ᐃᓗᓕᕆᔭᖏᑦ

Three photographs arranged left to right, below the photographs is a green banner. Image 1: Two small wooden houses on a shoreline. Image 2: Three rock cairns, or inuksuit. Image 3: Two caribou on the tundra. The banner reads: Ukkusiksalik National Park of Canada Management Plan 2018.A man sitting on a boulder on a rocky shoreline. A boat is moored behind him. The sun is low on the horizon. 

© ᐊᔾᔨᓕᐊᖑᔪᓐᓇᙱᑦᑐᖅ ᓇᖕᒥᓂᖁᑎᒋᔭᐅᖕᒪᑦ ᐊᖓᔪᖅᑳᕐᔪᐊᑉᑎᓐᓄᑦ ᑯᐃᓐᒧᑦ ᑭᒡᒐᖅᑐᐃᑉᓗᓂ ᑲᓇᑕᒥ, ᑭᒡᒐᖅᑐᖅᑕᐅᑉᓗᓂ ᑐᑭᒧᐊᒃᑎᑦᑎᔨᒧᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᖏᓐᓄᑦ, 2018.

Cette publication est aussi disponible en français.
This publication is also available in English.

ᑐᓂᕐᕈᑕᐅᓯᒪᖕᒥᔪᖅ ᐅᐃᕖᑎᑐᑦ ᐃᒪᓐᓇ ᑕᐃᒎᓯᖃᖅᖢᓂ:
Parc national du Canada Ukkusiksalik, plan directeur, 2018

ᑲᑉᓗᓈᑎᑐᑦᑕᐅᖅ ᐊᑐᐃᓐᐅᖕᒥᔪᖅ:
Ukkusiksalik National Park of Canada Management Plan, 2018.

  • PDF: R64-496/2018E-PDF 978-0-660-08911-9
  • Paper: R64-496/2018 978-0-660-08914-0

ᑐᑭᓯᒋᐊᒃᑲᓐᓂᕈᒪᒍᑉᓯ ᐊᐅᓚᑦᑎᓂᕐᒧᑦ ᐸᕐᓇᐅᑎᐅᑉ ᒥᒃᓵᓄᑦ ᐅᕝᕙᓘᓐᓃᑦ ᐱᔾᔪᑎᒋᑉᓗᒍ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ ᐅᓇ ᖃᐅᔨᒋᐊᕐᕕᐅᔪᓐᓇᖅᑐᖅ:

ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᑲᓇᑕᒥ
ᑎᑎᖃᐅᓯᒡᕕᖓᑕ ᓈᓴᐅᑎᖓ 220
ᓇᐅᔮᑦ, ᓄᓇᕗᑦ
ᑲᓇᑕᒥ
X0C 0H0

ᐅᖃᓘᑖ:
867-462-4500


ᖄᖓᒍᑦ ᐊᔾᔨᓕᐊᖑᓯᒪᔪᖅ ᓇᑭᙶᕐᒪᖔᑦ

ᖁᓛᓂ ᓴᐅᒥᖅᖠᕐᒥ ᑕᓕᖅᐱᕐᒧᑦ: Parks Canada Agency

ᐊᑖᓂ: Parks Canada Agency

ᒥᓂᔅᑕᐅᑉ ᐅᖃᐅᓯᒃᓴᖓ

ᑳᑐᕆᑦ ᒥᑭᓇ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ ᐊᒻᒪᓗ ᓯᓚᐅᑉ ᐅᖂᓯᕙᓪᓕᐊᓂᖓᑕ ᐊᓯᔾᔨᖕᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᒥᕐᖑᐃᖅᓯᕐᕕᓕᕆᔨᒃᑯᓐᓂᒃ ᑲᓇᑕᒥ

ᑲᓇᑕᐅᑉ ᒥᕐᖑᐃᓯᕐᕕᖏᑦ, ᑲᓇᑕᐅᑉ ᐃᑦᑕᖕᓂᑕᖃᕐᕕᖏᑦ ᐊᒻᒪᓗ ᑲᓇᑕᐅᑉ ᑕᕆᐅᖕᒥ ᓴᐳᓐᓂᐊᖅᑕᖏᑦ ᐱᒋᔭᐅᔪᑦ ᑕᒪᐃᓐᓄᑦ ᑲᓇᑕᒥᐅᓄᑦ ᐊᑐᖅᓯᑦᓯᓪᓗᑎᒃ ᑲᓇᑕᒥᐅᑦ ᐊᑐᖃᑦᑕᓪᓚᕆᒃᑕᖏᓐᓂᒃ.

ᐅᑯᐊ ᓄᓇᑦᑎᐊᕙᐃᑦ ᐱᐅᓂᖅᐹᑦ ᐊᒻᒪᓗ ᐱᓕᕆᔾᔪᑎᖃᖅᑐᑦ ᓴᐳᒻᒥᓪᓗᒋᑦ ᓄᓇᐃᑦ ᐊᒻᒪᓗ ᐱᐅᓯᑐᖃᐃᑦ ᐃᓅᓯᑐᖃᖃᕐᕖᑦ ᓄᓇᐃᑦ ᓄᓇᕐᔪᐊᒥ.

ᒐᕙᒪᒃᑯᑦ ᐊᔪᐃᓐᓈᕆᔭᖃᖅᑐᑦ ᒪᑭᒪᐃᓐᓇᖅᑎᑦᑎᓛᕐᓂᕐᒥᓂᒃ ᑲᓇᑕᐅᑉ ᒥᕐᖑᐃᓯᕐᕕᖏᓐᓂᒃ. ᐊᖏᓕᒋᐊᖅᑎᑦᑎᓂᖕᒥᒃ ᓴᐳᓐᓂᐊᖅᑕᐅᔪᓂᒃ ᓄᓇᓄᑦ ᐊᒻᒪᓗ ᐃᑲᔪᕐᓂᖕᒥᒃ ᐅᓄᖅᓯᑎᑲᓐᓂᖕᓂᖏᓐᓄᑦ ᐆᒪᔪᑦ ᐃᓄᐃᓴᒡᓕᓗᐊᓕᖅᑐᑦ. ᐊᑕᐅᑦᑎᒃᑯᑦᑕᐅᖅ, ᓄᑖᓂᒃ ᐱᓕᕆᐊᒃᓴᓂᒃ ᐃᓴᒪᑖᕆᔭᐅᔪᓂᒃ ᓴᓇᕙᓪᓕᐊᖏᓐᓇᕆᐊᖃᖅᑐᒍᑦ ᐱᔨᑦᑎᕈᓯᑖᕆᐊᖃᖅᖢᑎᓗ ᑲᓇᑕᒥᐅᑦ ᐊᑐᕈᓐᓇᓛᖕᒪᑕ ᐃᓕᑦᑐᓐᓇᓛᕐᒪᑕᓗ ᐊᕙᑎᑦᑎᓐᓂ ᐊᒻᒪᓗ ᐃᒻᒪᑲᓪᓚᓂᑕᖕᓂᒃ ᖃᓄᐃᓕᖓᓂᕕᓂᖓᓐᓂᒃ.

ᑖᓐᓇ ᓄᑖᖅ ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ ᓯᕐᒥᓕᖕᒧᑦ ᒥᕐᖑᐃᓯᕐᕕᖕᒧᑦ ᐃᑲᔪᖅᑐᖅ ᑕᒪᑐᒥᖓᑕᐅᖅ ᑐᖔᓂ.

ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ ᓴᓇᔭᐅᕙᒃᑐᑦ ᓯᕕᑐᔪᒥᒃ ᖃᐅᔨᒋᐊᕐᕕᒋᔭᖃᖅᓯᒪᓂᒃᑯᑦ ᑐᓴᖅᑎᑕᐅᖃᑦᑕᖅᓯᒪᓂᒃᑯᓪᓗ ᐊᔾᔨᒌᖏᑦᑐᓂᒃ ᐃᓄᖕᓂᒃ ᑎᒥᐅᔪᓄᓪᓗ, ᐃᓚᒋᔭᐅᓗᑎᒃ ᓄᓇᖃᖄᖅᓯᒪᔪᑦ, ᓄᓇᓕᖕᓂ ᐊᕕᒃᑐᖅᓯᒪᔪᓂᒡᓗ ᓄᓇᖃᖅᑐᑦ, ᐳᓚᕋᖅᑏᑦ ᐊᒻᒪᓗ ᐱᓕᕆᑦᑎᐊᖅᑐᑦ ᐱᓇᓱᐊᖃᑎᒌᑦ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᑲᓇᑕᒥ.

ᑲᓇᑕᐅᑉ ᒥᕐᖑᐃᖅᓯᕐᕕᖏᑦ, ᑲᓇᑕᐅᑉ ᐃᑦᑕᖕᓂᑕᖃᕐᕕᖏᑦ ᐊᒻᒪᓗ ᑲᓇᑕᐅᑉ ᑕᕆᐅᕐᒥ ᓴᐳᓐᓂᐊᖅᑕᖏᑦ ᓯᕗᓪᓕᖅᐸᐅᑎᓯᒪᓂᐊᖅᑕᖏᑦ ᑲᓇᑕᐅᑉ ᒐᕙᒪᒃᑯᖏᑦᑕ. ᖁᔭᓐᓇᒦᕈᒪᔭᒃᑲ ᐃᑲᔪᖃᑦᑕᖅᓯᒪᔪᓗᒃᑖᑦ ᑖᑉᓱᒧᖓ ᐸᖕᓇᐅᑎᒧᑦ ᐊᔪᐃᓐᓈᕆᔭᖃᐃᓐᓇᓚᐅᕐᓂᖕᓐᓄᑦ ᐃᑲᔪᖃᑎᒌᑦᑎᐊᓚᐅᕐᓂᖏᓐᓄᓪᓗ.

ᒥᓂᔅᑕᐅᓪᓗᖓ ᑲᒪᒋᔭᖃᖅᖢᖓ ᒥᕐᖑᐃᖅᓯᕐᕕᓕᕆᔨᒃᑯᓐᓂᒃ ᑲᓇᑕᒥ, ᖁᕕᐊᓲᑎᒋᕙᕋ ᑕᒪᓐᓇ ᐱᓕᕆᖃᑎᒌᑦᑎᐊᕐᓂᖅ ᖁᕕᐊᓱᒃᖢᖓᓗ ᐊᖏᕋᒃᑯ ᓯᕐᒥᓕᒃ ᒥᕐᖑᐃᖅᓯᕐᕕᖓᓂᒃ ᑲᓇᑕᒥ ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐸᕐᓇᐅᑎ.

ᓯᕗᓪᓕᖅᐹᖅ ᐆᒪ ᐊᑎᓕᐅᖅᑕᖓ

ᑳᑐᕆᑦ ᒥᑭᓇ
ᒥᓂᔅᑕ ᐊᕙᑎᓕᕆᔨᒃᑯᓐᓄᑦ ᐊᒻᒪᓗ ᓯᓚᐅᑉ ᐅᖂᓯᕙᓪᓕᐊᓂᖓᑕ ᐊᓯᔾᔨᖕᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᒥᕐᖑᐃᖅᓯᕐᕕᓕᕆᔨᒃᑯᓐᓂᒃ ᑲᓇᑕᒥ

ᐊᑐᓕᖁᔭᐅᔪᑦ

ᐱᖁᔭᖓ ᐊᒻᒪᓗ ᓯᕗᓪᓕᖅᐹᖅ ᐊᑎᓕᐅᖅᑕᖓ ᐆᒪ:

ᒪᐃᑯ ᓈᑦᓗ
ᐊᖏᔪᖃᕐᒪᕆᐅᑲᐃᓐᓇᖅᑐᖅ

ᑐᕆᐊᕗᕐ ᓱᕗᐊᑦᕕᒍᕐ
ᐊᖏᔪᖅᑳᒻᒪᕆᐅᑉ ᑐᖏᓕᐊ, ᐊᐅᓚᑦᑎᓂᕐᒧᑦ

ᔨᐊᓇ ᐴᓐ
ᐃᓱᒪᑕᖅ, ᓄᓇᕗᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ

ᔮᑭ ᓇᑯᓛᖅ
ᐃᒃᓯᕙᐅᑕᖅ, ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒥ ᐊᐅᓚᑦᑎᔨᑦ ᑲᑎᒪᔨᕋᓛᖏᑦ


ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ

ᒪᐃ 31, 2018

ᒥᓂᔅᑖᒧᑦ,

ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ (ᐆᒪᔪᓕᕆᔨᕐᔪᐊᑦ ᐅᕝᕙᓘᓐᓃᑦ ᑲᑎᒪᔩᑦ) ᖁᕕᐊᑉᐳᑦ ᑐᓂᓯᓂᕐᒥᒃ ᐃᓕᓐᓄᑦ ᐊᖏᕈᑎᒥᓂᒃ ᐅᑯᓂᖓ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᐊᐅᓚᑕᐅᓂᖓᓄᑦ ᐸᕐᓇᒍᑦ, ᐊᖏᕐᑕᐅᒪᓕᕐᑐᖅ ᐆᒪᔪᓕᕆᔨᕐᔪᐊᓄᑦ ᒪᓕᑦᑐᒍ ᐃᓚᖓ 5.2.34(c) ᐅᑯᐊ ᓄᓇᕗᑦᒥ ᐊᖏᖃᑎᒌᒍᑏᑦ.

ᐆᒪᔪᓕᕆᔨᕐᔪᐊᑦ ᖁᕕᐊᓱᒍᔾᔨᕗᑦ ᐅᑯᓂᖓ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᑦ ᐊᒻᒪᓗ ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᐋᕿᓱᕐᑕᐅᓂᖓᓄᑦ ᐱᐅᔪᑦ ᐊᐅᓚᑦᓯᓂᕐᒧᑦ ᐸᕐᓇᒍᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃᒥᒃ. ᐊᐅᓚᑦᓯᓂᕐᒧᑦ ᐸᕐᓇᒍᑦ ᐋᕿᓱᕐᑕᐅᒪᔪᑦ ᐊᑐᕐᑐᒋᑦ ᐋᕿᑦᓯᒪᑦᓯᐊᕐᑐᑦ ᑲᒪᔾᔪᑏᑦ ᐊᒻᒪᓗ ᑐᕌᒐᐅᔪᑦ, ᐊᒻᒪᓗ ᑲᒪᒍᒪᓂᖅ ᓴᐳᒻᒥᓗᒋᑦ ᐊᒻᒪᓗ ᐱᓯᒪᓗᒋᑦ ᐊᕙᑖᑕ ᐱᐅᓯᖏᑦ ᐅᒃᑯᓯᒃᓴᓕᒃᒥ ᒥᕐᖑᐃᓯᕐᕕᐅᑉ ᐊᑐᕐᑐᒋᑦ ᓈᒻᒪᑦᑐᑦ ᐃᓱᒪᒋᔭᐅᓂᖏᑦ ᑕᒪᒃᑮᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᐅᔨᓴᕐᑎᒻᒪᕇᑦ ᖃᐅᔨᒪᓂᖏᑦ.

ᐊᐅᓚᑦᓯᓂᕐᒧᑦ ᐸᕐᓇᒍᑦ ᐊᓚᒃᑲᐃᔪᖅ ᐊᖏᔪᒥᒃ ᐅᒃᑯᓯᒃᓴᓕᒃᒥ ᒥᕐᖑᐃᓯᕐᕕᒃᒥᒃ, ᐱᓗᐊᕐᑐᒥᒃ ᓄᓇᓖᑦ ᖃᒪᓂᑦᑐᐊᖅᒥ, ᐃᒡᓗᓕᒑᕐᔪᒃᒥ, ᓴᓪᓕᓂ, ᓇᐅᔮᓂ, ᐊᒻᒪᓗ ᑲᖏᕐᖠᓂᖅᒥ, ᐊᒻᒪᓗ ᐊᓚᒃᑲᐃᔪᑦ ᐃᑲᔪᕐᑎᒌᓐᓂᒃᑯᑦ ᑲᒪᒋᔭᖃᕐᓂᖅ ᒥᕐᖑᐃᓯᕐᕕᐅᑉ ᐊᐅᓚᑕᐅᓂᖓᓂᒃ. ᓇᓗᓇᐃ.ᔭᐃᓂᖅ ᑲᔪᒥᓴᐃᔪᖅ ᐱᕈᕐᐸᓪᓕᐊᓂᖓᓂᒃ ᐳᓚᕋᑦᑏᑦ ᐃᑉᐱᒋᓪᓗᒍ ᐊᐅᓚᑦᓯᓂᖅ ᐊᒻᒪᓗ ᓴᐳᒻᒥᓂᖅ ᐱᒻᒪᕆᐅᔪᓂᒃ ᓇᔪᒐᕐᓂᒃ, ᐃᓕᖅᑯᓯᒃᑯᑦ ᐱᑐᖃᕐᓂᒃ ᐊᒻᒪᓗ ᓇᓕᖏᓐᓂᒃ ᐊᔾᔨᐅᖏᑦᑐᒥᓯᒃ ᐱᒻᒪᕆᐅᔪᑦ ᐃᓄᓐᓄᑦ.

ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᓂᕆᐅᑉᐳᑦ ᐱᓕᕆᓂᕐᒥᒃ ᐃᑲᔪᕐᑎᒋᓗᒋᑦ ᐅᒃᑯᓯᒃᓴᓕᒃ ᒥᕐᖑᑉᐃᓯᕐᕕᒃ ᐊᐅᓚᑕᐅᓂᖓᓄᑦ ᑲᑎᒪᔨᕋᓛᑦ ᐊᒻᒪᓗ ᒥᕐᖑᐃᓯᕐᕕᓕᔩᑦ ᑲᓇᑕᒥ ᐃᑉᐱᒋᓗᒍ ᐊᒥᖅᑳᕈᑎᕗᑦ ᐆᒪᔪᑦ ᐊᒻᒪᓗ ᓇᔪᒐᖏᑦ ᐊᐅᓚᑕᐅᓂᖏᓐᓄᑦ ᑐᕌᕐᑕᐅᔪᑦ ᐊᒻᒪᓗ ᑐᕌᒐᐅᔪᑦ ᐱᔭᕇᕐᑕᐅᒐᓗᐊᕐᒪᖔᑕ ᐅᒃᑯᓯᒃᓴᓕᒃᒥ ᓯᕐᖑᐃᓯᕐᕕᒃᒧᑦ.

ᓯᓗᔪᒥ,

ᓯᕗᓪᓕᖅᐹᖅ ᐆᒪ ᐊᑎᓕᐅᖅᑕᖓ:

Daniel Shewchuk, ᐃᑦᓯᕙᐅᑕᖅ, ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ


ᖃᐅᔨᒪᔭᐅᔭᕆᐊᓕᒃ ᐅᖃᓕᒫᖅᑐᒧᑦ

ᐅᓇ ᐅᖃᓕᒫᒐᖅ ᐅᖃᐅᓯᖃᖅᓯᒪᔪᖅ ᑎᑎᕋᐅᑕᐅᓚᐅᖅᓯᒪᔪᒥᒃ 1993-ᒥ ᐊᖏᖃᑎᒌᒍᑕᐅᓚᐅᖅᑐᒥᒃ ᐃᓄᖕᓄᑦ ᓄᓇᕗᒥ ᐊᒻᒪᓗ ᑯᐃᓐᒋᔭᑉᑎᓐᓄᑦ ᑭᒡᒐᖅᑐᐃᑉᓗᓂ ᒐᕙᒪᑐᖃᒃᑯᓐᓂᒃ (ᓄᓇᕗᑦ ᐊᖏᕈᑎᖓ) ᐊᒻᒪᓗ 2003ᒥ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᖕᒧᑦ. ᑕᒪᒃᑯᐊ ᐅᖃᓕᒫᒐᑦ ᖃᐅᔨᒋᐊᕐᕕᒃᓴᐅᔪᑦ ᐊᒻᒪᓗ ᓇᓗᓇᐃᔭᐃᓯᒪᑉᓗᑎᒃ ᐱᓕᕆᐊᒃᓴᕆᔭᐅᔪᓂᒃ ᐱᓕᕆᖃᑎᒌᖕᓂᒃᑯᑦ ᐊᐅᓚᑦᑎᔾᔪᑎᒃᓴᓂᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔾᔪᑎᖏᑦᑎᒍᑦ ᓄᓇᕗᒥ. ᐊᑐᓕᖁᔭᐅᔪᖅ ᐅᖃᓕᒫᖅᑐᑦ ᖃᐅᔨᒪᓕᖁᑉᓗᒋᑦ ᑕᒪᒃᑯᓂᙵ ᐅᖃᓕᒫᒐᓂᒃ ᑐᑭᓯᐅᒪᑦᑎᐊᓕᕈᓐᓇᖁᑉᓗᒋᑦ ᐃᓗᓕᕆᔭᖏᓐᓂᒃ ᐊᐅᓚᑦᑎᓂᕐᒧᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᖕᒥ. ᐅᖃᓕᒫᒐᓕᐅᖅᓯᒪᔪᑦ ᑖᑉᑯᓂᙵ ᐱᔭᐅᔪᓐᓇᖃᑦᑕᖅᑐᑦ ᖃᐅᔨᒋᐊᕐᕕᒋᓗᒋᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐅᕝᕙᓘᓐᓃᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ.


