊᕙᑎᖓᓃᑦᑐᑦ ᐱᑕᖃᐃᓐᓇᕐᑎᑕᐅᓇᓱᒃᓗᑎᒃ, ᐊᒻᒪᓗ ᓴᕿᑕᐅᓯᒪᔪᑦ ᒪᓕᒃᓗᒍ ᑲᓇᑕᒥ ᑕᕆᐅᖓᓂᒃ ᐱᑕᖃᐃᓐᓇᕐᑎᑦᑎᓂᕐᒧᑦ ᐱᖁᔭᐃᑦ. ᐱᖃᓯᐅᑎᓪᓗᒍ ᐃᖃᖓ, ᐃᒪᐅᓂᖓ ᐱᖃᓯᐅᑎᔪᓐᓇᕆᓪᓗᓂ ᐃᒪᕐᓲᓂᖓ, ᑲᖏᕐᖢᐃᑦ ᑰᖏᓪᓗ ᓯᒃᔭᖓᓗ, ᕿᑭᕐᑕᖏᓪᓗ.

ᑲᓇᑕᒥ ᑕᕆᐅᖓᓂ ᓴᐳᔾᔨᓯᒪᓂᕐᒧᑦ ᐱᔾᔪᑎᖃᖃᑦᑕᕐᑐᑦ ᐊᕙᑎᖓᓃᑦᑐᑦ ᐱᑕᖃᐃᓐᓇᕐᑎᑕᐅᓇᓱᒃᓗᑎᒃ, ᑐᑭᖃᕐᖢᓂ ᐊᐅᓚᓂᐅᔪᑦ ᐱᑕᖃᐃᓐᓇᕐᑎᑦᑎᓂᕐᒧᑦ ᑲᔪᓯᑎᑕᐅᓗᑎᒃ ᐃᓄᑐᐃᓐᓇᐃᑦ ᐊᐅᓚᓂᖏᑦ ᓲᕐᓗ ᐃᖃᓗᒐᓱᒃᓂᒃᑯᑦ, ᐅᒥᐊᕐᔪᐊᓕᕆᓂᒃᑯᑦ, ᐊᒻᒪᓗ ᐱᖑᐊᑲᑕᒃᓂᒃᑯᑦ. ᐊᒃᑕᕐᕕᐅᓂᖓ, ᐅᔭᕋᒃᑕᕐᕕᐅᓂᖓ, ᐊᒻᒪᓗ ᐅᕐᓱᐊᓱᒃᓯᐅᕐᕕᐅᓂᖓ ᐱᔭᐅᓂᖏᓪᓗ ᐊᔪᓕᕐᑎᑕᐅᓯᒪᓗᑎᒃ ᐃᓗᐊᓂ ᓴᐳᔾᔭᐅᓯᒪᔫᑦ.

ᑕᐃᒪᐃᑎᓪᓗᒍ ᐃᑲᔪᕐᑎᒌᒌᐊᖃᕐᑐᑦ ᓄᓇᒥᒃ ᐊᑐᕐᑎᐅᔪᑦ, ᐃᒥᕐᒥᒃᓗ ᐊᒻᒪᓗ ᐆᒪᔪᓕᕆᖃᑦᑕᕐᑐᑦ ᐊᖏᖃᑎᒌᒃᓗᑎᒃ ᑐᕋᒐᖃᕐᓗᑎᒃ− ᐱᓗᐊᕐᑐᒥᒃ ᖃᓄᐃᖏᑦᑎᐊᕐᑐᒥᒃ, ᐱᑕᖃᐃᓐᓴᕈᓐᓇᕐᑐᒥᒃ ᐊᕙᑎᖃᑦᑎᐊᖁᓪᓗᒍ.