ᐊᐅᓚᑦᑎᔨᒃᑯᑦ ᐅᖃᐅᓯᒃᓴᖓ ᓇᐃᓪᓕᒋᐊᖅᓯᒪᔪᖅ

ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᑲᓇᑕᒥ ᐊᖏᓂᖓ ᓄᓇᒦᑐᐃᓐᓇᖅᑐᖅ ᑕᓯᐅᔭᕐᔪᐊᑉ ᐅᐊᖕᓇᖓᑕ ᐱᖓᖕᓂᖅᐸᓯᖓᓄᑦ ᐃᓗᓕᖃᖅᖢᓂ ᐃᒪᕆᔭᐅᔪᓂᒃ ᐅᒃᑯᓯᒃᓴᓕᒃᑯᑦ ᐊᒻᒪᓗ ᓄᓇᖁᑎᒋᔭᐅᔪᑦ ᑕᐅᕙᓂ. ᐃᓄᐃᑦ ᖃᒪᓂ’ᑐᐊᕐᒥᐅᑕᑦ, ᐃᒡᓗᓕᒑᕐᔪᖕᒥᐅᑕᑦ, ᓴᓪᓕᕐᒥᐅᑕᑦ, ᓇᐅᔮᕐᒥᐅᑕᑦ (ᑕᐃᔭᐅᖃᑦᑕᓚᐅᖅᑐᖅ ᐃᒪᓐᓇ Repulse Bay), ᐊᒻᒪᓗ ᑲᖏᖅᖠᓂᕐᒥᐅᑕᑦ ᐊᒃᑐᐊᓂᖃᐃᓐᓇᖅᑐᑦ ᓄᓇᒧᑦ ᐃᓄᐃᑦ ᓇᐅᔮᕐᒥᐅᑦ ᓴᓪᓕᕐᒥᐅᑕᓪᓗ ᑕᐅᕙᓂᕐᒥᐅᑕᐅᓂᖅᓴᐅᖃᑦᑕᓚᐅᖅᖢᑎᒃ ᒥᕐᖑᐃᓯᕐᕕᐅᔪᒥ (ᓄᓇᙳᐊᖅ 1). “ᐅᒃᑯᓯᒃᓴᓕᒃ”, ᐃᓄᒃᑎᑐᑦ ᐅᖃᐅᓯᖅ, ᑐᑭᖃᖅᑐᖅ ᐃᒪᓐᓇ “ᓄᓇ ᐅᒃᑯᓯᒃᓴᖅᑕᓕᒃ ᓴᓇᙳᐊᕈᑕᐅᔪᓐᓇᖅᑐᓂᒃ ᐅᒃᑯᓯᓕᐊᖑᔪᓐᓇᖅᑐᓂᒃ ᐊᒻᓐᒪ ᖁᓪᓕᒃᓴᓂᒃ”. ᒥᕐᖑᐃᓯᕐᕕᐅᑉ ᐃᓂᖓ ᐊᖏᓂᓕᒃ 20 885 kmᒥᒃ ᐊᒻᒪᓗ ᐊᖏᓂᖅᐹᖑᖃᑕᐅᔪᖅ ᑲᓇᑕᒥ ᒥᕐᖑᐃᓯᕐᕕᒋᔭᐅᕙᒃᑐᓂᒃ ᖁᓕᐅᑎᓪᓗᒋᑦ ᐊᖏᓂᖅᐹᑦ. ᒥᕐᖑᐃᓯᕐᕕᒃ ᓴᖅᑭᑎᑕᐅᓚᐅᖅᑐᖅ ᑲᓇᑕᒥ ᒥᕐᖑᐃᓯᕐᕕᖕᓄᑦ ᒪᓕᒐᖁᑎᖓᑦᑎᒍ 2014-ᖑᑎᓪᓗᒍ, ᐊᐅᓚᓐᓂᖃᕋᓗᐊᖅᑎᓪᓗᒍ ᑕᐃᒪᖓᓂ 2003- ᖑᓚᐅᖅᑎᓪᓗᒍ, ᐃᓄᐃᑦ ᐊᒃᑐᖅᑕᐅᓯᒪᓂᖓᓄᑦ ᐊᒻᒪ ᐱᕚᓪᓕᕈᑎᓴᖓ ᐊᖏᕈᑎ ᐊᑎᓕᐅᖅᑕᐅᓚᐅᖅᑎᓪᓗᒍ. ᒥᕐᖑᐃᓯᕐᕕᒃ ᑲᑐᔾᔭᐅᓪᓗᓂ ᒪᕐᕉᖕᓄᑦ ᐊᐅᓚᑕᐅᓯᒪᔪᖅ ᐃᓄᖕᓄᑦ ᐊᒻᒪ ᒥᕐᖑᐃᓯᕐᕕᓕᕆᔨᒃᑯᓐᓄᑦ, ᒪᓕᒃᖢᑎᒃ ᓄᓇᕗᑦ ᐊᖏᕈᑎᖏᓐᓂᒃ, ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐊᒻᒪ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓂᒃ, ᐊᒻᒪᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᒪᓕᒐᖁᑎᖏᓐᓂᒃ, ᑲᑎᖦᖢᒋᑦ ᐱᖁᔭᖏᑦ ᐊᒻᒪ ᐊᑐᒐᒃᓴᖏᑦ.

ᐅᓇ ᐊᐅᓚᑦᑎᓂᕐᒧᑦ ᐸᕐᓇᐅᑎ ᓴᖅᑭᑎᑕᐅᓯᒪᔪᖅ ᐊᑐᓕᖅᑎᕆᔪᓐᓇᖁᑉᓗᒋᑦ ᑎᑎᕋᖅᓯᒪᔪᓂᒃ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᒥᐊᓂᖅᓯᓗᑎᒃ, ᖁᕝᕙᖅᑎᕆᓗᑎᒃ ᐊᒻᒪᓗ ᓴᖅᑭᑎᑦᑎᓯᒪᓗᑎᒃ ᓄᓇᒥᙶᖅᑐᓂᒃ ᐃᓕᖅᑯᓯᑐᖃᑎᒎᖅᑐᓂᒡᓗ ᑲᓇᑕᒥ ᐱᒻᒪᕆᐅᑎᑕᐅᔪᓂᒃ. ᐊᐅᓚᑦᑎᓂᕐᒧᑦ ᐸᕐᓇᐅᑎ, ᐊᒻᒪᓗ ᖃᓄᖅᑑᕈᑕᐅᔪᒪᔪᑦ ᐃᓗᐊᓂ, ᐊᑐᖅᑕᐅᓂᐊᖅᑐᑦ ᐃᑲᔫᑖᐅᓗᑎᒃ ᐃᓄᖕᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ ᐊᐅᓚᑦᑎᓂᕐᒧᑦ ᐅᒃᑯᓯᒃᓴᓕᖕᒥᒃ ᐱᓕᕆᖃᑎᒌᖕᓂᒃᑯᑦ, ᖁᓕᓂᒃ ᐅᑭᐅᓂᒃ ᖃᐃᔪᓂᒃ. ᐱᓕᕆᖃᑎᖃᕐᓗᑎᒃ ᐃᓄᖕᓂᒃ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ ᓄᓇᓕᖕᓂᒃ ᐱᒻᒪᕆᐊᓗᒃ ᖃᓄᐃᓕᐅᕈᑕᐅᔪᒪᔪᒃᑯᑦ. ᐊᑐᓂ ᖃᓄᐃᓕᐅᕈᑕᐅᔪᒪᔪᑦ ᐱᕈᖅᑎᑦᑎᓯᒪᔪᑦ ᐊᑐᓂ ᐱᐊᓂᒃᑕᐅᓯᒪᔪᓂᒃ ᐱᔪᓐᓇᖅᑎᑦᑎᓯᒪᑉᓗᑎᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᑲᒪᑦᑎᐊᕐᓂᖅᓴᐅᔪᓐᓇᖁᑉᓗᒋᑦ ᐱᓕᕆᐊᒃᓴᒥᓂᒃ ᐊᒻᒪᓗ ᒥᕐᖑᐃᓯᕐᕕᖕᒥ ᖃᓂᒋᔭᓖᑦ ᓄᓇᓖᑦ ᐱᕚᓪᓕᕈᓐᓇᖁᑉᓗᒋᑦ ᑕᐃᒪᐃᑦᑐᒥᒃ ᒥᕐᖑᐃᓯᕐᕕᖃᖅᑎᓪᓗᒍ ᑲᓇᑕᒥ.

ᖃᓄᖅᑑᕈᑕᐅᓇᓱᒃᑐᖅ 1:

ᐱᖁᑎᕐᔪᐊᓕᕆᓂᖅ – ᐱᖁᑎᕐᔪᐊᑦ ᐊᑐᖅᑕᐅᔭᕆᐊᓖᑦ ᐊᑐᐃᓐᓇᐅᖁᑉᓗᒋᑦ ᒥᐊᓂᖅᓯᓂᕐᒧᑦ, ᓴᕿᑎᑦᑎᓯᒪᓂᖕᒧᑦ, ᐊᒻᒪ ᖁᕝᕙᖅᑎᕆᓂᕐᒧᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᑲᓇᑕᒥ

ᓴᖅᑭᑎᑦᑎᓂᖅ ᐱᖁᑎᕐᔪᐊᓂᒃ ᐊᒻᒪᓗ ᑐᓂᓯᖃᑦᑕᕐᓂᖅ ᑐᑭᓯᒋᐊᕈᑎᒃᓴᓂᒃ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓄᑦ (ᐃᓄᖕᓄᑦ, ᓴᓇᔨᓄᑦ ᐊᒻᒪᓗ ᐳᓚᕋᖅᑎᓄᑦ) ᐱᒻᒪᕆᐊᓗᒃ ᐊᐅᓚᑦᑎᓂᒃᑯᑦ.

ᖃᓄᖅᑑᕈᑕᐅᓇᓱᒃᑐᖅ 2:

ᓄᓇ − ᓴᖏᒃᑎᑉᐸᓪᓕᐊᖁᑉᓗᒍ ᐃᓄᐃᑦ ᐊᒃᑐᐊᖓᓂᖓ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᑲᓇᑕᒥ

ᓴᙱᔪᒥᒃ ᐊᒃᑐᐊᓂᖃᕐᓂᖏᓐᓄᑦ ᐃᓄᐃᑦ ᓄᓇᖓ, ᐱᒻᒪᕆᐅᔪᓪᓗ ᐃᓄᐃᑦ ᐅᓂᑉᑳᖅᑐᐊᖏᑦ, ᐊᒻᒪᓗ ᓴᖅᑭᑎᑦᑎᖃᑦᑕᕐᓂᖅ ᖁᕝᕙᖅᑎᕆᕙᖕᓂᕐᓗ ᒥᕐᖑᐃᓯᕐᕕᖕᒥ ᓇᐃᓪᓕᒋᐊᖅᓯᒪᔪᑦᑯᑦ ᐅᖃᐅᓯᐅᓯᒪᔪᒃᓂᒃ ᑕᒡᕙᓂ ᐱᓕᕆᐊᖑᔪᒪᔪᒃᑯᑦ.

ᖃᓄᖅᑑᕈᑕᐅᔪᒪᔪᖅ 3:

ᑲᑎᑦᑎᓂᖅ ᖃᐅᔨᒪᓂᕆᔭᐅᔪᓂᒃ - ᑲᑎᑦᑎᓂᖅ ᓱᓇᑐᐃᓐᓇᒃᑯᑦ ᖃᐅᔨᓴᕈᑕᐅᓯᒪᔪᒃᑯᑦ ᑐᑭᓯᒋᐊᕈᑎᒃᓴᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔫᑕᐅᖁᑉᓗᒋᑦ ᒥᐊᓂᖅᓯᓂᕐᒧᑦ, ᓴᖅᑭᑎᑦᑎᓂᕐᒧᑦ, ᐊᒻᒪᓗ ᖁᕝᕙᖅᑎᕆᓂᕐᒧᑦ ᐅᒃᑯᓯᒃᓴᓕᒃᑯᑦ ᒥᕐᖑᐃᓯᕐᕕᒃᑯᑦ ᓄᓇᖁᑎᒋᔭᐅᔪᓂᒃ ᐃᓕᖅᑯᓯᑐᖃᑎᒍᓪᓗ ᐊᑐᖅᑕᐅᔪᓐᓇᖅᑐᓂᒃ

ᑲᑎᑦᑎᓂᖅ ᓱᓇᑐᐃᓐᓇᒃᑯᑦ ᖃᐅᔨᓴᕈᑕᐅᓯᒪᔪᒃᑯᑦ ᑐᑭᓯᒋᐊᕈᑎᒃᓴᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᑭᓯᐅᒪᔪᒪᓂᕐᒧᑦ ᐊᒻᒪᓗ ᐊᐅᓚᑦᑎᔪᒪᓂᕐᒧᓪᓗ ᒥᕐᖑᐃᓯᕐᕕᖕᒥ ᑕᒪᒃᑯᐊ ᑕᒡᕙ ᐃᓱᒪᒋᔭᐅᓗᐊᖅᑐᑦ ᖃᓄᖅᑑᕈᑕᐅᔪᒪᔪᒃᑯᑦ. ᐱᒻᒪᕆᐅᔪᓪᓗ ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ, ᖃᐅᔨᓴᖕᓂᒃᑯᑦ ᐊᒻᒪᓗ ᕿᒥᕐᕈᓂᒃᑯᑦ ᑐᙵᕕᒋᔭᐅᔪᖅ ᐊᑑᑎᖃᑦᑎᐊᖁᑉᓗᒍ ᐊᐅᓚᑦᑎᓂᖅ.

1.0 ᐱᒋᐊᕈᑎᖓ

ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐊᐅᓚᑦᑎᔨᐅᖕᒪᑕ ᐱᐅᓂᖅᐹᖑᖃᑕᐅᔪᒥᒃ ᐊᖏᓂᖅᐹᖑᖃᑕᐅᔪᒥᒡᓗ ᒥᐊᓂᕆᔭᐅᑦᑎᐊᕆᐊᖃᖅᑐᒥᒃ ᓄᓇᒥ ᐊᒻᒪᓗ ᐃᑦᓴᕐᓂᑕᖃᕐᕕᐅᔪᓂᒃ ᓄᓇᕐᔪᐊᕐᒥ. ᑖᑉᓱᒪ ᑎᒥᖁᑎᒋᔭᐅᔫᑉ ᑐᕌᒐᕆᔭᖓ ᒥᐊᓂᖅᓯᔪᒪᓂᖅ ᐊᒻᒪᓗ ᓴᖅᑭᑎᑦᑎᔪᒪᓂᖅ ᑕᒪᒃᑯᓂᙵ ᓄᓇᓕᖕᓂᒃ ᐱᕚᓪᓕᕈᑕᐅᔪᓐᓇᖁᑉᓗᒋᑦ ᖁᕕᐊᒋᔭᐅᔪᓐᓇᖁᑉᓗᒋᓪᓗ ᒫᓐᓇᐅᔪᖅ ᐃᓄᖁᑎᑉᑎᓐᓄᑦ ᓯᕗᓂᒃᓴᕆᔭᑉᑎᓐᓄᓪᓗ. ᓯᕗᓂᒃᓴᒥ ᖃᐅᔨᒪᔭᐅᑦᑎᐊᖁᑉᓗᒍ, ᖃᓄᖅᑑᕐᓂᕐᓗ ᐊᐅᓚᑦᑎᓂᒃᑯᑦ ᐊᑐᓂ ᑲᓇᑕᒥ ᒥᕐᖑᐃᓯᕐᕕᒋᔭᐅᔪᓂᒃ, ᑲᓇᑕᒥᓗ ᐃᒪᕐᒥᐅᑕᒃᑯᑦ ᐱᑕᖅᑕᓕᕝᕕᐅᔪᓂᒃ, ᐃᑦᓴᕐᓂᑕᖃᕐᕖᓪᓗ ᐃᓂᒋᔭᐅᔪᑦ ᐊᒻᒪᓗ ᑕᐃᑉᑯᐊ ᑲᓇᑕᒥ ᐃᑦᓴᕐᓂᑕᖃᕐᕖᑦ ᐊᐅᓚᑕᐅᔪᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᐃᑲᔪᖅᑐᐃᓯᒪᔪᑦ ᑎᒥᖁᑎᒋᔭᐅᔫᑉ ᑕᐅᑐᕐᕉᖅᑕᖓᓂᒃ:

ᑲᓇᑕᐅᑉ ᐱᒻᒪᕆᐅᑎᑕᖓ ᓄᓇ ᐊᒻᒪᓗ ᐃᑦᓴᕐᓂᑕᖃᕐᕖᑦ ᑕᐅᕗᙵᓗᒃᑖᖅ ᖃᐅᔨᒪᔭᐅᓂᐊᖅᑐᑦ, ᑲᑎᙵᑉᓗᑎᒃ ᐆᒻᒪᑎᒋᔭᐅᔪᑦ ᐊᒻᒪᓗ ᐃᓱᒪᒋᔭᐅᔪᑦ ᓴᙱᓂᖅᓴᒃᑯᑦ, ᐃᑎᓂᖅᓴᒃᑯᑦ ᑐᑭᓯᐅᒪᔭᐅᔪᓐᓇᖁᑉᓗᒋᑦ ᑲᓇᑕᒥᙶᖅᑐᒃᑯᑦ.

ᐅᓇ ᓯᕗᓪᓕᖅᐸᐅᔪᖅ ᐊᐅᓚᑦᑎᓂᕐᒧᑦ ᐸᕐᓇᐅᑎᓕᐊᕆᓯᒪᔭᖏᓐᓂᒃ ᐅᒃᑯᓯᒃᓴᓕᖕᒧᑦ ᒥᕐᖑᐃᓯᕐᕕᖕᒧᑦ. ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᖁᔭᖓ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑎᒥᖓᑕ ᐱᖁᔭᖓ ᐅᖃᖅᓯᒪᔫᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐊᐅᓚᑦᑎᔾᔪᑎᒃᑯᑦ ᐸᕐᓇᐃᔭᕆᐊᖃᕐᓂᖏᓐᓂᒃ ᐊᑐᓂ ᑲᓇᑕᒥ ᒥᕐᖑᐃᓯᕐᕕᒋᔭᐅᕙᒃᑐᒃᑯᑦ. ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᒃᑯᑦ ᑲᓇᑕᒥ ᐊᐅᓚᑦᑎᔨᒃᑯᑦ ᐸᕐᓇᐅᑎᖓ, 2018-ᒥ ᐊᑐᓕᖅᑎᖅᑕᐅᔪᒫᖅᑐᖅ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᖕᒥ ᐊᐅᓚᑦᑎᔨᒃᑯᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᐊᖏᖅᕈᑕᐅᔪᒫᖅᖢᓂ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ. ᐊᒻᒪᓗᑦᑕᐅᖅ, ᐅᓇ ᐊᐅᓚᑦᑎᓂᕐᒧᑦ ᐸᕐᓇᐅᑎ ᐊᖏᖅᑕᐅᔪᒫᖅᑐᖅ ᒥᓂᔅᑕᒧᑦ ᑲᒪᔨᐅᔪᒧᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᐊᒻᒪᓗ ᓴᖅᑭᑎᑕᐅᓚᐅᖅᖢᓂ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂᒃ. ᐱᓕᕆᐊᖑᕙᒃᑐᑦ ᓇᖕᒥᓂᖃᖅᑎᐅᔪᑦ ᐱᓕᕆᖃᑎᒌᖕᓂᕆᕙᒃᑕᖏᑦ ᐊᒻᒪᓗ ᐊᖏᖅᑕᐅᔭᕆᐊᓕᖕᓂᒃ ᑲᒪᖃᑦᑕᕐᓂᖏᑦ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᑭᐅᓯᔪᓐᓇᕐᓂᖏᓐᓄᑦ ᓇᓗᓇᐃᖅᓯᒍᑕᐅᕙᒃᑐᖅ ᑲᓇᑕᒥᐅᓄᑦ ᓇᓗᓇᐃᔭᐃᕙᓪᓕᐊᑉᓗᑎᒃ ᖃᓄᖅ ᒥᕐᖑᐃᓯᕐᕕᓕᕆᓂᒃᑯᑦ ᐊᐅᓚᑦᑎᓂᖅ ᐱᐊᓂᒃᓯᓂᐊᕐᒪᖔᑦ ᐆᒃᑑᑕᐅᔪᓐᓇᖅᑐᓂᒃ ᓴᖅᑭᑦᑐᓂᒃ ᐃᑲᔪᖅᑐᐃᓂᕐᒧᑦ ᑎᒥᖁᑎᒋᔭᐅᔫᑉ ᐱᓕᕆᐊᒃᓴᕆᔭᖓᓄᑦ.

ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ ᐱᓕᕆᖃᑎᒌᖕᓂᒃᑯᑦ ᐊᐅᓚᑕᐅᔪᖅ ᒪᓕᒃᖢᑎᒃ ᓄᓇᕗᒥ ᐊᖏᕈᑕᐅᓯᒪᔪᒥᒃ ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃᑯᑦ. ᐅᒃᑯᓯᒃᓴᓕᖕᒥ ᐊᐅᓚᑦᑎᔨᒃᑯᑦ ᑲᑎᒪᔨᕋᓛᖏᑦ, ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓴᓇᔨᖏᑦ ᐊᒻᒪᓗ ᐃᓄᐃᑦ ᓄᓇᓖᑦ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ ᐃᓚᐅᖃᑕᐅᓂᖃᓚᐅᖅᑐᑦ ᐸᕐᓇᐃᑎᓪᓗᒋᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᐊᒻᒪᓗ ᑕᐃᒪᐃᒻᒪᑦ ᐃᑲᔪᖅᓯᒪᔪᑦ ᓯᕗᓂᒃᓴᕆᔭᐅᓂᐊᖅᑐᒥᒃ ᖃᓄᐃᓕᐅᕈᑕᐅᔪᒪᓂᖓᓄᑦ ᑲᓇᑕᒥ ᒥᕐᖑᐃᓯᕐᕕᐅᑉ. ᐅᓇ ᐸᕐᓇᐅᑎ ᓴᖅᑭᑎᑦᑎᓯᒪᔪᖅ ᑐᑭᓯᓇᑦᑎᐊᖅᑐᓂᒃ, ᖃᓄᖅᑑᕈᑕᐅᔪᒪᔪᓂᒃ ᐊᐅᓚᑦᑎᓂᕐᒧᑦ ᐊᐅᓪᓛᖅᑎᑦᑎᓂᕐᒧᓪᓗ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒥ ᑕᐅᑐᕐᕉᖅᑎᑦᑎᑉᓗᓂ, ᓇᓗᓇᐃᔭᐃᓯᒪᑉᓗᓂᓗ ᖃᓄᖅᑑᕈᑕᐅᔪᒪᓪᓚᕆᒃᑐᓂᒃ, ᐱᓕᕆᐊᖑᔭᕆᐊᓕᖕᓂᒃ ᐊᒻᒪᓗ ᑐᕌᒐᕆᔭᐅᔪᓂᒃ. ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ, ᐱᓕᕆᖃᑎᖃᕐᓗᑎᒃ ᐃᓄᖕᓂᒃ, ᑐᓴᖅᑎᑦᑎᖃᑦᑕᕐᓂᐊᖅᑐᑦ ᐊᕐᕌᒍᑕᒫᒃᑯᑦ ᖃᓄᐃᓕᐅᕈᑕᐅᕙᓪᓕᐊᔪᓂᒃ ᑲᒪᒋᔭᐅᑦᑎᐊᕈᓐᓇᖁᑉᓗᒍ ᐸᕐᓇᐅᑎᒃᑯᑦ ᐱᓕᕆᐊᖑᔪᒪᔪᑦ ᐊᒻᒪᓗ ᕿᒥᕐᕈᖃᑦᑕᕐᓗᑎᒃ ᐸᕐᓇᐅᑎᒥᒃ ᖁᓕᑦ ᐅᑭᐅᑦ ᐱᐊᓂᒃᑳᖓᑕ ᕿᓚᒻᒥᐅᓂᖅᓴᒃᑯᓪᓘᓐᓃᑦ ᐱᔭᕆᐊᖃᕈᑎᒃ.

ᐅᓇ ᐸᕐᓇᐅᑎ ᐃᓱᓕᐅᑕᐅᙱᑦᑐᖅ ᐊᒻᒪᓗ ᐃᖕᒥᒃᑯᑦ. ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐊᒻᒪᓗ ᐃᓄᐃᑦ ᐱᓕᕆᖃᑎᒌᖕᓂᐊᖅᑐᑦ ᒪᑐᐃᖓᑦᑎᐊᖅᑐᒃᑯᑦ ᐅᖃᖃᑎᒌᒍᓐᓇᖃᑦᑕᖁᑉᓗᒋᑦ ᐊᑐᓕᖅᑎᖅᑕᐅᓂᖓᒍᑦ ᐊᐅᓚᑦᑎᓂᕐᒧᑦ ᐸᕐᓇᐅᑎ, ᐊᒻᒪᓗ ᑕᒪᑐᒧᙵ ᐊᒃᑐᐊᓂᖃᑦᑎᐊᖏᓐᓇᖁᑉᓗᒍ ᑐᑭᖃᑦᑎᐊᖏᓐᓇᖁᑉᓗᒍᓗ. ᐸᕐᓇᐅᑎ ᐊᑐᖅᑕᐅᖏᓐᓇᕐᓂᐊᖅᑐᖅ ᐱᓕᕆᖃᑎᒌᑦᑎᐊᖏᓐᓇᕈᓐᓇᖁᑉᓗᒋᑦ ᐱᓕᕆᖃᑎᒌᖕᓂᒃᑯᑦ ᐊᐅᓚᑕᐅᔪᓐᓇᖁᑉᓗᒍ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᐅᑭᐅᓂᒃ ᖃᐃᔪᓂᒃ.

ᓄᓇᙳᐊᖅ 1. ᓄᓇᓖᑦ ᐊᕕᒃᑐᖅᓯᒪᓂᖏᑦᑕ ᐋᖅᑭᐅᒪᓂᖓ

A map showing Ukkusiksalik National Park, located in Nunavut, in proximity to the communities of Naujaat, Baker Lake, Ranking Inlet, Chesterfield Inlet, Coral Harbour and Iqaluit. 

ᓄᓇᙳᐊᖅ 2. ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ

A map showing the park boundaries of Ukkusiksalik National Park. The map details the land and water inside the park and the crown and Inuit owned lands outside of the park 

2.0 ᐅᒃᑯᓯᒃᓴᓕᐅᑉ ᒥᕐᖑᐃᓯᕐᕕᐅᑉ ᑲᓇᑕᒥ ᐱᒻᒪᕆᐅᓂᖓ

ᒥᕐᖑᐃᓯᕐᕕᒃ ᓯᕗᓪᓕᖅᐹᒥ ᓴᐳᓐᓂᐊᖅᑕᐅᖁᔭᐅᓯᒪᑉᓗᓂ ᓇᓗᓇᐃᖅᑕᐅᖅᑳᓚᐅᖅᓯᒪᔪᖅ 1978ᒥ, ᐃᓚᐅᖃᑕᐅᑉᓗᒍ “6 ᐅᑭᐅᖅᑕᖅᑐᒥ 60”ᒥ ᐅᖃᖃᑎᒌᖕᓂᒃᑯᑦ ᐱᓕᕆᐊᖑᔪᒃᑯᑦFootnote 1. ᒥᕐᖑᐃᓯᕐᕕᒃ ᓯᕗᓪᓕᖅᐹᒥ ᓴᐳᓐᓂᐊᖅᑕᐅᖁᔭᐅᓯᒪᑉᓗᓂ ᓇᓗᓇᐃᖅᑕᐅᖅᑳᓚᐅᖅᓯᒪᔪᖅ 1978ᒥ, ᐃᓚᐅᖃᑕᐅᑉᓗᒍ “6 ᐅᑭᐅᖅᑕᖅᑐᒥ 60”ᒥ ᐅᖃᖃᑎᒌᖕᓂᒃᑯᑦ ᐱᓕᕆᐊᖑᔪᒃᑯᑦ ᓄᓇᕗᒥ ᐊᖏᕈᑎᓕᐊᒃᑯᑦ 8ᒋᔭᐅᔪᒃᑯᑦ ᒥᕐᖑᐃᓯᕐᕕᒃ ᕿᑎᐊᓃᑦᑐᖅ ᓄᓇᖁᑎᒋᔭᐅᔪᒥᒃFootnote 2 ᓄᓇᐃᑦ ᓴᓂᕐᕙᖅᑕᐅᓚᐅᖅᑐᑦ ᑲᓇᑕᒥ ᒥᕐᖑᐃᓯᕐᕕᙳᕐᓂᐊᕐᓂᖓᓄᑦ 1996ᒥ ᐅᒃᑯᓯᒃᓴᓕᖕᒥ, ᐱᒻᒪᕆᐊᓗᒃ ᓄᓇᒥ ᐃᒪᖃᖅᑐᖅ ᐊᖏᓂᓕᒃ 150 ᑭᓛᒥᑕᓂᒃ ᓄᓇᒧᑦ ᓴᓪᓕᐅ ᑎᒫᓂ ᑕᓯᐅᔭᕐᔪᐊᒃᑯᑦ ᖁᕐᓗᖅᑐᖃᖅᖢᓂ ᑕᓯᐅᔭᐅᑉ ᐃᓱᐊᓂ, ᐃᓂᒋᔭᐅᓚᐅᖅᑐᖅ ᓂᐅᕕᕐᕕᓕᕆᔨᒃᑯᓐᓄᑦ ᓂᐅᕕᕐᕕᐅᑉᓗᓂ (ᓄᓇᖑᐊᖅ 2). 20 885 ᑭᓛᒥᑕᒥ, ᐅᒃᑯᓯᒃᓴᓕᒃ ᐊᖏᓂᖅᐹᖑᖃᑕᐅᔪᖅ ᖁᓕᐅᖕᒪᑕ ᐊᖏᓂᖅᐹᑦ ᒥᕐᖑᐃᓯᕐᕖᑦ ᑲᓇᑕᒥ. “ᐅᒃᑯᓯᒃᓴᓕᒃ”, ᐃᓄᒃᑎᑐᑦ ᐅᖃᐅᓯᖅ, ᑐᑭᖃᖅᑐᖅ ᐃᒪᓐᓇ “ᓄᓇ ᐅᒃᑯᓯᒃᓴᖅᑕᓕᒃ ᓴᓇᙳᐊᕈᑕᐅᔪᓐᓇᖅᑐᓂᒃ ᐅᒃᑯᓯᓕᐊᖑᔪᓐᓇᖅᑐᓂᒃ ᐊᒻᓐᒪ ᖁᓪᓕᒃᓴᓂᒃ”. ᐅᒃᑯᓯᒃᓴᐃᑦ ᐊᑐᖅᑕᐅᕙᒃᑐᑦ ᖁᓪᓕᓕᐅᕈᑕᐅᕙᒃᖢᑎᒃ ᐃᑲᔫᑎᒻᒪᕆᐊᓗᐃᑦ ᐃᓅᓇᓱᐊᕐᓂᒃᑯᑦ ᐊᒻᒪᓗ ᐅᖁᖅᓴᕈᑕᐅᕙᒃᓚᐅᖅᑐᑦ, ᐃᑭᑦᑕᖅᑐᖃᕈᑕᐅᕙᓚᐅᖅᑐᑦ, ᐊᒻᒪᓗ ᐃᒐᔾᔪᑕᐅᕙᓚᐅᖅᑐᑦ ᓂᒡᓕᓇᖅᑐᐊᓗᖕᒥ ᐅᑭᐅᖅᑕᖅᑐᒥ.

ᓯᕗᓪᓕᖅᐹᑦ ᓄᓇᖃᓚᐅᖅᑐᑦ ᐅᒃᑯᓯᒃᓴᓕᖕᒥ ᓄᓇᒥᐅᑕᓪᓚᕆᐅᓚᐅᖅᑐᑦ ᖃᐅᔨᔭᐅᖅᑳᖅᓯᒪᔪᓪᓗ ᑕᐅᕙᓂ ᐃᓄᖃᖅᓯᒪᓂᖓᓄᑦ (2000 BC – 800 BC) ᓄᓇᖃᖅᓯᒪᓂᖏᓐᓄᑦ ᖃᐅᔨᔭᐅᓯᒪᑉᓗᑎᒃ 800 BCᒥFootnote 3. ᖃᐅᔨᔭᐅᖅᑳᖅᓯᒪᔪᑦ ᓄᓇᖃᖅᓯᒪᔪᑦ ᒥᕐᖑᐃᓯᕐᕕᖕᒥ ᓄᓇᒥᐅᑕᓪᓚᕆᐅᓚᐅᖅᑐᑦ ᑑᓕᒥᐅᓂᒃ ᐃᓕᖅᑯᓯᖃᑎᖃᖅᓯᒪᔪᑦ ᑎᑭᓐᓂᑯᐃᑦ ᑕᓯᐅᔭᕐᔪᐊᑉ ᐅᐊᖕᓇᖓᓂᒃ ᑲᓇᖕᓇᖓᓂᒡᓗ 1200 ADᒥFootnote 4. ᑕᐅᕙᓂ ᐃᓄᐃᑦ ᓄᓇᖃᖅᓯᒪᔪᑦ ᒫᓐᓇᓵᖑᓂᖅᐹᒃᑯᑦ ᖃᐅᔨᒪᔭᐅᔪᑦ ᐃᒪᓐᓇ ᐊᐃᕕᓕᖕᒥᐅᑦFootnote 5. ᒥᕐᖑᐃᓯᕐᕕᒃ ᓇᓗᓇᐃᒃᑯᑦᑎᖅᓯᒪᔪᖅ 449ᑯᑦ ᖃᐅᔨᒪᔭᕆᔭᐅᔪᒃᑯᑦ ᐃᓕᖅᑯᓯᑐᖃᑎᒍᑦ ᐊᑐᖅᑐᒃᓴᓂᒃ ᑐᓴᐅᒪᔾᔪᑎᒋᔭᖅᐳᑦ ᑐᑭᓯᐅᒪᓂᒃᑯᑦ ᐃᑦᓴᕐᓂᑕᖃᕐᕕᐅᓯᒪᓂᖓᓄᑦ ᓄᓇ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᖃᑦᑕᖅᓯᒪᓂᖓᓄᑦ (ᓇᓗᓇᐃᔭᐅᑎ 1 ᐃᓚᐅᖃᑕᐅᑎᑦᑎᔪᖅ ᐊᔾᔨᐅᙱᑦᑐᓂᒃ ᐃᓕᖅᑯᓯᑐᖃᑎᒍᑦ ᐃᓂᒋᔭᐅᖃᑦᑕᖅᓯᒪᔪᓂᒃ).

ᐱᕈᖅᑐᖃᓗᐊᙱᑦᑐᖅ ᐅᔭᕋᖃᕐᓂᖅᓴᐅᓂᖓᓄᑦ ᓄᓇᖓ. ᐆᒪᔪᑦ ᑕᑯᔭᐅᔪᓐᓇᖃᑦᑕᖅᑐᑦ ᒥᕐᖑᐃᓯᕐᕕᖕᒥ ᓇᓄᐃᑦ, ᐊᒃᖤᐃᑦ, ᐅᒥᖕᒪᐃᑦ, ᑐᒃᑐᐃᑦ, ᐊᒪᕈᐃᑦ, ᖃᕝᕖᑦ, ᑎᕆᒐᓂᐊᑦ, ᐅᑲᓕᐊᕐᔪᐃᑦ, ᓯᒃᓰᑦ, ᑭᒡᒐᕕᐊᕐᔪᐃᑦ, ᑭᒡᒐᕖᑦ, ᓇᒃᑐᕋᓖᑦ, ᑳᔫᑦ, ᑲᖑᐃᑦ, ᓂᕐᓖᑦ, ᖁᒡᔪᐃᑦ, ᐊᒻᒪᓗ ᖁᐸᓄᐊᑦ, ᐊᓯᖏᓪᓗ ᑕᐃᒪ. ᐅᒃᑯᓯᒃᓴᓕᒃ ᖃᐅᔨᒪᔭᐅᖕᒥᔪᖅ ᓇᑦᑎᖃᖃᑦᑕᕐᓂᖓᓄᑦ, ᕿᓇᓗᒐᖃᖃᑦᑕᕐᓂᖓᓄᑦ, ᐊᒻᒪᓗ ᑕᕆᐅᕐᒥᐅᑕᓂᒃ ᐃᖃᓗᖃᖃᑦᑕᕐᓂᖓᓄᑦ, ᑎᓂᙵᓂᕆᖃᑦᑕᖅᑕᖓᓗ ᑲᔾᔮᕐᓇᖃᑦᑕᕐᓂᖓᓄᑦ.

ᒥᕐᖑᐃᓯᕐᕕᒃ ᐱᓕᕆᖃᑎᒌᖕᓂᒃᑯᑦ ᐊᐅᓚᑕᐅᔪᖅ ᐃᓄᖕᓄᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᒪᓕᒃᖢᑎᒃ ᓄᓇᕗᒥ ᐊᖏᕈᑎᓕᐊᕐᒥᒃ ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᕐᒥᒃ. ᒪᓕᒃᖢᒍ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᑉ ᐃᓚᖓ 2.2, ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᓴᖅᑭᑎᑕᐅᓚᐅᖅᑐᖅ ᐃᒪᓐᓇᐃᑦᑐᒪᑉᓗᑎᒃ:

  • ᒥᐊᓂᖅᓯᔪᒪᑉᓗᑎᒃ ᓄᓇᒥ ᑲᓇᑕᒥ ᑲᓇᑕᐅᑉ ᕿᑎᐊᒍᑦ ᓄᓇᖃᕐᕕᐅᔪᒥᒃ ᐸᐸᑐᖅᑕᐅᑦᑎᐊᖁᑉᓗᒍ ᓱᕈᖅᓯᒪᓕᖁᓇᒍ ᓯᕗᓂᒃᓴᕆᔭᑉᑕ ᐊᑐᖃᑦᑕᕈᒫᕐᒪᒍᑦᑕᐅᖅ;
  • ᐋᖅᑭᐅᒪᑦᑎᐊᕈᓐᓇᖁᑉᓗᒍ ᐊᐅᓚᓂᖓ, ᖃᓄᐃᙱᑦᑎᐊᕈᓐᓇᖁᑉᓗᒋᑦ ᐆᒪᔪᑦ, ᐆᒪᔪᓪᓗ ᐊᒥᒐᓕᖁᓇᒋᑦ ᐃᓄᐃᑦ ᐊᖑᓇᓱᖃᑦᑕᕐᓂᐊᖅᑎᓪᓗᒋᑦ;
  • ᖁᕕᐊᒋᔭᐅᖃᑦᑕᖁᑉᓗᒋᓪᓗ ᐊᔾᔨᐅᙱᑦᑐᒃᑯᑦ ᐃᑦᓴᕐᓂᑕᓕᕆᔾᔪᑎᕕᓃᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐊᒃᑐᐊᓂᓖᑦ ᑭᕙᓪᓕᕐᒥ ᐃᓄᖕᓄᑦ ᐊᒻᒪᓗ ᓄᓇᒃᑯᑦ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᖕᒥ;
  • ᐊᔭᐅᖅᑐᐃᔪᒪᑉᓗᑎᒡᓗ ᐃᓄᖕᓂᒃ ᑐᑭᓯᐅᒪᔪᓐᓇᖁᑉᓗᒋᑦ, ᖁᔭᓕᔪᓐᓇᖁᑉᓗᒋᑦ ᖁᕕᐊᓲᑎᖃᕈᓐᓇᖁᑉᓗᒋᓪᓗ ᐅᒃᑯᓯᒃᓴᓕᖕᒥᒃ ᑲᓇᑕᒥ ᒥᕐᖑᐃᓯᕐᕕᖕᒥ; ᐊᒻᒪᓗ
  • ᐃᓕᑕᖅᓯᓗᑎᒃ ᐅᐱᒍᓱᒡᓗᑎᒡᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐃᓕᖅᑯᓯᑐᖃᖏᓐᓂᒃ ᐊᒻᒪᓗ ᐊᖑᓇᓱᖕᓂᒃᑯᑦ ᐱᔪᓐᓇᐅᑎᒋᔭᖏᓐᓂᒃ ᐊᒻᒪᓗ ᐊᑐᓕᖅᑎᕆᓗᑎᒃ ᑕᒪᒃᑯᓂᙵ ᒥᕐᖑᐃᓯᕐᕕᒃ ᐊᑐᖅᑕᐅᓂᓕᒫᖓᓄᑦ.

3.0 ᐸᕐᓇᐃᓂᕐᒧᑦ ᑐᕌᖓᔪᑦ

ᒪᓕᒐᑎᒍᑦ ᐊᐅᓚᑦᑎᓂᒃᑯᓪᓗ ᑐᕌᖓᔪᑦ ᒥᕐᖑᐃᓯᕐᕕᒃᑯᑦ, ᐱᒻᒪᕆᐅᔪᒃᑯᑦ ᓇᐅᒃᑰᕈᑕᐅᕙᒃᑐᑦ ᐊᒃᑐᖅᓯᓂᖃᕐᓂᐊᖅᑐᑦ ᒥᕐᖑᐃᓯᕐᕕᖕᒧᑦ ᐅᑭᐅᓂᒃ ᖃᐃᔪᓂᒃ, ᐊᒻᒪᓗ ᐃᓱᒪᒋᔭᐅᔪᑦ ᐃᓄᖕᓄᑦ, ᒥᕐᖑᐃᓯᕐᕕᐅᑉᓗ ᖃᓂᒋᔭᖓᓂᒃ ᓄᓇᓕᖕᓄᑦ, ᓇᖕᒥᓂᖁᑎᓕᖕᓄᑦ, ᐊᒻᒪᓗ ᐊᓯᖏᑦ ᐃᓄᐃᑦ ᐃᓅᖅᑲᑎᒌᒃᑐᓂᒃ ᐃᓱᒪᒋᔭᐅᔭᕆᐊᓖᑦ ᐊᖓᔪᖅᑳᒡᒍᑏᑦ ᐸᕐᓇᐃᓂᐊᖅᑎᓪᓗᒋᑦ ᐊᐅᓚᑦᑎᓂᕐᒧᑦ ᐅᒃᑯᓯᒃᓴᐅᑉ ᒥᕐᖑᐃᓯᕐᕕᐅᑉ ᓯᕗᓂᒃᓴᕆᓂᐊᖅᑕᖓᓂᒃ. ᖃᑉᓯᑲᓪᓚᑦ ᐃᓱᒫᓘᑕᐅᔪᑦ ᐊᒻᒪᓗ ᐱᕕᒃᓴᕆᔭᐅᔪᑦ ᓇᓗᓇᐃᖅᑕᐅᓚᐅᖅᑐᑦ ᒥᕐᖑᐃᓯᕐᕕᐅᑉ ᖃᓄᐃᓐᓂᖓ ᖃᐅᔨᓴᖅᑕᐅᑎᓪᓗᒍ ᐊᒻᒪᓗ ᓯᕗᓂᐊᒍᑦ ᐸᕐᓇᐃᑎᓪᓗᒋᑦ ᐊᒻᒪᓗ ᐃᓚᐅᖃᑕᐅᑉᓗᒍ ᐱᔭᕆᐊᑐᓂᐊᖅᑐᑦ ᒫᓐᓇᐅᔪᖅ ᐱᖁᑎᕐᔪᐊᕆᔭᒃᑯᑦ ᐋᖅᑭᐅᒪᙱᓐᓂᐅᔪᑦ ᐃᑲᔪᖅᑑᑎᒃᑯᑦ ᒥᕐᖑᐃᓯᕐᕕᐅᑉ ᐊᐅᓚᑕᐅᔾᔪᑎᒃᓴᖏᓐᓄᑦ ᐊᒻᒪᓗ ᐊᑐᖃᑦᑕᖅᑐᓄᑦ, ᐱᕕᒃᓴᕆᔭᐅᔪᕐᓗ ᒥᕐᖑᐃᓯᕐᕕᒃ ᐱᒻᒪᕆᐅᔪᒃᑯᑦ ᐱᓕᕆᐊᒃᓴᖃᖅᑎᓪᓗᒍ ᒥᐊᓂᖅᓯᓂᕐᒧᑦ ᖁᕝᕙᖅᑎᕆᓂᕐᒧᓪᓗ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ, ᐊᒻᒪᓗ ᑲᑎᑦᑎᔭᕆᐊᖃᒃᑲᓐᓂᕐᓂᖅ ᖃᐅᔨᓴᖅᑕᐅᓯᒪᔪᓂᒃ ᐃᓄᐃᑦ ᐃᓕᖅᑯᓯᑐᖃᖏᑦᑎᒍᓪᓗ ᖃᐅᔨᒪᓂᕆᔭᐅᔪᓂᒃ ᐊᑐᖅᑕᐅᓂᐊᖅᑐᓂᒃ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᒃᑯᑦ ᐃᓱᒪᓕᐅᕈᑎᓄᑦ.

3.1 ᒥᕐᖑᐃᓯᕐᕕᒃᑯᑦ ᒪᓕᒐᑎᒍᑦ ᐊᐅᓚᑦᑎᓂᒃᑯᓪᓗ ᑐᕌᖓᓂᓖᑦ

ᒪᓕᒃᖢᒍ ᓄᓇᕗᒻᒥ ᐊᖏᕈᑎ, ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐊᒻᒪ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎ ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᖕᒧᑦ ᑲᓇᑕᒥ ᐱᐊᓂᒃᑕᐅᓚᐅᖅᑐᖅ ᐊᒻᒪ ᐊᑎᓕᐅᖅᑕᐅᓪᓗᓂ 2003-ᖑᑎᓪᓗᒍ. ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᒃ ᓴᓇᔭᐅᓚᐅᖅᑐᖅ 2014-ᖑᑎᓪᓗᒍ ᐱᖁᔭᑎᒍᑦ ᑲᓇᑕᒥ ᒥᕐᖑᐃᖅᓯᕐᕕᖕᓄᑦ ᒪᓕᒐᖓᑦᑎᒍᑦ, ᑭᓯᐊᓂ, ᒥᕐᖑᐃᖅᓯᕐᕕᒃ ᐊᐅᓚᓪᓂᖃᐅᓐᓇᖅᑐᖅ ᑕᐃᒪᖓᓂᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐊᒻᒪ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎ ᐊᑎᓕᐅᖅᑕᐅᓚᐅᖄᖅᑎᓪᓗᒍ. ᓄᓇᕗᒥ ᐊᖏᕈᑎ ᑐᑭᓕᐅᕆᓯᒪᔪᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐃᑲᔫᑎᖏᓐᓂᒃ ᐊᒻᒪᓗ ᓇᓗᓇᐃᔭᐃᓯᒪᑉᓗᓂ ᐱᓕᕆᖃᑎᒌᖕᓂᒃᑯᑦ ᐊᐅᓚᑦᑎᓂᐅᑉ ᐋᖅᑭᐅᒪᓂᕆᔭᕆᐊᖃᖅᑕᖓᓂᒃ ᑲᓇᑕᒥ ᒥᕐᖑᐃᓯᕐᕕᒋᔭᐅᔪᒃᑯᑦ ᓄᓇᕗᒥ. ᐱᓗᐊᖅᑐᒥ, ᑎᑎᕋᖅᓯᒪᔪᑦ ᐊᖏᕈᑎᒃᑯᑦ ᐃᓕᑕᖅᓯᓯᒪᖕᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᖑᓇᓱᒍᓐᓇᕐᓂᖏᓐᓄᑦ ᐆᒪᔪᓂᒃ, ᐅᒃᑯᓯᒃᓴᓂᒡᓗ ᓴᓇᙳᐊᒐᒃᓴᓂᒃ ᐱᔪᓐᓇᕐᓂᖏᓐᓄᑦ, ᓴᖅᑭᑦᑎᔪᓐᓇᕐᓂᖏᓐᓄᓪᓗ ᓄᓇᓕᕋᓛᕐᒥᒃ, ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᒋᔭᐅᔪᓄᑦ ᑎᑭᑦᑐᓐᓇᕐᓂᖏᓐᓄᑦ ᐊᑭᖃᙱᑦᑐᒃᑯᑦ.

ᓄᓇᕗᒥ ᐊᖏᕈᑎ (ᑎᑎᕋᖅᓯᒪᔪᖅ 8.4.11-8.4.14) ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᖅ (ᑎᑎᕋᖅᓯᒪᔪᖅ 6) ᑐᑭᓕᐅᕆᓯᒪᔪᖅ ᐱᓕᕆᖃᑎᒌᖕᓂᒃᑯᑦ ᐊᐅᓚᑦᑎᔭᕆᐊᖃᕐᓂᖏᓐᓄᑦ ᒥᕐᖑᐃᓯᕐᕕᒃᑯᑦ. ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ ᐱᓕᕆᖃᑎᒌᖕᓂᒃᑯᑦ ᐊᐅᓚᑦᑎᔨᐅᔪᑦ ᑲᑎᒪᔨᒋᔭᐅᑉᓗᑎᒃ ᒥᕐᖑᐃᓯᕐᕕᖕᒥ. ᒪᓕᒃᖢᒍ ᑎᑎᕋᖅᓯᒪᔪᖅ 5.5-ᒥ, ᐱᓕᕆᐊᒃᓴᕆᔭᐅᔪᖅ ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᓄᑦ ᐃᒪᓐᓈᖅᑐᖅᑎᐅᔪᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ, ᒥᓂᔅᑕᒧᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ, ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ, ᐊᒻᒪᓗ ᐊᓯᖏᓐᓄᑦ ᑎᒥᖁᑎᒋᔭᐅᔪᓄᑦ ᑕᒪᐃᓐᓄᑦ ᐊᒃᑐᐊᓂᓕᖕᓄᑦ ᐊᐅᓚᑦᑎᓂᐊᕐᓗᓂ ᒥᕐᖑᐃᓯᕐᕕᖕᒥ.

3.2 ᐱᒋᐊᕈᑎᒃᑯᑦ ᒥᕐᖑᐃᓯᕐᕕᐅᑉ ᐱᕙᓪᓕᐊᑎᑕᐅᓚᐅᕐᓂᖓ

ᑕᐃᒪᙵᓂ 2003ᒥ, ᐊᒥᓱᓂᒃ ᐱᓕᕆᐊᖃᖅᓯᒪᔪᑦ ᑐᙵᕕᖃᓕᖁᑉᓗᒋᑦ ᐊᐅᓚᑦᑎᓂᕐᒧᑦ. 2007ᒥ, ᑎᑎᕋᕐᕕᓕᐅᓚᐅᖅᑐᑦ ᐊᒻᒪᓗ ᓄᓇᒃᑰᕈᑕᐅᓯᕝᕕᖕᒥᒃ ᐊᒻᒪᓗ ᓴᓇᔩᑦ ᐃᒡᓗᑖᖅᑎᑕᐅᑉᓗᑎᒃ ᓇᐅᔮᓂ. ᐊᒻᒪᓗᑦᑕᐅᖅ, ᑲᔪᓯᑎᑦᑎᑦᑎᐊᖅᓯᒪᔪᑦ ᓴᓇᑎᑦᑎᓂᕐᒧᑦ ᐃᓄᖕᓂᒃ ᐊᐅᓚᑦᑎᔨᐅᓂᐊᖅᑐᓂᒃ ᒥᕐᖑᐃᓯᕐᕕᖕᒥ. ᖃᑉᓯᑲᓪᓚᑦ ᓴᓇᔩᑦ ᐊᒃᑐᐊᓂᖃᑦᑎᐊᖅᑐᑦ, ᑕᐃᑉᓱᒪᓂᑐᖃᕐᒥᓗ ᐊᒃᑐᐊᓂᖃᖅᖢᑎᒃ ᒥᕐᖑᐃᓯᕐᕕᖕᒧᑦ, ᐊᑕᐅᓯᖅ ᓴᓇᔨᒋᔭᐅᔪᖅ ᑕᐃᑲᓂ ᐃᓅᓚᐅᖅᓯᒪᑉᓗᓂ. ᖃᑉᓯᑲᓪᓚᖕᓂᒃ ᐱᓕᕆᐊᖃᖅᓯᒪᔪᑦ ᒥᕐᖑᐃᓯᕐᕕᖕᒥ ᓲᕐᓗ ᓴᓗᒻᒪᖅᓴᐃᑎᑦᑎᒋᐊᕐᓂᖅ ᐊᒻᒪᓗ ᑐᙵᕕᖃᑦᑎᐊᓕᕈᓐᓇᖁᑉᓗᒋᑦ ᐃᒡᓗᕐᔪᐊᑦ ᓲᕐᓗ ᓂᐅᕕᕐᕕᐅᓚᐅᖅᑐᖅ ᑕᓯᐅᔭᖕᒥ ᐊᒻᒪᓗ ᐱᐊᓂᒃᓯᓯᒪᑉᓗᑎᒃ ᓯᕗᓪᓕᖅᐹᒥ ᐅᑭᐅᒥ ᑕᒪᓐᓇ ᐱᓕᕆᐊᖑᓂᐊᖅᑎᓪᓗᒍ ᒪᕐᕉᖕᓂᒃ ᐅᑭᐅᓂᒃ ᑲᑎᑦᑎᓂᕐᒧᑦ ᖃᐅᔨᓴᐃᓂᕐᒧᑦ ᑐᑭᓯᒋᐊᕈᑎᓂᒃ ᑎᑎᕋᖅᓯᒪᔪᓂᒃ ᐅᒃᑯᓯᒃᓴᓕᐅᑉ ᒥᒃᓵᓄᑦ. ᒪᑐᐃᖅᑕᐅᓚᐅᖅᑐᖅ ᒥᕐᖑᐃᓯᕐᕕᒃ ᔪᓚᐃ 2015ᒥ ᑕᐃᑲᓂᑦᑕᐃᓐᓇᖅ ᓇᐅᔮᑦ Hᐊᒻᓚᖓ ᓄᓇᓕᐅᑉ ᑕᐃᒎᓯᖓᓂᒃ ᐊᑐᓕᖅᑎᑦᑎᓚᐅᖅᑎᓪᓗᒍ ᐊᑎᑐᖃᖓᓄᑦ. ᐊᒻᒪᓗ 2017ᒥ ᓯᕗᓪᓕᖅᐹᒥ ᐱᓕᕆᖃᑎᒌᖕᓂᒃᑯᑦ ᕿᒥᕐᕈᓂᖃᓚᐅᖅᑐᑦ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᕐᒥᒃ ᐅᒃᑯᓯᒃᓴᓕᖕᒧᑦ ᐱᐊᓂᒃᑕᐅᑉᓗᓂᓗ ᐊᒻᒪᓗ ᓴᖅᑭᑦᑐᑦ ᕿᒥᕐᕈᓂᐅᔪᒥ ᐃᓱᒪᒃᓴᖅᓯᐅᕈᑕᐅᔪᑦ ᐱᕙᓪᓕᐊᑎᑦᑎᓂᕐᒧᑦ ᑖᑉᓱᒥᙵ ᐸᕐᓇᐅᑎᒥᒃ.

3.3 ᐱᓕᕆᖃᑎᒌᖕᓂᕆᔭᐅᓲᑦ ᒥᕐᖑᐃᓯᕐᕕᐅᑉ ᖃᓂᒋᔭᖓᓃᑦᑐᓂᒃ ᓄᓇᓖᑦ ᐊᒻᒪᓗ ᐳᓚᕋᖅᑐᓕᕆᓂᒃᑯᑦ ᐱᕕᒃᓴᕆᔭᐅᔪᒃᑯᑦ

ᐃᓄᐃᑦ ᓴᙱᔪᐊᓗᒃᑯᑦ ᐊᒃᑐᐊᓂᓖᑦ ᓄᓇᒧᑦ ᐊᒻᒪᓗ ᐃᒪᕐᒥᐅᑕᓄᑦ ᓄᓇᒋᔭᖏᓐᓂᒃ. ᐃᓄᐃᑦ ᖃᒪᓂ’ᑐᐊᕐᒥᐅᑕᑦ, ᐃᒡᓗᓕᒑᕐᔪᖕᒥᐅᑕᑦ, ᓴᓪᓕᕐᒥᐅᑕᑦ, ᓇᐅᔮᕐᒥᐅᑕᑦ ᐊᒻᒪᓗ ᑲᖏᖅᖠᓂᕐᒥᐅᑕᑦ ᐃᖏᕐᕋᔭᐃᓐᓇᓲᑦ, ᑕᐃᑯᖓᓘᓐᓃᑦ ᒥᕐᖑᐃᓯᕐᕕᖕᒧᑦ. ᐃᓄᐃᑦ ᖃᐅᔨᒪᔭᑐᖃᖏᑦ ᐱᒻᒪᕆᐊᓗᐃᑦ ᑐᑭᓯᐅᒪᓂᐊᕐᓗᓂ ᒥᕐᖑᐃᓯᕐᕕᖕᒥᒃ ᓄᓇᖁᑎᒋᔭᐅᔪᒥᒃ ᐊᒻᒪᓗ ᖁᕝᕙᖅᑎᕆᓂᕐᒧᑦ ᐃᓄᐃᑦ ᐊᒃᑐᐊᓂᖃᕐᓂᕆᔭᖓᓄᑦ ᒥᕐᖑᐃᓯᕐᕕᒃᑯᑦ.

ᑲᖏᖅᖠᓂᖅ ᐊᖏᓂᖅᐹᖑᔪᖅ ᓄᓇᓕᖕᓂᒃ ᑭᕙᓪᓕᕐᒥ ᐊᒻᒪᓗ ᐃᖏᕐᕋᔪᓕᕆᓂᒃᑯᑦ ᓱᓇᑐᐃᓐᓇᕐᓄᓪᓗ ᑐᙵᕕᒋᔭᐅᕙᒃᖢᓂ. ᒐᕙᒪᓕᕆᓂᖅ ᑕᐃᒪᐅᑎᓪᓗᒍ ᑲᖏᖅᖠᓂᕐᒥ, ᐅᔭᕋᖕᓂᐊᖅᑐᓕᕆᓂᖅᑕᐅᖅ ᓴᖅᑭᔮᓪᓚᕆᒃᑐᖅ ᑲᖏᖅᖠᓂᕐᒥ ᐊᒻᒪᓗ ᑭᕙᓪᓕᓗᒃᑖᒥ, ᐃᓚᐅᖃᑕᐅᑉᓗᒋᑦ ᓄᓇᐃᑦ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ.

ᐃᓚᐅᖃᑕᐅᑉᓗᒍ ᑲᖏᕐᔪᐊᑉ ᑰᖓᓄᑦ ᐊᒻᒪᓗ ᓴᐅᓂᖅᑑᕐᓗ ᑰᒋᔭᕐᒧᑦ, ᒥᕐᖑᐃᓯᕐᕕᒃ ᐱᒻᒪᕆᐊᓗᒃᑯᑦ ᐳᓚᕋᖅᑎᓄᑦ ᑲᔾᔮᕆᔭᐅᓕᕈᓐᓇᖅᑐᖅ ᑭᕙᓪᓕᕐᒥ. ᓴᖅᑭᑎᑕᐅᖅᑳᖅᑎᓪᓗᒍ, ᒥᕐᖑᐃᓯᕐᕕᒃ ᖃᑉᓰᓐᓇᕐᓄ ᐅᐸᒃᑕᐅᓯᒪᔪᖅ ᐳᓚᕋᖅᑎᓄᑦ ᐱᔾᔪᑎᖃᖅᖢᓂ ᓲᕐᓗ ᐅᖓᓯᖕᓂᖓ, ᐳᓚᕋᕐᓂᖅ ᐅᑭᐅᑉ ᐃᓗᐊᓂ ᓇᐃᑦᑑᑎᓪᓗᒍ, ᐊᒻᒪᓗ ᐳᓚᕋᖅᑐᓕᕆᔩᑦ ᖃᑉᓰᓐᓇᐅᓗᐊᕐᓂᖏᓐᓄᑦ ᐱᖁᑎᕐᔪᐊᓪᓗ ᐊᒥᒐᕐᓂᖏᓐᓄᑦ ᓄᓇᓕᖕᓂ ᖃᓂᑦᑑᔪᓂᒃ ᒥᕐᖑᐃᓯᕐᕕᖕᒧᑦ. ᑐᔪᕐᒥᕕᐅᓚᐅᖅᑐᖅ ᐊᐅᓚᑕᐅᑉᓗᓂ, ᐅᒃᑯᓯᒃᓴᓕᐅᑉ ᓯᒡᔭᖓᓂᒃ ᐃᒻᒪᖄ 15ᓄᑦ ᐅᑭᐅᓄᑦ 1980 ᐃᓱᓕᑉᐸᓪᓕᐊᓕᖅᑎᓪᓗᒍ 2000 ᐱᒋᐊᕐᓂᖓᓄᑦ ᓄᓇᓂᒃ ᐊᑐᖅᑐᐊᖅᑕᐅᕗᓂᒃ ᐃᓄᓕᕆᔨᑐᖃᒃᑯᓐᓂᒃ ᐊᒻᒪᓗ ᑕᑯᔪᒥᓇᕆᔭᐅᓚᐅᖅᑐᖅ 100ᖏᓐᓃᑦᑐᓄᑦ ᐳᓚᕋᖅᑎᓄᑦ ᓄᓇᕐᔪᐊᕐᒥ ᓇᓂᑐᐃᓐᓇᕐᒥᙶᖅᑐᓂᒃ. ᑐᔪᕐᒥᕕᒃ ᐊᐅᓪᓛᕈᓐᓃᖅᑐᖅ ᖁᓕᓂᖅᑲᐃ ᐅᑭᐅᓂᒃ. ᑲᔪᓯᑎᑦᑎᔪᓐᓇᖁᑉᓗᒍ ᐊᑯᓂ ᓯᕗᓂᒃᓴᒥ ᐱᓕᕆᐊᖑᔪᒪᔪᒥᒃ ᐱᕙᓪᓕᐊᑎᑦᑎᓂᕐᒧᑦ ᐳᓚᕋᖅᑎᓂᒃ ᖃᐃᙱᓐᓇᖃᑦᑕᕐᓂᐊᖅᑐᓂᒃ, ᐊᒻᒪᓗ ᒪᓕᒃᑕᐅᔪᓐᓇᖁᑉᓗᒋᑦ ᐱᓕᕆᐊᖑᔭᕆᐊᓖᑦ ᑎᑎᕋᖅᓯᒪᔪᒃᑯᑦ 12.5ᑯᑦ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᒋᐊᖅᑎᑦᑎᓚᐅᖅᑐᑦ ᐳᓚᕋᖅᑐᓕᕆᓂᕐᒧᑦ ᖃᓄᖅᑑᕈᑎᒥᒃ ᐃᓚᕚᓪᓕᕈᓐᓇᖁᑉᓗᒍ ᐳᓚᕋᖃᑦᑕᕐᓂᖅ ᒥᕐᖑᐃᓯᕐᕕᖕᒧᑦ ᐊᒻᒪᓗ ᖁᕝᕙᖅᑎᕆᔪᒪᓂᕐᒧᑦ ᐃᑲᔫᑎᓂᒃ ᒥᕐᖑᐃᓯᕐᕕᖃᖅᑎᓪᓗᒍ ᐃᓄᖕᓄᑦ ᐃᓄᐃᓪᓗ ᓇᖕᒥᓂᖁᑎᖏᓐᓄᑦ ᓄᓇᓕᖕᓂᒃ ᒥᕐᖑᐃᓯᕐᕕᐅᑉ ᖃᓂᒋᔭᖏᑦ ᓄᓇᓕᖕᓂFootnote 6.

ᒥᕐᖑᐃᓯᕐᕕᐅᑉ ᐅᖓᓯᖕᓂᖓ ᐱᔾᔪᑎᒋᑉᓗᒍ, ᐊᑭᒋᔭᐅᔪᖅ ᐅᕐᓂᖕᓂᐊᕐᓗᒍ, ᐊᒻᒪᓗ ᐱᖁᑎᕐᔪᐊᖃᙱᓗᐊᕐᓂᖓ, ᖃᑉᓰᓐᓇᑦ ᐃᓄᓪᓚᑦᑖᖑᙱᑦᑐᑦ ᐳᓚᕋᓲᑦ ᒥᕐᖑᐃᓯᕐᕕᖕᒧᑦ. ᒫᓐᓇᐅᔪᖅ ᒥᕐᖑᐃᓯᕐᕕᐅᑉ ᐳᓚᕋᖅᑕᐅᖃᑦᑕᕐᓂᖓ ᐊᑦᑎᒃᑑᔪᖅ, 7ᖑᑉᓗᑎᒃ ᐳᓚᕋᖅᓯᒪᔪᑦ ᑕᐃᒪᙵᓂ 2014-2015ᒥ ᑮᓇᐅᔭᖃᕐᓇᐅᓚᐅᖅᑐᒥ. ᐅᒥᐊᕐᔪᐊᕌᓗᐃᑦ ᐳᓚᕋᖃᑦᑕᕐᓂᖏᑦ ᓄᓇᕗᒧᑦ ᐃᓚᕙᓪᓕᐊᓯᒪᔪᒻᒪᕆᐊᓗᐃᑦ ᑕᐃᒪᙵᓂ 2006ᒥ ᐊᒻᒪᓗ ᖃᐅᔨᓴᕈᑕᐅᓯᒪᔪᑦ ᓇᓗᓇᐃᖅᓯᓯᒪᔪᑦ ᐃᓚᕙᓪᓕᐊᖏᓐᓇᕐᓂᐊᕐᓂᖏᓐᓄᑦ, ᑭᓯᐊᓂᓕ, ᐅᒃᑯᓯᒃᓴᓕᒃ ᐊᒻᒪᓗ ᒥᕐᖑᐃᓯᕐᕕᒃ ᓇᓗᓇᐃᖅᑕᐅᓯᒪᙱᑦᑐᑦ ᐱᔫᒥᒋᔭᐅᓯᒪᓂᖏᓐᓄᑦ ᐳᓚᕋᖅᑎᓄᑦ. ᐃᓱᒫᓘᑕᐅᓯᒪᔪᑦ ᓴᖅᑭᑎᑕᐅᖃᑦᑕᖅᓯᒪᔪᑦ ᐅᒥᐊᕐᔪᐊᕌᓗᐃᑦ ᒥᒃᓵᓄᑦ ᓈᒻᒪᒃᓴᙱᖃᑦᑕᕐᒪᑕ ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ ᐅᓗᕆᐊᓇᖅᑐᑦ ᐱᔾᔪᑎᒋᑉᓗᒋᑦ ᐅᒃᑯᓯᒃᓴᓕᒃᑰᖅᖢᓂ ᐊᒻᒪᓗ ᐸᒡᕕᓵᕆᔪᓐᓇᕐᓂᖏᓐᓄᑦ ᐃᓄᖕᓂᒃ, ᐊᖑᓇᓱᒃᑎᓪᓗᒋᑦ, ᐊᒻᒪᓗ ᐸᒡᕕᓵᕆᔪᓐᓇᕐᓂᖏᓐᓄᑦ ᐆᒪᔪᓂᒃ, ᓇᓄᕐᓂᒡᓗ ᐊᒻᒪᓗ ᐃᒪᕐᒥᐅᑕᓂᒃ. ᐃᓚᐅᖃᑕᐅᑉᓗᒋᑦ ᐅᒥᐊᕆᔭᐅᕙᒃᑐᑦ ᐊᓄᕆᒧᑦ ᐊᐅᓚᑕᐅᔪᑦ, ᐅᒥᐊᕐᔪᐊᕆᔭᐅᓲᑦ, ᐊᒻᒪᓗ ᐅᒥᐊᕐᔪᐊᕌᓗᐃᑦ ᐳᓚᕋᖅᑎᓂᒃ ᓇᒃᓴᓲᑦ ᓇᓗᓇᐃᖅᓯᓯᒪᑉᓗᑎᒃ ᑮᓇᐅᔾᔭᒃᓴᕈᑕᐅᔪᓐᓇᕐᓂᖏᓐᓄᑦ, ᑭᓯᐊᓂᓕ ᐅᒃᑯᓯᒃᓴᓕᒃ ᐊᒻᒪᓗ ᒥᕐᖑᐃᓯᕐᕕᒃ ᐃᓱᒪᒋᔭᐅᑐᐃᓐᓇᖃᑦᑕᕐᓂᐊᖅᑐᒃᓴᐅᔪᖅ ᑕᑯᔭᐅᔪᒪᓇᔭᕐᓂᖓᓄᑦ ᑭᓯᐊᓂ ᐅᒥᐊᕐᔪᐊᒃᑯᑦ ᑐᑭᓯᒋᐊᕈᑎᒃᓴᑦ ᒥᕐᖑᐃᓯᕐᕕᐅᑉ ᒥᒃᓵᓄᑦ ᐊᑐᐃᓐᓇᕈᖅᑎᑕᐅᒃᐸᑕ ᐅᒥᐊᕐᔪᐊᕐᒥᐅᑕᓄᑦ.

ᐳᓚᕋᖅᑏᑦ ᑎᑭᑦᑐᓐᓇᕐᓂᖏᑦ ᑎᖕᒥᓲᒃᑯᑦ ᐊᑐᖅᑕᐅᖃᑦᑕᖅᓯᒪᔪᖅ, ᑭᓯᐊᓂ ᐱᒻᒪᕆᐊᓗᒃᑯᑦ ᐃᓚᒋᐊᕈᓐᓇᖅᑐᖅ ᐳᓚᕋᖅᑐᓕᕆᔾᔪᑎ, ᐱᓗᐊᖅᑐᒥ ᓯᑯ ᓯᖁᑉᑎᖅᐸᓪᓕᐊᓕᖅᑎᓪᓗᒍ ᐅᖓᑖᒍᒃᑲᓐᓂᖅ ᐅᓯᔪᓐᓇᐃᓪᓕᓯᒪᑎᓪᓗᒋᑦ.

ᐳᓚᕋᕐᕕᒃ ᐱᑕᖃᖅᑐᖅ ᒥᐊᓂᖅᓯᔾᔪᑎᓂᒃ ᐆᒪᔪᓄᑦ ᐊᒻᒪᓗ ᓄᓇᒧᑦ, ᑭᓯᐊᓂ ᐊᒥᓱᑦ ᐅᑭᐅᖅᑕᖅᑐᒥ ᐆᒪᔪᑦ ᓲᕐᓗ ᑐᒃᑐᐃᑦ, ᓇᓄᐃᑦ, ᑎᖕᒥᐊᑦ, ᐊᒻᒪᓗ ᐳᐃᔩᑦ ᓇᓂᑐᐃᓐᓈᖃᑦᑕᕐᒪᑕ ᒥᕐᖑᐃᓯᕐᕕᐅᑉ ᓯᓚᑖᓂᓗ ᐊᒻᒪᓗ ᐃᓛᒃᑰᙱᖦᖢᑎᒃ ᓄᓇᕐᔪᐊᕐᒥᐅᑕᓂᒃ. ᑕᒪᒃᑯᐊ ᓄᓇᕐᔪᐊᕐᒥᐅᑕᑦ ᐊᓯᔾᔩᓯᒪᔪᑦ ᐅᑭᐅᖅᑕᖅᑐᓕᒫᒥᒃ ᐊᒻᒪᓗ ᐊᒃᑐᖅᓯᓯᒪᔪᑦ ᐃᓄᐃᑦ ᐃᓅᓯᖏᓐᓂᒃ ᑕᐃᑲᓂ ᓄᓇᖃᖅᑐᓂᒃ. ᓄᓇᒥᒃ ᑲᐅᔨᓴᕈᑎ ᑕᐃᒪᐅᔪᖅ ᓇᓗᓇᐃᔭᐃᔾᔪᑎ ᐊᓯᔾᔨᖅᓯᒪᔪᓂᒃ ᓱᓕᔪᒃᑯᑦ ᒥᕐᖑᐃᓯᕐᕕᐅᑉ ᐃᓗᓕᖏᓐᓂᒃ ᓴᖅᑭᑎᑦᑎᔪᓐᓇᖅᑐᑦ.

4.0 ᑕᐅᑐᕐᕉᖅᑕᖅ

ᑕᐅᑐᕐᕉᖅᑕᐅᓂᖓ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᐅᑉ ᓴᖅᑭᑎᑕᐅᓚᐅᖅᑐᖅ ᑲᑎᒪᔪᓂᒃ ᐃᓚᐅᖃᑕᐅᑉᓗᑎᒃ ᑲᑎᒪᔨᒋᔭᐅᔪᑦ ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ, ᒥᕐᖑᐃᓯᕐᕕᖕᒥ ᐸᕐᓇᐃᓂᕐᒧᑦ ᐱᓕᕆᖃᑎᒌᒃᑐᓄᑦ, ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᓴᓇᔨᖏᑦ. ᑕᐅᑐᕐᕉᖅᑕᐅᔪᖅ ᑖᒻᓇᐅᔪᖅ ᖃᓄᐃᑦᑑᖁᔭᐅᓂᖓ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᐅᑉ 15ᓂᒃ 20ᓄᑦ ᐅᑭᐅᓂᒃ ᖃᐃᔪᓂᒃ.

ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ ᓄᓇᖓ ᐆᒪᔪᐊᓗᒃ ᐅᓂᑉᑳᖅᑐᐊᓪᓗ ᑕᐃᒪᐅᔪᑦ ᐃᓄᖕᓂᙶᖅᑐᑦ ᑕᐃᒪᙵᓂ, ᐆᒪᔪᓕᒻᒪᕆᐊᓗᒃ, ᐊᒻᒪᓗ ᑲᔾᔮᕐᓇᖅᑐᒻᒪᕆᐊᓗᒃ ᑕᐅᑦᑐᖓ. ᒥᕐᖑᐃᓯᕐᕕᒃ ᐱᐅᔪᒻᒪᕆᐊᓗᒃ ᑕᐅᑐᕐᕉᕐᓇᖅᓯᕙᒃᑐᖅ, ᐃᓗᒃᑯᑦ ᐃᖢᐊᖅᓯᓐᓇᖅᑐᖅ, ᑎᒥᒃᑯᓪᓗ ᐃᖢᐊᖅᓯᓐᓇᖅᑐᖅ. ᐃᓗᐃᑦᑐᒃᑯᑦ ᒥᕐᖑᐃᓯᕐᕕᖕᒦᓐᓂᖃᖅᖢᓂ ᑕᐅᕗᙵᓗᒃᑖᖅ ᐃᖅᑲᐅᒪᐃᓐᓇᕐᓇᓕᓲᖅ, ᐊᒃᑐᐊᓂᖃᓕᖅᖢᓂ ᓄᓇᒧᑦ ᐃᓗᓕᖃᙱᑦᑐᐊᓗᒃᑎᑐᑦ ᐃᓱᒪᒋᔭᐅᔪᓐᓇᙱᑦᑐᒃᑯᑦ ᐊᒻᒪᓗ ᐃᓄᑑᔪᒪᓕᖅᖢᓂ ᐅᐸᒍᑎᔪᒪᓐᓇᖅᑐᖅ.

ᐅᒃᑯᓯᒃᓴᓕᒃ ᐱᓕᕆᓐᓇᐃᓐᓇᕐᓂᐊᖅᑐᖅ ᐃᓄᐃᑦ ᐃᓕᖅᑯᓯᑐᖃᖏᑦᑎᒍᑦ: ᑕᐃᑉᓱᒪᓂ, ᐅᑉᓗᒥ ᐊᒻᒪᓗ ᓯᕗᓂᒃᓴᒥ ᖃᐅᔨᒪᓂᕆᔭᐅᔪᒃᑯᑦ, ᐃᓕᑦᑎᕝᕕᒋᓐᓇᖅᑐᖅ ᐊᒻᒪᓗ ᐱᒻᒪᕆᐊᓗᒃ, ᐃᒪᓐᓇ ᑐᑭᖃᖅᑐᖅ “ᐃᓄᐃᑦ ᖃᐅᔨᒪᔭᑐᖃᖏᑦ” ᒥᐊᓂᕆᔭᐅᔪᑦ, ᖁᕝᕙᖅᑎᖅᑕᐅᔪᑦ, ᐊᒻᒪᓗ ᑭᖑᕚᑉᑎᓐᓄᑦ ᑐᓂᕐᕈᑕᐅᕙᓪᓕᐊᔪᑦ. ᐃᓚᒌᒃ ᓴᙱᒃᑎᑉᐹᓪᓕᓲᑦ ᐊᒃᑐᐊᓂᖃᕐᓂᖏᓐᓄᑦ ᓄᓇᒧᑦ. ᐃᓄᐃᑦ ᐃᓐᓇᑐᖃᐃᑦ ᐅᖃᖃᑎᖃᓲᑦ ᐊᔪᙱᓐᓂᕆᔭᖏᑦ ᐃᓕᑕᐅᔪᓐᓇᖁᑉᓗᒋᑦ ᓯᕗᓪᓕᕕᓂᕐᒥᙶᖅᑐᑦ. ᐅᓂᑉᑳᖅᑐᐊᑦ ᓴᖅᑭᑎᑕᐅᒃᑲᓐᓂᓲᑦ ᐊᒻᒪᓗ ᑐᓂᕐᕈᑕᐅᑉᓗᑎᒃ ᒪᒃᑯᒃᑐᓄᑦ ᑕᐃᒪᓐᓇ ᑕᐃᑉᓱᒪᓂᑐᖄᓗᒃ ᑐᓂᕐᕈᑕᐅᖃᑦᑕᖅᓯᒪᓕᕐᒪᑕ.

ᐅᒃᑯᓯᒃᓴᓕᒃ ᐊᐅᓚᑕᐅᖏᓐᓇᕐᓂᐊᖅᑐᖅ ᐱᓕᕆᖃᑎᒌᖕᓂᒃᑯᑦ ᐃᓄᖕᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ. ᐊᐅᓚᑕᐅᓂᖓ ᑐᙵᕕᖃᕐᓂᐊᖅᑐᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᖃᐅᔨᓴᕈᑕᐅᕙᒃᑐᓄᑦ ᖁᕝᕙᖅᑎᕆᓂᕐᒧᑦ ᓄᓇᓕᕆᓂᒃᑯᑦ ᓱᓕᔪᓂᒃ ᐃᓚᐅᖃᑕᐅᑉᓗᒍ ᓈᒻᒪᑦᑎᐊᕆᐊᖃᕐᓂᖏᑦ ᐆᒪᔪᑦ ᓅᑉᐸᓪᓕᐊᔪᓐᓇᖁᑉᓗᒋᑦ ᓇᐅᒃᑰᕐᕕᒋᕙᒃᑕᖏᑦᑎᒍᑦ. ᐱᕈᖅᑐᓪᓗ ᓂᕿᒋᔭᐅᓲᑦ ᐃᖢᐊᖅᓴᐅᑎᒋᔭᐅᓲᓪᓗ ᐊᒥᒐᔾᔮᙱᑦᑐᑦ. ᐅᒃᑯᓯᒃᓴᓕᒃ ᖃᓄᐃᑦᑑᓂᕆᔭᕆᐊᖃᖅᑕᖓᓂᒃ ᒪᓕᑦᑎᐊᕐᓂᐊᖅᑐᖅ ᐅᑭᐅᖅᑕᖅᑐᒥ ᑲᔾᔮᕐᓇᕐᓂᖓᒍᑦ ᐊᒻᒪᓗ ᓱᓕᔪᒃᑯᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᓂᖓᓄᑦ ᖃᐅᔨᔭᐅᔪᓐᓇᖃᑦᑕᖁᑉᓗᒍ ᐊᔾᔨᐅᙱᑦᑑᓂᖓ ᒫᓐᓇᐅᔪᖅ ᑕᐅᕗᙵᓗᒃᑖᕐᓗ.

5.0 ᖃᓄᖅᑑᕈᑕᐅᔪᒪᔪᑦ

ᐊᐅᓚᑦᑎᓂᐅᔪᖅ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒥ ᐱᖓᓲᓕᖓᔪᒃᑯᑦ ᖃᓄᖅᑑᕈᑕᐅᓯᒪᔪᖅ, ᐊᑐᓂ ᐱᓕᕆᐊᒃᓴᖃᖅᖢᑎᒃ ᑐᕌᒐᖃᖅᖢᑎᒡᓗ. ᐱᓕᕆᐊᒃᓴᕆᔭᐅᔪᑦ ᐃᑲᔪᖅᑑᑕᐅᔪᑦ ᐊᒻᒪᓗ ᑐᕌᖓᓂᖃᖅᑐᑦ ᓄᑖᖑᔪᖅ ᑲᓇᑕᒥ ᒥᕐᖑᐃᓯᕐᕕᒃ ᖃᐅᔨᒪᔭᐅᓂᖅᓴᐅᓕᖁᑉᓗᒍ, ᐱᒻᒪᕆᐅᑎᑕᐅᖁᑉᓗᒍ, ᐊᒻᒪᓗ ᖁᕕᐊᒋᔭᐅᖁᑉᓗᒍ ᑲᓇᑕᒥᐅᓄᑦ ᐊᒻᒪᓗ ᐳᓚᕋᖅᑎᓄᑦ ᓇᑭᑐᐃᓐᓇᑦᑎᐊᖅ ᓄᓇᕐᔪᐊᕐᒥᙶᖅᑐᓄᑦ ᐱᓕᕆᖃᑎᖃᖅᐸᓪᓕᐊᑉᓗᑎᒡᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᐊᒻᒪᓗ ᐃᓄᖕᓂᒃ ᖃᒪᓂ’ᑐᐊᕐᒥ, ᐃᒡᓗᓕᒑᕐᔪᖕᒥ, ᓴᓪᓕᓂ, ᓇᐅᔮᓂ ᐊᒻᒪᓗ ᑲᖏᖅᖠᓂᕐᒥ.

ᖃᓄᖅᑑᕈᑕᐅᓇᓱᒃᑐᖅ 1:

ᐱᖁᑎᕐᔪᐊᓕᕆᓂᖅ – ᐱᖁᑎᕐᔪᐊᑦ ᐊᑐᖅᑕᐅᔭᕆᐊᓖᑦ ᐊᑐᐃᓐᓇᐅᖁᑉᓗᒋᑦ ᒥᐊᓂᖅᓯᓂᕐᒧᑦ, ᓴᕿᑎᑦᑎᓯᒪᓂᖕᒧᑦ, ᐊᒻᒪ ᖁᕝᕙᖅᑎᕆᓂᕐᒧᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᑲᓇᑕᒥ

ᐅᒃᑯᓯᒃᓴᓕᒃ ᐱᐅᔪᒻᒪᕆᐊᓗᖕᒥᒃ, ᐳᐃᒍᕐᓇᙱᑦᑐᒥᒃ ᓄᓇᒦᑦᑐᖅ. ᓇᓄᖃᓪᓚᕆᖕᓂᖓ ᐊᒻᒪᓗ ᓯᓚᐅᑉ ᓂᒡᓕᓇᖃᑦᑕᕐᓂᖓ ᑕᐅᕙᓂ ᓇᓗᓇᐃᔭᐅᑕᐅᔪᑦ ᑕᐃᑲᓂ ᐳᓚᕋᖅᑐᑦ ᐅᕝᕙᓘᓐᓃᑦ ᓴᓇᔪᑦ ᒥᕐᖑᐃᓯᕐᕕᖕᒥ ᐃᒡᓗᕐᔪᐊᕐᒦ ᑐᔪᕐᒥᕝᕕᖃᑦᑎᐊᕆᐊᖃᕐᓂᖏᓐᓄᑦ ᐱᓕᕆᕝᕕᖃᑦᑎᐊᕆᐊᖃᕐᓂᖏᓐᓄᑦ. ᐊᒻᒪᓗᑦᑕᐅᖅ, ᐅᖓᓯᒃᑑᓂᖓᓄᑦ ᒥᕐᖑᐃᓯᕐᕕᒃ ᓴᓇᔩᑦ ᐊᐅᓚᑦᑎᔾᔪᑎᖏᑦ ᓇᓗᓇᐃᔭᑦᑎᐊᖅᓯᒪᔭᕆᐊᖃᖃᑦᑕᖅᑐᑦ ᐱᓕᕆᐊᒥᓂᒃ ᐱᐊᓂᒃᓯᑦᑎᐊᖃᑦᑕᕈᓐᓇᖁᑉᓗᒋᑦ. ᐊᑐᓕᖅᑎᕆᓂᕐᒧᑦ ᑕᒪᑐᒥᙵ ᐊᐅᓚᑦᑎᓂᕐᒧᑦ ᖃᓄᖅᑑᕈᑎᒥᒃ, ᐱᓕᕆᕝᕖᑦ ᐃᒡᓗᕐᔪᐊᑦ ᑎᑎᕋᐅᔭᖅᓯᒪᓂᐊᖅᑐᑦ ᐊᒻᒪᓗ ᓴᓇᓯᒪᓂᐊᖅᑐᑦ ᐅᕝᕙᓘᓐᓃᑦ ᐋᖅᑭᒃᓱᑦᑎᐊᖅᓯᒪᓂᐊᖅᑐᑦ ᐊᑐᖅᑕᐅᔪᓐᓇᖃᑦᑕᖁᑉᓗᒋᑦ ᐊᔾᔨᒌᙱᑦᑑᑕᐅᔪᓄᑦ ᑎᒥᖁᑎᒋᔭᐅᔪᓄᑦ ᐊᒻᒪᓗ ᐊᑦᑕᓇᖅᑐᒦᖃᑦᑕᖁᓇᒋᑦ.

ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᓇᖕᒥᓂᖃᖅᑎᐅᔪᓂᒃ ᐊᒻᒪᓗ ᐱᓕᕆᖃᑎᒋᖃᑦᑕᖅᑕᒥᓂᒃ ᑎᑎᕋᐅᔭᕈᓐᓇᖁᑉᓗᒋᑦ ᐊᒻᒪᓗ ᓴᓇᔪᓐᓇᖁᑉᓗᒋᑦ ᐋᖅᑭᐅᒪᑦᑎᐊᖅᑐᒥᒃ ᐱᓕᕆᕝᕕᖕᓂᒃ ᐃᒡᓗᕐᔪᐊᓂᒃ ᐃᑲᔫᑖᐅᓂᐊᖅᑐᓂᒃ ᐃᓄᖕᓄᑦ, ᐳᓚᕋᖅᑎᓄᑦ, ᖃᐅᔨᓴᐃᔨᓄᑦ ᐊᒻᒪᓗ ᐊᓯᖏᓐᓄᑦ ᑎᒥᖁᑎᒋᔭᐅᔪᓄᑦ, ᐊᒻᒪᓗ ᒥᕐᖑᐃᓯᕐᕕᖕᒥ ᓴᓇᔪᓄᑦ ᐊᒃᑐᖅᓯᓗᐊᖅᑕᓕᓇᓱᒡᓗᑎᒡᓗ ᓄᓇᒥᒃ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐋᖅᑭᐅᒪᓂᕆᔭᐅᔪᓂᒃ. ᑐᖑᔾᔪᕆᒃᑐᓂᒃ ᐱᖁᑎᕐᔪᐊᓂᒃ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ.

ᖃᓄᖅᑑᕈᑕᐅᓇᓱᒃᑐᖅ ᐅᑯᓂᙵ ᑲᒪᓇᓱᒃᑐᖅ ᓯᕗᓪᓕᖅᐸᐅᑎᑕᐅᔪᒪᔪᓂᒃ ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐱᓕᕆᖃᖑᓇᓱᒃᑐᓂᒃ:

  • ᓴᓇᓂᖅ ᐃᒡᓗᕐᔪᐊᑦᑎᐊᕙᖕᓂᒃ ᓯᑎᔪᓂᒃ ᓴᓂᕋᓕᖕᓂᒃ ᐊᑦᑕᓇᖅᑐᒦᑎᑦᑎᖁᓇᑎᒃ ᑕᒪᐃᓐᓂᒃ ᒥᕐᖑᐃᓯᕐᕕᖕᒥ ᐊᑐᖃᑦᑕᖅᑐᓂᒃ (ᑎᑎᕋᖅᓯᒪᔪᖅ 10.1), ᐊᒻᒪᓗ
  • ᓴᓇᓂᖅ ᐊᒻᒪᓗ ᐊᑐᐃᓐᓇᐅᑎᑦᑎᓂᖅ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᒥᕐᖑᐃᓯᕐᕕᖕᒥ ᐳᓚᕋᖅᑎᓄᑦ ᐊᒻᒪᓗ ᐊᑐᖅᐸᒃᑐᓄᑦ ᓄᓇᓕᖕᓂ ᒥᕐᖑᐃᓯᕐᕕᐅᑉ ᖃᓂᒋᔭᖓᓃᑦᑐᓂᒃ (ᑎᑎᕋᖅᓯᒪᔪᖅ 9.3.5).

ᐱᓕᕆᐊᖑᔪᒪᔪᖅ 1.1:

ᐊᐅᓚᑦᑎᔾᔪᑏᑦ ᐊᒻᒪᓗ ᐃᒡᓗᕐᔪᐊᑦ ᓯᑎᔪᓂᒃ ᓴᓂᕋᓖᑦ ᐊᑐᐃᓐᓇᐅᔪᑦ ᒥᕐᖑᐃᓯᕐᕕᖕᒥ.

ᑐᕌᒐᕆᔭᐅᔪᑦ:

  • ᐸᕐᓇᐅᑎ ᓇᓗᓇᐃᔭᐃᔾᔪᑎ ᑕᐅᑐᕐᕉᖅᑕᐅᔪᒥᒃ ᐊᒻᒪᓗ ᐊᑐᖅᑕᐅᔭᕆᐊᓕᖕᓂᒃ ᐊᐅᓚᑦᑎᕕᒃᓴᒧᑦ ᒥᕐᖑᐃᓯᕐᕕᖕᒥ, ᓇᓗᓇᐃᔭᐃᓂᖅ ᐱᖁᑎᕐᔪᐊᓂᒃ ᐊᒻᒪᓗ ᐱᖁᑎᓂᒃ ᐱᔭᐅᔭᕆᐊᓕᖕᓂᒃ, ᐊᒻᒪᓗ ᐱᑕᖃᕆᐊᖃᕐᓂᖓᓄᑦ ᐃᒡᓗᕐᔪᐊᓂᒃ ᓯᑎᔪᓂᒃ ᓴᓂᕋᓕᖕᓂᒃ, ᑕᒪᒃᑯᐊ ᐱᐊᓂᒃᑕᐅᓯᒪᖁᑉᓗᒋᑦ ᒪᕐᕉᒃ ᐅᑭᐅᑦ ᐃᓗᐊᓂ.
  • ᐱᖁᑎᕐᔪᐊᓂᒃ ᓴᖅᑭᑎᑦᑎᔪᒪᓂᕐᒧᑦ ᐸᕐᓇᐅᑎ ᐊᑐᓕᖅᑎᖅᑕᐅᔪᓐᓇᕐᓗᓂ ᓯᑕᒪᑦ ᐅᑭᐅᑦ ᐃᓗᐊᓂ, ᑐᙵᕕᖃᕐᓗᑎᒃ ᓇᓃᓐᓂᐊᕐᓂᖓᓄᑦ, ᐊᖏᓂᖓᓄᑦ, ᐱᔭᕆᐊᑐᓂᖓᓄᑦ, ᐊᒻᒪᓗ ᖃᓄᐃᑦᑑᓂᐊᕐᓂᖏᓐᓄᑦ ᐱᖁᑎᕐᔪᐊᑦ.
  • ᓯᑎᔪᓂᒃ ᓴᓂᕋᓖᑦ ᐃᒡᓗᕐᔪᐊᑦ ᐊᑐᐃᓐᓇᐅᓗᑎᒃ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓄᑦ ᐊᒻᒪᓗ ᐳᓚᕋᖅᑎᓄᑦ 8 ᐅᑭᐅᑦ ᐃᓗᐊᓂ ᑐᙵᕕᖃᕐᓗᑎᒃ ᐊᖏᓂᖏᓐᓄᑦ, ᐱᔭᕆᐊᑐᓂᖏᓐᓄᑦ, ᐃᓚᐅᖃᑕᐅᔪᓐᓇᖁᑉᓗᒋᑦ ᑕᐃᑲᓃᓕᐊᓂᒃᑐᓄᑦ, ᐊᒻᒪᓗ ᖃᓄᐃᑦᑑᓂᐊᕐᓂᖏᓐᓄᑦ ᐱᓕᕆᕝᕖᑦ ᐃᒡᓗᕐᔪᐊᑦ. ᓯᕗᓪᓕᖅᐸᐅᑎᑕᐅᔪᒪᔪᑦ ᐃᓂᒋᔭᐅᓇᔭᖅᑐᑦ ᐅᑯᓂᙵ ᐃᓚᐅᖃᑕᐅᑎᑦᑎᔪᓐᓇᖅᑐᑦ, ᑭᓯᐊᓂ ᑖᑉᑯᐊᑐᐊᖑᙱᒃᑭᑉᓗᑎᒃ: ᓂᐅᕕᕐᕕᐅᓚᐅᖅᑑᑉ ᖃᓂᒋᔭᖓᓂᒃ, ᑲᖏᖅᖢᐊᕐᔪᖕᒥᒃ, ᓯᓚ ᑐᔪᕐᒥᕕᐅᑉ ᖃᓄᒋᔭᖓᓂᒃ ᐊᒻᒪᓗ ᐃᒡᓗᕐᔪᐊᕐᓇᐅᑉ ᐱᖓᖕᓇᖓᓂᒃ.

ᐱᓕᕆᐊᖑᔪᒪᔪᖅ 1.2:

ᓇᐅᒃᑰᕐᕖᑦ ᐊᒻᒪᓗ ᓄᕗᐃᑦ, ᑲᖏᖅᖢᐃᑦ ᐊᑦᑕᓇᖅᑐᒦᑦᑕᐃᓕᒪᔾᔪᑏᑦ, ᐃᒃᐱᒋᔭᐅᑦᑎᐊᕆᐊᓖᓪᓗ ᓄᓇᐃᑦ, ᐊᒻᒪᓗ ᐊᓯᖏᑦ ᓇᓗᓇᐃᔭᖅᑕᐅᓯᒪᔪᑦ ᐅᖃᐅᓯᐅᓯᒪᔪᓪᓗ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓄᑦ.

ᑐᕌᒐᕆᔭᐅᔪᑦ:

  • ᓇᐅᒃᑰᕐᕖᑦ, ᒥᕝᕖᑦ, ᑲᖏᖅᖢᐃᑦ ᐊᑦᑕᓇᖅᑐᒦᑦᑕᐃᓕᒪᔾᔪᑏᑦ, ᑐᐊᕕᕐᓇᖅᑐᓕᕆᕝᕖᑦ ᐅᖅᑯᐊᑦ, ᐱᖁᑎᓪᓗ ᐱᕈᔭᐅᓯᒪᕝᕕᖏᑦ, ᐃᒃᐱᒋᔭᐅᑦᑎᐊᕆᐊᓖᓪᓗ ᓄᓇᐃᑦ, ᐊᒻᒪᓗ ᐊᓯᖏᑦ ᐱᔫᒥᒋᔭᐅᔪᑦ ᓇᓗᓇᐃᔭᖅᑕᐅᓯᒪᓗᑎᒃ ᒪᕐᕉᒃ ᐅᑭᐅᑦ ᐃᓗᐊᓂ ᐃᑲᔫᑕᐅᖁᑉᓗᒋᑦ ᐳᓚᕋᖅᑎᓄᑦ ᖃᐅᔨᕙᓪᓕᐊᔪᓐᓇᖁᑉᓗᒋᑦ ᖃᓄᐃᑦᑐᒃᑰᕈᓐᓇᕐᒪᖔᑕ ᐊᒻᒪᓗ ᑎᑭᒃᑲᓐᓂᖃᑦᑕᖁᑉᓗᒋᑦ ᐊᒻᒪᓗᑦᑕᐅᖅ ᐃᓕᓐᓂᐊᕈᑕᐅᔪᓐᓇᖅᑐᒃᑯᑦ ᖁᕝᕙᖅᑎᕆᓂᒃᑯᓪᓗ. ᓄᑖᑦ ᑕᒪᑐᒧᙵ ᐊᒃᑐᐊᓂᓖᑦ ᑐᑭᓯᒋᐊᕈᑎᒃᓴᑦ ᐊᑐᓕᖅᑎᖅᑕᐅᓂᐊᖅᑐᑦ ᑖᑉᑯᑎᒎᓇᖅ ᐊᑐᖅᑐᒃᓴᓄᑦ ᐱᔭᕆᐊᖃᓕᕌᖓᑕ.
  • ᑕᑯᔭᒐᒃᓴᑦ ᐋᖅᑭᒃᓱᖅᑕᐅᓯᒪᔪᑦ ᖃᒪᓂ’ᑐᐊᕐᒥ, ᓇᐅᔮᓂ, ᐊᒻᒪᓗ ᑲᖏᖅᖠᓂᕐᒥ ᖁᕝᕙᖅᑎᖅᑕᐅᔪᓐᓇᖁᑉᓗᒍ ᒥᕐᖑᐃᓯᕐᕕᒃ, ᑐᓴᖅᑎᑦᑎᔪᒪᓂᕐᒧᓪᓗ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓂᒃ ᐊᒻᒪᓗ ᑐᑭᓕᐅᕆᔪᒪᓂᕐᒧᑦ ᐊᑐᖅᑕᐅᕙᒃᑐᓂᒃ ᒪᓕᒃᖢᑎᒃ ᑎᑎᕋᖅᓯᒪᔪᒥᒃ 9.3.5-ᒥ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ.

ᖃᓄᖅᑑᕈᑕᐅᓇᓱᒃᑐᖅ 2:

ᓄᓇ − ᓴᖏᒃᑎᑉᐸᓪᓕᐊᖁᑉᓗᒍ ᐃᓄᐃᑦ ᐊᒃᑐᐊᖓᓂᖓ ᐅᒃᑯᓯᒃᓴᓕᒃ ᒥᕐᖑᐃᖅᓯᕐᕕᖕᒧᑦ ᑲᓇᑕᒥ

ᐅᓇ ᖃᓄᐃᓕᐅᕈᑕᐅᔪᒪᔪᖅ ᐃᓕᑕᖅᓯᔾᔪᑕᐅᓇᓱᒃᑐᖅ ᑕᐃᑉᓱᒪᓂᑐᖃᕐᒥᒃ ᐊᒻᒪᓗ ᒫᓐᓇᐅᔪᖅ ᖃᓄᖅ ᐃᓄᐃᑦ ᐊᒃᑐᐊᓂᖃᖅᓯᒪᖕᒪᖔᑕ ᐅᒃᑯᓯᒃᓴᓕᖕᒧᑦ. ᑕᐃᓱᒪᓂᑐᖃᖅ ᐃᓄᐃᑦ ᐊᒃᑐᐊᓂᖃᓚᐅᕐᓂᖏᑦ ᐅᒃᑯᓯᒃᓴᓕᖕᒧᑦ ᐱᒻᒪᕆᐊᓗᒃ ᐅᓂᑉᑳᕐᓂᐊᕐᓗᓂ ᐅᒃᑯᓯᒃᓴᓕᐅᑉ ᒥᒃᓵᓄᑦ.

ᖃᓄᖅᑑᕈᑕᐅᔪᒪᔪᖅ ᐅᑯᓂᙵ ᓯᕗᓪᓕᖅᐸᐅᑎᑕᐅᔪᒪᔪᓂᒃ ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐱᓕᕆᐊᖑᔪᒪᔪᓂᒃ ᑲᒪᒋᐊᖅᓯᒪᔪᖅ:

  • ᓴᖅᑭᑎᑦᑎᔪᒪᓂᕐᒧᑦ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᖕᒥ ᐳᓚᕋᕐᓂᐊᕐᓗᓂ ᖃᐅᔨᔭᐅᖃᑦᑕᖅᓯᒪᔪᓂᒃ (ᑎᑎᕋᖅᓯᒪᔪᖅ 2.2.4, 2.8, 9, ᐊᒻᒪᓗ 10)
  • ᐃᒃᐱᒍᓱᑦᑎᐊᕆᐊᖃᕐᓂᕐᒥᒃ ᐃᓄᐃᑦ ᐊᖑᓇᓱᖕᓂᕆᕙᒃᑕᖏᓐᓂᒃ ᐊᒻᒪᓗ ᐃᓕᖅᑯᓯᑐᖃᑎᒍᑦ ᖃᓄᐃᓕᐅᕈᑎᒃᓴᓂᒃ ᐃᓱᒪᒋᓗᒋᓪᓗ ᐳᓚᕋᖅᑏᑦ ᖃᐅᔨᓂᕆᖃᑦᑕᖅᓯᒪᔭᖏᑦ (ᑎᑎᕋᖅᓯᒪᔪᖅ 1.1.2, ᐊᒻᒪᓗ ᑎᑎᕋᖅᓯᒪᔪᖅ 3)
  • ᖁᕝᕙᖅᑎᕆᓂᖅ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᖕᒥ ᑲᔾᔮᕐᓇᖅᑑᓂᖓᓄᑦ ᑭᕙᓪᓕᕐᒦ, ᓄᓇᕗᒥ, ᐊᒻᒪᓗ ᑲᓇᑕᓗᒃᑖᒥ (ᑎᑎᕋᖅᓯᒪᔪᖅ 9)

ᐱᓕᕆᐊᖑᔪᒪᔪᖅ 2.1:

ᐃᓄᐃᑦ ᐊᒃᑐᐊᓂᖃᖅᑎᓪᓗᒋᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᖕᒧᑦ ᓴᙱᒃᑎᑉᐹᓪᓕᖁᑉᓗᒋᑦ ᐊᒻᒪᓗ ᐅᖃᖃᑎᒌᒍᑕᐅᖃᑦᑕᖁᑉᓗᒋᑦ.

ᑐᕌᒐᕆᔭᐅᔪᑦ:

  • ᑐᓴᖅᑎᑦᑎᒋᐊᒃᑲᓐᓂᕈᒪᖃᑦᑕᕐᓂᖅ ᒪᕐᕉᖕᓂᒃ ᓄᓇᓕᖕᓂ ᐊᕐᕌᒍᑕᒫᒃᑯᑦ.
  • ᓴᖅᑭᑎᑦᑎᓗᑎᒃ ᐱᕕᒃᓴᕆᔭᐅᔪᓂᒃ ᐃᓄᖕᓄᑦ ᐊᑐᕈᓐᓇᖃᑦᑕᕐᓂᐊᕐᒪᑕ ᒥᕐᖑᐃᓯᕐᕕᖕᒥ ᐊᒻᒪᓗ ᐅᖃᖃᑎᒌᒃᐸᒡᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦᑕ ᒥᒃᓵᓄᑦ.
  • ᓴᖅᑭᑎᑦᑎᓗᑎᒃ ᐃᑲᔪᕆᐊᕈᑎᓂᒃ ᑐᓴᐅᒪᑎᑦᑎᔪᒪᓂᕐᒧᑦ ᐅᕝᕙᓘᓐᓃᑦ ᐊᑐᖅᑕᐅᔪᓐᓇᖅᑐᓂᒃ ᓄᓇᐃᑦ ᒥᐊᓂᕆᔭᐅᑦᑎᐊᖃᑦᑕᖁᑉᓗᒋᑦ ᓄᓇᓕᖕᓂ ᒥᕐᖑᐃᓯᕐᕕᐅᑉ ᖃᓂᒋᔮᓃᑦᑐᓂᒃ.
  • ᓴᖅᑭᑎᑦᑎᕙᒡᓗᑎᒃ ᐊᑕᐅᓯᕐᒥᒡᓘᓐᓃᑦ ᐃᓕᓐᓂᐊᖅᑐᒧᑦ ᐃᓂᒃᓴᒥᒃ ᐅᑭᐅᑉ ᐃᓗᐊᓂ ᐊᒻᒪᓗ ᓴᓇᕝᕕᐅᖃᑦᑕᕐᓗᓂ ᐊᕐᕌᒍᑕᒫᒃᑯᑦ ᐃᓕᓐᓂᐊᖅᑐᒧᑦ ᓄᓇᓕᖕᒥᙶᖅᑐᒥᒃ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ.
  • ᓴᙱᒃᑎᑉᐹᓪᓕᕋᓱᒡᓗᒍ ᐅᒃᑯᓯᒃᓴᓕᖕᒥ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ ᐱᓕᕆᐊᕆᕙᒃᑕᖏᑦ ᐃᑲᔪᕆᐊᖅᑎᐅᓗᑎᒃ ᐃᓕᓐᓂᐊᖅᑎᑦᑎᕙᒡᓗᑎᒡᓗ ᐊᑐᓂ ᑲᑎᒪᔨᐅᓂᖏᑦ ᒪᓕᒡᓗᒋᑦ.
  • ᓴᖅᑭᑎᑦᑎᓯᒪᓗᑎᒃ ᐊᕐᕌᒍᑕᒫᒃᑯᑦ ᒥᕐᖑᐃᓯᕐᕕᖕᒥ ᖃᐅᔨᓴᖅᑎᐅᓂᐊᖅᑐᒥ ᐊᒻᒪᓗ ᐱᖁᑎᒋᔭᐅᔪᑦ ᖃᓄᐃᓕᖓᓕᕐᒪᖔᑕ ᖃᐅᔨᓴᖅᑎᒥᒃ ᐱᓕᕆᐊᒃᓴᕆᔭᖏᑦ ᓇᓗᓇᐃᔭᖅᑕᐅᓯᒪᓗᑎᒃ ᐅᑭᐅᕐᒥ ᐊᑕᐅᓯᕐᒥ, ᐊᒻᒪ ᓯᕗᓪᓕᖅᐹᖅ ᖃᐅᔨᓴᐃᓂᖅ ᐊᑐᓕᖅᑎᖅᑕᐅᓗᓂ ᐅᐱᕐᖔᒃᑯᑦ ᐊᖏᖅᑕᐅᖅᑳᖅᑎᓪᓗᒍ ᐸᕐᓇᐅᑎ.

ᐱᓕᕆᐊᖑᔪᒪᔪᖅ 2.2:

ᐱᕕᒃᓴᕆᔭᐅᔪᑦ ᒥᕐᖑᐃᓯᕐᕕᖕᒥ ᐳᓚᕋᖅᑐᓄᑦ ᖃᐅᔨᔪᓐᓇᖁᑉᓗᒋᑦ ᓄᓇᒥ ᐊᒻᒪᓗ ᑐᓵᔪᓐᓇᖁᑉᓗᒋᑦ ᐅᓂᑉᑳᖅᑐᐊᓂᒃ ᐅᒃᑯᓯᒃᓴᓕᐅᑉ ᒥᕐᖑᐃᓯᕐᕕᐅᑉ ᒥᒃᓵᓄᑦ.

ᑐᕌᒐᕆᔭᐅᔪᑦ:

  • ᑐᑭᓯᑎᑦᑎᒋᐊᕈᑏᑦ ᐅᕝᕙᓘᓐᓃᑦ ᖃᐅᔨᔭᐅᖃᑦᑕᖅᓯᒪᔪᑦ ᓴᖅᑭᑎᑕᐅᓗᑎᒃ ᐅᓂᑉᑳᕈᓐᓇᖁᑉᓗᒋᑦ ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᐅᑉ ᒥᒃᓵᓄᑦ ᐱᒻᒪᕆᐅᔪᓂᒡᓗ ᐃᓕᖅᑯᓯᑐᖃᑎᒍᑦ ᐃᓂᒋᔭᐅᖃᑦᑕᖅᓯᒪᔪᓂᒃ ᐅᑯᐊ ᐃᓚᐅᖃᑕᐅᓗᒋᑦ ᑖᑉᑯᐊᑐᐊᖑᙱᓪᓗᒋᓪᓗ ᓲᕐᓗ ᓂᐅᕕᕐᕕᕕᓂᖅ, ᐊᒻᒪᓗ ᐊᒃᖢᖏᑕᐅᑎᑕᓕᒃFootnote 7 (ᐊᒃᖢᓈᓂᒃ ᐊᑐᖅᖢᓂ ᐱᙳᐊᕐᕕᒃ) ᑕᓪᓕᒪᑦ ᐅᑭᐅᑦ ᐃᓗᐊᓂ.
  • ᒥᕐᖑᐃᓯᕐᕕᖕᒧᑦ ᑐᕌᖓᔪᑦ ᐋᖅᑭᐅᒪᓂᕆᔭᐅᔭᕆᐊᖃᖃᑦᑕᕐᓂᐊᖅᑐᑦ ᐊᒻᒪᓗ ᐋᖅᑭᒋᐊᖅᓯᒍᑏᑦ ᐳᓚᕋᖅᑎᓄᑦ ᓴᖅᑭᑎᑕᐅᓯᒪᓗᑎᒃ ᐊᒻᒪᓗ ᐅᖃᐅᓯᐅᓗᑎᒃ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓄᑦ ᒥᕐᖑᐃᓯᕐᕕᖕᒥ ᐱᒻᒪᕆᐅᑎᑕᐅᔪᑦ ᒥᒃᓵᓄᑦ ᐃᓕᖅᑯᓯᑐᖃᓕᕆᕝᕕᒃᑯᑦ ᑕᒪᓐᓇ ᐱᓕᕆᐊᖑᓗᓂ ᒪᕐᕉᒃ ᐅᑭᐅᑦ ᐃᓗᐊᓂ.
  • ᐆᒪᔪᓂᒃ ᑕᐅᑐᖃᑦᑕᕐᓂᐊᕐᓗᓂ ᒪᓕᒃᑕᒃᓴᑦ ᓴᖅᑭᑎᑕᐅᓗᑎᒃ ᐊᒻᒪᓗ ᐅᖃᐅᓯᐅᓗᑎᒃ ᒥᕐᖑᐃᓯᕐᕕᖕᒥ ᐊᑐᖅᐸᒃᑐᓄᑦ ᑲᒪᒋᔭᐅᓗᓂ ᒪᕐᕉᒃ ᐅᑭᐅᑦ ᐃᓗᐊᓂ.
  • ᖃᕆᑕᐅᔭᓕᕆᔾᔪᑎ ᖁᕝᕙᖅᑎᕆᓂᕐᒧᑦ ᐊᒻᒪᓗ ᓴᖅᑭᑎᑦᑎᓂᕐᒧᑦ ᒥᕐᖑᐃᓯᕐᕕᖕᒥ ᖃᕆᑕᐅᔭᒃᑯᑦ ᐳᓚᕋᕈᓐᓇᖁᑉᓗᒋᑦ ᑕᐃᒪᐃᓕᐅᕈᑎ ᓴᖅᑭᑎᑕᐅᓗᓂ ᓯᕗᓪᓕᖅᐹᒥ ᓯᑕᒪᓂᒃ ᐅᑭᐅᓂᒃ.
  • ᐱᖓᓲᓕᖓᔪᒃᑯᑦ ᒥᕐᖑᐃᓯᕐᕕᖕᒥ ᐳᓚᕋᖅᑐᓄᑦ ᖃᐅᔨᔭᐅᔪᓐᓇᖅᑐᑦ ᐱᕕᒃᓴᕆᔭᐅᔪᑦ ᓴᖅᑭᑎᑕᐅᓗᑎᒃ, ᑐᑭᓯᒋᐊᕈᑎᒃᓴᑦ ᑲᑎᑕᐅᑎᓪᓗᒋᑦ ᑕᒪᐃᓐᓂᒃ ᑐᑭᓯᒋᐊᕐᕕᐅᔪᓐᓇᖅᑐᓂᒃ, ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ, ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ ᐱᓕᕆᖃᑎᒌᒃᑐᒃᑯᑦ ᐊᒻᒪᓗ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ, ᐊᒻᒪᓗ ᐊᑐᓕᖅᑎᖅᑕᐅᓗᑎᒃ ᖁᓕᑦ ᐅᑭᐅᑦ ᐃᓗᐊᓂ ᑕᒪᓐᓇ ᐊᑐᖅᑎᓪᓗᒍ ᐊᐅᓚᑦᑎᓂᕐᒧᑦ ᐸᕐᓇᐅᑎ.

ᖃᓄᖅᑑᕈᑕᐅᔪᒪᔪᖅ 3:

ᑲᑎᑦᑎᓂᖅ ᖃᐅᔨᒪᓂᕆᔭᐅᔪᓂᒃ - ᑲᑎᑦᑎᓂᖅ ᓱᓇᑐᐃᓐᓇᒃᑯᑦ ᖃᐅᔨᓴᕈᑕᐅᓯᒪᔪᒃᑯᑦ ᑐᑭᓯᒋᐊᕈᑎᒃᓴᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔫᑕᐅᖁᑉᓗᒋᑦ ᒥᐊᓂᖅᓯᓂᕐᒧᑦ, ᓴᖅᑭᑎᑦᑎᓂᕐᒧᑦ, ᐊᒻᒪᓗ ᖁᕝᕙᖅᑎᕆᓂᕐᒧᑦ ᐅᒃᑯᓯᒃᓴᓕᒃᑯᑦ ᒥᕐᖑᐃᓯᕐᕕᒃᑯᑦ ᓄᓇᖁᑎᒋᔭᐅᔪᓂᒃ ᐃᓕᖅᑯᓯᑐᖃᑎᒍᓪᓗ ᐊᑐᖅᑕᐅᔪᓐᓇᖅᑐᓂᒃ

ᑖᒻᓇ ᖃᓄᖅᑑᕈᑕᐅᔪᒪᔪᖅ ᓇᓗᓇᐃᔭᐃᓯᒪᔪᖅ ᓯᕗᓪᓕᖅᐸᐅᑎᑕᐅᔪᒪᔪᓂᒃ ᑲᑎᑕᐅᓯᒪᔪᒃᑯᑦ ᖃᐅᔨᓴᕈᑎᕕᓂᕐᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᑭᓯᐅᒪᔪᒪᑉᓗᒋᑦ, ᒥᐊᓂᕆᔪᒪᑉᓗᒋᑦ ᐊᒻᒪᓗ ᖁᕝᕙᖅᑎᕆᔪᒪᑉᓗᒋᑦ ᐃᓕᖅᑯᓯᑐᖃᑎᒍᑦ ᐊᒻᒪᓗ ᐃᑦᓴᕐᓂᑕᓕᕆᓂᒃᑯᑦ ᐱᒻᒪᕆᐅᑎᑕᐅᔪᓂᒃ ᐅᒃᑯᓯᒃᓴᓕᒃᑯᑦ. ᑕᒪᓐᓇ ᑐᑭᓯᒋᐊᕈᑎᒃᓴᖅ ᐊᑐᖅᑕᐅᓂᐊᖅᑐᖅ ᓴᖅᑭᑎᑦᑎᔪᒪᓂᕐᒧᖅ ᑐᕌᒐᕆᔭᐅᓂᐊᖅᑐᓂᒃ ᓯᕗᓂᒃᓴᒃᑯᑦ ᖃᐅᔨᓴᐃᔾᔪᑎᓂᒃ ᓄᓇᒥ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᓂᒃ ᒥᕐᖑᐃᓯᕐᕕᖕᒥ, ᐊᒻᒪᓗ ᐱᐅᓂᖅᓴᒃᑯᑦ ᐅᖃᖃᑎᒌᒍᑕᐅᖃᑦᑕᖁᑉᓗᒋᑦ ᒥᕐᖑᐃᓯᕐᕕᒃᑯᑦ ᐅᓂᑉᑳᖅᑐᐊᑦ.

ᖃᓄᖅᑑᕈᑕᐅᔪᒪᔪᖅ ᑲᒪᒋᐊᖅᓯᒪᔪᖅ ᐅᑯᓂᙵ ᓯᕗᓪᓕᖅᐸᐅᑎᑕᐅᔪᒪᔪᓂᒃ ᐊᒻᒪᓗ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐱᓕᕆᐊᖑᔪᒪᔪᓂᒃ:

  • ᒥᐊᓂᖅᓯᓂᖅ ᒥᕐᖑᐃᓯᕐᕕᒃᑯᑦ ᐊᕙᑎᒋᔭᐅᔪᒥᒃ ᐊᒻᒪᓗ ᐋᖅᑭᐅᒪᑎᑦᑎᔪᒪᓂᕐᒧᑦ ᐱᒻᒪᕆᐊᓗᖕᓂᒃ, ᖃᓄᐃᙱᑦᑐᓐᓇᕈᑎᓂᒃ, ᐆᒪᔪᑦ ᐊᒥᓲᓂᖏᓐᓂᒃ ᐊᖑᓇᓱᖕᓂᖅ ᑲᔪᓰᓐᓇᕈᓐᓇᖁᑉᓗᒍ (ᑎᑎᕋᖅᓯᒪᔪᖅ 2.2.2)
  • ᒥᐊᓂᖅᓯᔪᒪᓂᖅ ᑕᐃᑉᓱᒪᓂᑐᖃᖅ ᐊᑐᖅᑕᐅᕙᓚᐅᖅᑐᓂᒃ ᐊᒻᒪᓗ ᐃᑦᓴᕐᓂᑕᖃᕐᕕᒃᑯᑦ ᐊᑐᖅᑕᐅᔪᓐᓇᖅᑐᓂᒃ ᒥᕐᖑᐃᓯᕐᕕᒃᑯᑦ (ᑎᑎᕋᖅᓯᒪᔪᖅ 7)
  • ᖁᕝᕙᖅᑎᕆᓂᖅ ᐊᒻᒪᓗ ᖃᐅᔨᓴᐃᓂᖅ ᒥᕐᖑᐃᓯᕐᕕᖕᒥ (ᑎᑎᕋᖅᓯᒪᔪᖅ 8)
  • ᓴᓗᒻᒪᖅᓴᕐᓗᒍ ᓄᓇᖓ ᐊᒻᒪᓗ ᐸᐸᑐᑦᑎᐊᕆᐊᕐᓗᒍ ᓂᐅᕕᕐᕕᕕᓂᖅ ᑐᑭᓯᐅᒪᔭᐅᓂᖅᓴᐅᔪᓐᓇᖁᑉᓗᒍ ᒥᕐᖑᐃᓯᕐᕕᐅᑉ ᐅᓂᑉᑳᖅᑐᐊᖓ (ᑎᑎᕋᖅᓯᒪᔪᖅ 12.6.4)

ᐱᓕᕆᐊᖑᔪᒪᔪᖅ 3.1:

ᖃᐅᔨᓴᐃᓂᒃᑯᑦ ᑐᑭᓯᒋᐊᕈᑎᒃᓴᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᑲᑎᑕᐅᓯᒪᓗᑎᒃ ᓇᓗᓇᐃᔭᐃᓂᕐᒧᑦ ᒫᓐᓇᐅᔪᖅ ᖃᓄᐃᓐᓂᖓᓄᑦ ᐅᒃᑯᓯᒃᓴᓕᐅᑉ ᒥᕐᖑᐃᓯᕐᕕᖓᒍᑦ ᓄᓇᖁᑎᒋᔭᐅᔪᖅ ᐊᒻᒪᓗ ᓇᓗᓇᐃᖅᓯᓇᓱᖕᓂᖅ ᐊᓯᔾᔨᕋᔭᖅᑐᓂᒃ ᓯᕗᓂᒃᓴᒥ.

ᑐᕌᒐᕆᔭᐅᔪᑦ:

  • ᓴᖅᑭᑦᑎᓂᖅ ᐊᒻᒪᓗ ᐊᑐᓕᖅᑎᕆᓂᖅ ᐃᒪᕐᒥᐅᑕᒃᑯᑦ ᖃᐅᔨᓴᕈᑎᓂᒃ ᐱᖓᓱᓂᒃ ᐅᑭᐅᓂᒃ ᖃᐃᔪᓂᒃ.
  • ᓴᖅᑭᑦᑎᓂᖅ ᐊᒻᒪᓗ ᐊᑐᓕᖅᑎᕆᓂᖅ ᓄᓇᒃᑯᑦ ᖃᐅᔨᓴᕈᑎᒃᓴᒥᒃ ᐱᖓᓱᓂᒃ ᐅᑭᐅᓂᒃ ᖃᐅᔪᓂᒃ.
  • ᐱᐊᓂᒃᓯᓂᖅ ᑐᙵᕕᒃᓴᓂᒃ ᑎᑎᕋᖅᓯᒪᔪᓂᒃ ᑲᑎᑦᑎᔾᔪᑎᒃᓴᒥᒃ, 7 ᐅᑭᐅᑦ ᐃᓗᐊᓂ, ᐃᑲᔫᑖᐅᖁᑉᓗᒍ ᓯᕗᓂᒃᓴᒥ ᖃᐅᔨᒋᐊᕈᑕᐅᖃᑦᑕᕆᐊᖃᕈᒫᖅᑐᓂᒃ ᐱᔾᔪᑎᒋᑉᓗᒋᑦ ᐊᒃᑐᖅᓯᓂᐅᓇᔭᖅᑐᑦ ᓄᓇᒧᑦ ᐱᓕᕆᕝᕕᒡᔪᐊᑦ ᐱᕙᓪᓕᐊᑎᑦᑎᓯᒪᓕᖅᐸᑕ ᓄᓇᓕᖕᓂᒃ ᒥᕐᖑᐃᓯᕐᕕᐅᑉ ᖃᓂᒋᔭᖓᓃᑦᑐᓂᒃ.
  • ᐃᓚᐅᖃᑕᐅᑎᑦᑎᓗᑎᒃ ᐊᑕᐅᓯᕐᒥᒡᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ ᖃᓄᐃᓕᐅᕈᑎᒃᓴᒃᑯᑦ ᖃᐅᔨᓴᕈᑎᒥᒃ

ᐱᓕᕆᐊᖑᔪᒪᔪᖅ 3.2:

ᖃᐅᔨᓴᐃᓂᒃᑯᑦ ᑐᑭᓯᒋᐊᕈᑎᒃᓴᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᓗᑎᒃ ᑐᑭᓯᑎᑦᑎᒐᓱᖕᓂᕐᒧᑦ ᐊᒻᒪᓗ ᐊᐅᓚᑦᑎᔾᔪᑎᒃᓴᒃᑯᑦ ᐃᓱᒪᓕᐅᕈᑕᐅᔪᓐᓇᖁᑉᓗᒋᑦ

ᑐᕌᒐᕆᔭᐅᔪᑦ:

  • ᐋᖅᑭᐅᒪᓂᕆᔭᐅᓂᐊᖅᑐᖅ ᐅᒃᑯᓯᒃᓴᓕᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑲᒪᔩᑦ ᑲᑎᒪᔩᑦ ᐃᒪᓐᓈᖅᑐᐃᖃᑦᑕᕐᓗᑎᒃ ᖃᓄᖅ ᐃᓄᐃᑦ ᖃᐅᔨᒪᔭᑐᖃᖏᑦ ᐃᑲᔫᑕᐅᔪᓐᓇᕐᒪᖔᑕ ᐊᐅᓚᑦᑎᓂᒃᑯᑦ ᐃᓱᒪᓕᐅᕈᑕᐅᖃᑦᑕᕐᓂᐊᕐᒪᖔᑕ ᑕᒪᓐᓇ ᓴᖅᑭᑎᑕᐅᓗᓂ ᒪᕐᕉᒃ ᐅᑭᐅᑦ ᐃᓗᐊᓂ ᐊᖏᖅᑕᐅᖅᑳᖅᑎᓪᓗᒍ ᐸᕐᓇᐅᑎ.
  • ᑲᑎᑦᑎᕙᓪᓕᐊᖏᓐᓇᕐᓂᖅ, ᑎᑎᕋᖅᐸᓪᓕᐊᖏᓐᓇᕐᓂᖅ ᐊᒻᒪᓗ ᐅᖃᖃᑎᒌᖏᓐᓇᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦᑕ ᒥᒃᓵᓄᑦ ᐊᒻᒪᓗ ᐃᓐᓇᑐᖃᐃᑦ ᐅᓂᑉᑳᖅᑐᐊᖏᑦ ᐅᒃᑯᓯᒃᓴᓕᒃᑯᑦ ᒥᕐᖑᐃᓯᕐᕕᒃᑯᑦ.
  • ᐃᑲᔪᕆᐊᕈᑎ ᑐᕌᖓᔪᖅ ᖃᐅᔨᓴᐃᔨᓄᑦ ᐊᔭᐅᖅᑐᐃᓂᐊᖅᑐᓄᑦ ᓯᕗᓂᒃᓴᒥ ᖃᐅᔨᓴᐃᖃᑦᑕᕆᐊᖃᕐᓂᕐᒥᒃ ᓴᖅᑭᑎᑕᐅᓗᓂ ᐊᒻᒪᓗ ᐊᑐᓕᖅᑎᖅᑕᐅᓗᓂ ᐱᖓᓱᑦ ᐅᑭᐅᑦ ᐃᓗᐊᓂ.
  • ᖃᐅᔨᓴᕈᑕᐅᔭᕆᐊᓕᒃᑯᑦ ᓯᕗᓪᓕᖅᐸᐅᑎᑕᐅᔪᒪᔪᑦ ᕿᒥᕐᕈᔭᐅᖃᑦᑕᕐᓗᑎᒃ ᑐᓴᕐᕕᒋᓯᒪᓗᒋᑦ ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᒃᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ ᒪᕐᕉᒃ ᐅᑭᐅᑦ ᐃᓗᐊᓂ.
  • ᑐᑭᓯᒋᐊᕈᑎᒃᓴᑦ ᐱᔾᔪᑎᒋᑉᓗᒋᑦ ᑐᒃᑐᑦ, ᓇᓄᐃᑦ, ᐊᒻᒪᓗ ᑎᖕᒥᐊᑦ ᖃᑉᓯᐅᓂᖏᓐᓄᑦ ᐅᑉᓗᒥᒧᑦ ᓇᓗᓇᐃᖅᑕᐅᓗᑎᒃ ᒥᕐᖑᐃᓯᕐᕕᒃ ᖃᐅᔨᓴᖅᑕᐅᒃᑲᓐᓂᖅᑳᖅᑎᓐᓇᒍ ᐱᓕᕆᖃᑎᖃᕐᓗᑎᒃ ᐊᓯᖏᓐᓂᒃ ᑎᒥᐅᔪᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑎᒍᒥᐊᖅᑎᓂᒃ ᓇᓗᓇᐃᔭᐃᓂᕐᒧᑦ ᓄᓇᒃᑯᑦ ᑎᒥᒃᑯᓪᓗ ᐃᒃᐱᒋᔭᐅᕙᒃᑐᓂᒃ ᒥᕐᖑᐃᓯᕐᕕᒃᑯᑦ.
  • ᑐᑭᓯᒋᐊᕈᑎᒃᓴᑦ ᐊᑐᓕᖅᑎᕆᓂᕐᒧᑦ ᐃᖃᓗᒐᓱᒃᑎᑦᑎᑦᑕᐃᓕᒪᔾᔪᑎᒃᑯᑦ ᑎᑎᕋᖅᓯᒪᔪᖅ 10.8 ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᑲᑎᑕᐅᓯᒪᓗᑎᒃ ᒪᓕᒍᑎᔪᓐᓇᖁᑉᓗᒍ ᐊᑐᓕᖅᑎᖅᑕᐅᓂᖓᓄᑦ ᐋᖅᑭᒋᐊᖅᑕᐅᓯᒪᔫᑉ ᑲᓇᑕᒥ ᒥᕐᖑᐃᓯᕐᕕᖕᓄᑦ ᐃᖃᓗᓕᕆᓂᒃᑯᑦ ᒪᓕᒐᕆᔭᐅᔪᒧᑦ.

ᐱᓕᕆᐊᖑᔪᒪᔪᖅ 3.3:

ᐱᕙᓪᓕᐊᓯᒪᓗᓂ ᓇᓗᓇᐃᔭᐃᓂᖅ ᐊᒻᒪᓗ ᒥᐊᓂᖅᓯᓂᖅ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᓂᒃ ᐅᖃᐅᓯᖃᖅᑐᖅ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᐅᑉ ᐅᓂᑉᑳᖅᑐᐊᖓᓂᒃ.

ᑐᕌᒐᕆᔭᐅᔪᑦ:

  • ᓂᐅᕕᕐᕕᕕᓂᖅ ᑐᙵᕕᖃᑦᑎᐊᓕᕐᓗᓂ ᐊᒻᒪᓗ ᓴᖅᑭᑎᑦᑎᓯᒪᓗᑎᒃ ᑐᑭᓯᒋᐊᕈᑎᓂᒃ ᒪᓕᒡᓗᑎᒃ ᑎᑎᕋᖅᓯᒪᔪᒥᒃ 12.6.4-ᒥ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐃᓗᐃᑦᑐᒃᑯᑦ ᐊᑐᓕᖅᑎᖅᑕᐅᓯᒪᓗᓂ ᑕᓪᓕᒪᑦ ᐅᑭᐅᑦ ᐃᓗᐊᓂ.
  • ᖃᐅᔨᓴᐃᔾᔪᑎ ᓇᓕᐊᖕᓂᑐᐃᓐᓇᖅ ᒥᕐᖑᐃᓯᕐᕕᒃᑯᑦ ᐃᓕᖅᑯᓯᑐᖃᑎᒍᑦ ᐊᑐᖅᑐᒃᓴᓂᒃ ᐅᓗᕆᐊᓇᖅᑐᒦᓐᓇᓱᒋᔭᐅᒃᐸᑕ ᑲᒪᒋᔭᐅᑦᑎᐊᕈᓐᓇᖁᑉᓗᒋᑦ ᐊᒻᒪᓗ ᐊᑐᓕᖅᑎᖅᑕᐅᓗᓂ ᑕᓪᓕᒪᑦ ᐅᑭᐅᑦ ᐃᓗᐊᓂ.
  • ᑎᑎᕋᐅᑕᐅᖏᓐᓇᕐᓗᑎᒃ ᓈᓴᖅᑕᐅᓯᒪᐃᓐᓇᕐᓗᑎᒃ ᐱᒻᒪᕆᐅᑎᑕᐅᔪᑦ ᐃᓕᖅᑯᓯᑐᖃᑎᒍᑦ ᒪᓕᒡᓗᒋᑦ ᑐᑭᓯᒋᐊᕈᑎᒃᓴᑦ ᑲᑎᑕᐅᓯᒪᔪᑦ ᐃᓕᖅᑯᓯᑐᖃᑎᒍᑦ ᖃᐅᔨᒪᔨᓂᒃ (ᐆᒃᑑᑎᒋᓗᒍ ᑕᓪᓕᒪᑦ ᐃᓕᖅᑯᓯᑐᖃᓕᕆᕝᕖᑦ ᑕᒪᓐᓇ ᐸᕐᓇᐅᑎ ᐊᑐᖅᑎᓪᓗᒍ).
  • ᖃᐅᔨᒪᔭᐅᒃᑲᓐᓂᓕᕐᓗᑎᒃ ᐃᓕᖅᑯᓯᑐᖃᑎᒍᑦ ᓇᐅᒃᑰᕐᕕᕕᓃᑦ ᐊᒻᒪᓗ ᐃᓄᒃᑎᑐᑦ ᑕᐃᒎᓯᖏᑦ ᒥᕐᖑᐃᓯᕐᕕᒃᑯᑦ ᑕᒪᓐᓇ ᑲᒪᒋᔭᐅᓗᓂ 7 ᐅᑭᐅᑦ ᐃᓗᐊᓂ.

6.0 ᓄᓇᐃᑦ ᐊᕕᒃᑐᖅᓯᒪᓂᖏᑦ ᐊᒻᒪᓗ ᐱᒻᒪᕆᐅᑎᑕᐅᔪᑦ ᓄᓇᐃᑦ ᐃᓄᖕᓄᑦ

6.1 ᐊᕕᒃᑐᖅᓯᒪᓂᖏᑦ

ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᓄᓇᐃᑦ ᐊᕕᒃᑐᖅᑕᐅᓯᒪᓂᕆᖃᑦᑕᖅᑕᖏᑦ ᐱᓕᕆᖃᑎᒌᖕᓂᒃᑯᑦ ᑲᒪᒋᔭᐅᒋᐊᖅᓯᒪᖃᑦᑕᖅᑐᖅ ᓄᓇᐅᑉ ᖃᓄᐃᑦᑑᓂᖓᒍᑦ ᐊᒻᒪᓗ ᐃᒪᐅᑉ ᓇᓃᓐᓂᖓᓄᑦ ᑲᓇᑕᒥ ᒥᕐᖑᐃᓯᕐᕕᒃᑯᑦ ᐊᒻᒪᓗ ᓇᓗᓇᐃᔭᐃᓯᒪᕙᒃᑐᖅ ᓇᓂ ᓱᓇᓕᕆᔪᓐᓇᕐᒪᖔᑕ ᓄᓇᒥ ᐅᕝᕙᓘᓐᓃᑦ ᐃᒪᕐᒥ ᒪᓕᒃᖢᑎᒃ ᑕᐃᑉᑯᐊ ᓄᓇᒃᑯᑦ ᐃᒪᒃᑯᓪᓘᓐᓃᑦ ᐊᑐᕈᑕᐅᔪᒪᔪᑦ ᓈᒻᒪᒐᔭᕐᒪᖔᑕ. ᓄᓇᐃᑦ ᐊᕕᒃᑐᖅᓯᒪᓂᖏᓐᓄᑦ ᐊᑐᖅᑕᐅᔾᔪᑕᐅᓲᑦ ᑕᓪᓕᒪᐅᔪᒃᑯᑦ ᐋᖅᑭᒃᓯᒪᓲᑦ:

  • ᓄᓇᐅᑉ ᐊᕕᒃᑐᖅᓯᒪᓂᖓ I ᐊᔾᔨᐅᙱᑦᑐᒃᑯᑦ ᐸᐸᑐᖅᑕᐅᑦᑎᐊᕆᐊᖃᕐᓂᖓ;
  • ᓄᓇᐅᑉ ᐊᕕᒃᑐᖅᓯᒪᓂᖓ II ᓄᓇᑐᐃᓐᓇᒃᑯᑦ;
  • ᓄᓇᐅᑉ ᐊᕕᒃᑐᖅᓯᒪᓂᖓ III ᓄᓇᖁᑎᒋᔭᖅ ᐊᕙᑎᒋᔭᒃᑯᑦ;
  • ᓄᓇᐅᑉ ᐊᕕᒃᑐᖅᓯᒪᓂᖓ IV ᓯᓚᒥ ᐱᙳᐊᖅᑐᓕᕆᓂᖅ; ᐊᒻᒪᓗ
  • ᓄᓇᐅᑉ ᐊᕕᒃᑐᖅᓯᒪᓂᖓ V ᒥᕐᖑᐃᓯᕐᕕᓕᕆᔨᒃᑯᑦ ᐱᔨᑦᓯᕋᐅᑏᑦ.

ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ ᐱᖓᓱᓂᒃ ᓄᓇᐅᑉ ᐊᕕᒃᑐᖅᓯᒪᓂᖏᑦᑎᒍᑦ ᓇᓗᓇᐃᒃᑯᑕᓖᑦ ᐅᑯᐊᖑᔪᑦ ᓄᓇᐅᑉ ᐊᕕᒃᑐᖅᓯᒪᓂᖓ I, II, ᐊᒻᒪᓗ III (ᓄᓇᙳᐊᖅ 3). ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᖅ ᐅᖃᖅᓯᒪᖕᒪᑦ ᑲᓇᑕᒥ ᒥᕐᖑᐃᓯᕐᕖᑦ ᓄᓇᕗᒥ ᓄᓇᑖᕐᕕᖕᒥ ᐃᓗᓕᖃᕆᐊᖃᕐᓂᖏᓐᓄᑦ ᓄᓇᐃᑦ ᐊᕕᒃᑐᖅᓯᒪᓂᖏᓐᓄᑦ ᓈᓴᐅᑎᓕᖕᓂᒃ I-ᒥ ᐊᒻᒪᓗ II-ᒥ. ᓄᓇᐃᑦ ᐊᕕᒃᑐᖅᓯᒪᓂᖏᓐᓄᑦ ᐊᑐᖅᑕᐅᕙᒃᑐᑦ ᑐᕌᖓᙱᑦᑐᑦ ᐊᖑᓇᓱᖕᓂᕐᒧᑦ ᖃᓄᐃᓕᐅᕈᑎᓄᑦ ᐊᒻᒪᓗ ᐃᓅᓇᓱᐊᕐᓂᕐᒧᑦ ᐊᑐᖅᑕᐅᓇᔭᖅᑐᒃᑯᑦ ᐃᓄᖕᓄᑦ ᑕᒪᒃᑯᐊ ᐱᓕᕆᐊᖑᑎᓪᓗᒋᑦ ᒪᓕᒡᓗᑎᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᒃᑯᑦ.

ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᖅ ᓇᓗᓇᐃᔭᐃᓯᒪᙱᑦᑐᖅ ᐊᔾᔨᐅᙱᑦᑐᒃᑯᑦ ᐱᔭᐅᔭᕆᐊᓕᖕᓂᒃ ᒥᕐᖑᐃᓯᕐᕕᐅᑉ ᐃᓗᐊᒍᑦ ᓇᓗᓇᐃᔭᖅᑕᐅᓇᔭᖅᑐᓄᑦ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᓂᒃ ᐃᓄᖕᓄᑦ, ᑭᓯᐊᓂᓕ ᒪᕐᕉᒃ ᓄᓇᐃᑦ ᓇᓗᓇᐃᖅᑕᐅᓚᐅᖅᑐᑦ ᐅᖃᖃᑎᒋᔭᐅᑎᓪᓗᒋᑦ ᐃᓄᐃᑦ (ᑕᑯᓗᒍ 6.2 ᓄᓇᐃᑦ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᑦ ᐃᓄᖕᓄᑦ).

ᐱᒻᒪᕆᐅᑎᑕᐅᔪᑦ ᐃᓕᖅᑯᓯᑐᖃᑎᒍᑦ ᓄᓇᐃᑦ, ᐱᒻᒪᕆᐅᑎᑕᐅᔪᑦ ᐅᓂᑉᑳᖅᑐᐊᕐᓂᖃᕐᓂᐊᕐᓗᓂ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᐅᑉ ᒥᒃᓵᓄᑦ ᓇᓗᓇᐃᒃᑯᑦᑎᕐᕕᐅᓚᐅᖅᑐᑦ I-ᒥᒃ ᓄᓇᐅᑉ ᐊᕕᒃᑐᖅᓯᒪᓂᖓᒍᑦ. ᑕᒪᒃᑯᐊ ᓄᓇᐃᑦ ᐊᑐᖅᑕᐅᔪᒪᓂᐊᖅᑐᑦ ᐅᓂᑉᑳᖅᑐᐊᕐᓂᐊᖅᑐᓄᑦ ᒥᕐᖑᐃᓯᕐᕕᐅᑉ ᒥᒃᓵᓄᑦ ᐊᒻᒪᓗ ᐊᐅᓚᑦᑎᔾᔪᑎᒃᑯᑦ ᐳᓚᕋᕐᓂᐅᑉ ᒥᒃᓵᓄᑦ. ᐃᓚᖏᑦ ᐱᓕᕆᐊᖑᔪᑦ, ᒪᓕᒃᑕᒃᓴᖃᕐᓗᑎᒃ ᐋᖅᑭᒋᐊᕈᑎᒃᓴᓂᒡᓗ, ᐃᓚᐅᖃᑕᐅᔪᓐᓇᕐᓂᐊᖅᑐᑦ ᑕᐃᑉᑯᓇᓂ ᓄᓇᓂᒃ.

ᓇᓄᐃᑦ ᓯᑎᖃᕐᕕᖏᑦ, ᑎᖕᒥᐊᑦ ᐅᑉᓗᖃᕐᕕᖏᑦ, ᐊᒻᒪᓗ ᑐᒃᑐᑦ ᓄᕐᕆᐅᕐᕕᖏᑦ ᓇᓗᓇᐃᒃᑯᑦᑎᖅᑕᐅᓯᒪᔪᑦ ᓄᓇᐃᑦ ᐊᕕᒃᑐᖅᓯᒪᓂᖏᑦᑎᒍᑦ II-ᒥᒃ ᐅᑭᐅᑉ ᐃᓗᐊᓂ ᐊᕕᒃᑐᖅᓯᒪᔪᒃᑯᑦ ᒪᑐᓯᒪᖃᑦᑕᖅᖢᑎᒃ. ᑕᒪᒃᑯᐊ ᐱᒻᒪᕆᐅᔪᑦ ᐃᓂᒋᔭᐅᕙᒃᑐᑦ ᐊᐅᓚᑕᐅᓂᐊᖅᑐᑦ ᐃᑲᔪᖅᑑᑕᐅᔪᒃᑯᑦ ᐆᒪᔪᑦ ᓄᖑᑎᖅᑕᐅᑦᑕᐃᓕᔭᕆᐊᖃᕐᓂᖏᓐᓄᑦ.

ᑖᒻᓇ ᐊᐅᓚᑦᑎᓂᕐᒧᑦ ᐸᕐᓇᐅᑎ ᑎᑎᕋᖅᑕᐅᕙᓪᓕᐊᓚᐅᖅᑎᓪᓗᒍ, ᓴᖅᑭᓯᒪᔪᑦ ᐃᒪᒃᑯᑦ ᐱᓕᕆᐊᖑᔪᒃᑯᑦ ᑲᒪᒋᐊᓂᒃᑕᐅᓯᒪᓚᐅᙱᒻᒪᑕ. ᓂᕆᐅᒋᔭᐅᔪᑦ ᐃᓚᖏᑦ ᑐᑭᓯᒋᐊᕈᑎᒃᓴᑦ ᑲᑎᑕᐅᓚᐅᖅᑐᑦ ᑕᒪᓐᓇ ᐱᓕᕆᐊᖑᑎᓪᓗᒍ ᐃᑲᔫᑕᐅᔪᓐᓇᕐᒪᑕ ᐋᖅᑭᒋᐊᖅᓯᓂᐊᓂᕐᒧᑦ ᓄᓇᐃᑦ ᐊᕕᒃᑐᖅᓯᒪᓂᖏᓐᓂᒃ ᐅᒃᑯᓯᒃᓴᓕᖕᒥ. ᑕᒪᓐᓇ ᐸᕐᓇᐅᑎ ᐊᑐᖅᑕᐅᑎᓪᓗᒍ, ᓄᓇᐃᑦ ᐊᕕᒃᑐᖅᓯᒪᓂᖏᑦ ᐅᒃᑯᓯᒃᓴᓕᖕᒥ ᐊᓯᔾᔨᑐᐃᓐᓇᕆᐊᓖᑦ ᒪᓕᓕᖁᓗᒋᑦ ᐃᒃᐱᒋᐅᓪᓚᕆᒃᑐᓂᒃ ᐅᕝᕙᓘᓐᓃᑦ ᐱᒻᒪᕆᐅᔪᒃᑯᑦ ᖃᐅᔨᔭᐅᓯᒪᔪᓂᒃ ᖃᐅᔨᓴᐃᓂᒃᑯᑦ ᑐᑭᓯᒋᐊᕈᑎᒃᓴᓂᒃ ᑲᑎᑕᐅᓯᒪᔪᓂᒃ ᐃᒪᕐᒥᒃ ᐱᓕᕆᐊᖃᖅᑎᓪᓗᒋᑦ. ᒫᓐᓇᐅᔪᕐᓕ, ᐊᑐᖅᑕᐅᔪᒃᓴᑦ ᓲᕐᓗ ᐃᓱᒪᑕᐅᑉ ᐃᒪᓐᓈᖅᑐᕈᑎᖏᑦ, ᓄᓇᐃᑦ ᒪᑐᔭᐅᓯᒪᔾᔪᑎᖏᑦ, ᐊᒻᒪᓗ ᐊᒃᑐᖅᑕᐅᓂᖃᖅᑐᖃᖅᑎᓪᓗᒍ ᖃᐅᔨᓴᕈᑏᑦ ᐊᑐᖅᑕᐅᓂᐊᖅᑐᑦ ᑲᒪᕙᓪᓕᐊᓂᕐᒧᑦ ᓇᓗᓇᐃᔭᖅᑕᐅᓯᒪᔪᓂᒃ ᓴᖅᑭᓯᒪᔪᒃᑯᑦ ᐱᓕᕆᐊᖑᔪᒃᑯᑦ.

ᓄᓇᙳᐊᖅ 3. ᐅᒃᑯᓯᒃᓴᓕᒃᑯᑦ ᒥᕐᖑᐃᓯᕐᕕᒃᑯᑦ ᓄᓇᐃᑦ ᐊᕕᒃᑐᖅᓯᒪᓂᖏᑦ

A map of Ukkusiksalik National Park, detailing zone types I, II and III within the park boundaries 

ᓄᓇᐅᑉ ᐊᕕᒃᑐᖅᓯᒪᓂᖓ I ᐊᔾᔨᐅᙱᑦᑐᒃᑯᑦ ᐸᐸᑐᖅᑕᐅᑦᑎᐊᕆᐊᖃᕐᓂᖓ

ᓄᓇᐅᑉ ᐊᕕᒃᑐᖅᓯᒪᓂᖓ I ᐅᖃᖅᓯᒪᔪᖅ ᐊᔾᔨᐅᙱᑦᑐᒃᑯᑦ ᒥᐊᓂᖅᓯᔭᕆᐊᖃᕐᓂᕐᒧᑦ ᐃᓗᓕᖃᕐᒪᑕ ᐅᕝᕙᓘᓐᓃᑦ ᐃᑲᔪᖅᑐᐃᓯᒪᖕᒪᑕ ᐊᔾᔨᐅᙱᑦᑐᓂᒃ, ᐃᒃᐱᒍᓱᒃᓴᕋᐃᑦᑐᓂᒃ, ᐅᓗᕆᐊᓇᖅᑐᒦᑦᑐᓂᒃ ᐅᕝᕙᓘᓐᓃᑦ ᓄᖑᑉᐸᓪᓕᐊᔪᓂᒃ ᓄᓇᒥᙶᖅᑐᓂᒃ ᐅᕝᕙᓘᓐᓃᑦ ᐃᓕᖅᑯᓯᑐᖃᑎᒍᑦ ᐃᓗᓕᖃᖅᖢᑎᒃ, ᐅᕝᕙᓘᓐᓃᑦ ᐆᒃᑑᑎᒃᓴᑦᑎᐊᕙᑦ ᓄᓇᒥᙶᖅᓯᒪᔪᒃᑯᑦ ᒥᕐᖑᐃᓯᕐᕕᒃᑯᑦ. ᐳᓚᕋᕐᓂᖅ ᓄᓇᐅᑉ ᐊᕕᒃᑐᖅᓯᒪᓂᐊᒍᑦ I-ᑯᑦ ᐊᖏᖅᑕᐅᔪᓐᓇᕋᔭᖅᑐᑦ ᐅᔾᔨᖅᑐᕐᓗᓂ ᐊᐅᓚᑦᑎᓂᒃᑯᑦ ᐊᒻᒪᓗ ᖃᐅᔨᓴᐃᓂᕐᒧᑦ ᐱᓕᕆᐊᖑᕙᒃᑐᒃᑯᑦ. ᐃᑯᒪᓕᒃᑯᑦ ᐅᐸᒃᑕᐅᔪᓐᓇᙱᑦᑐᑦ, ᑭᓯᐊᓂᓕ ᒪᓕᒐᑎᒍᑦ ᒪᓕᑦᑎᐊᖅᓯᒪᔪᒃᑯᑦ ᐃᑯᒪᓕᒃᑯᑦ ᐊᑐᖅᑕᐅᔪᓐᓇᖅᖢᓂ ᖃᐅᔨᓴᐃᓂᕐᒧᑦ ᐊᒻᒪᓗ ᒥᕐᖑᐃᓯᕐᕕᒃᑯᑦ ᐊᐅᓚᑦᑎᓂᒃᑯᑦ ᐱᓕᕆᐊᖑᔪᒃᑯᑦ ᐊᖏᖅᑕᐅᓯᒪᓗᑎᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ.

ᖃᑉᓯᑲᓪᓚᑦ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᑦ ᐱᒻᒪᕆᐅᑎᑕᐅᔪᑦ ᓇᓗᓇᐃᖅᑕᐅᓯᒪᔪᑦ ᒥᕐᖑᐃᓯᕐᕕᒃᑯᑦ, ᐸᒡᕕᓵᖅᑕᐅᒃᐸᑕ, ᓈᒻᒪᒍᓐᓃᖅᑎᑦᑎᓇᔭᖅᑐᑦ ᒥᕐᖑᐃᓯᕐᕖᑦ ᑲᓇᑕᒥ ᐅᓂᑉᑳᓕᐅᕈᓐᓇᕋᔭᕐᓂᖏᓐᓄᑦ ᐅᒃᑯᓯᒃᓴᓕᐅᑉ ᒥᒃᓵᓄᑦ. 449ᖑᔪᓂᒃ ᐃᓕᖅᑯᓯᑐᖃᑎᒍᑦ ᖃᐅᔨᒪᔭᕆᔭᐅᔪᓂᒃ ᒥᕐᖑᐃᓯᕐᕕᒃᑯᑦ, 37ᖑᔪᑦ ᐃᓕᑕᕆᔭᐅᓯᒪᔪᑦ ᐱᒻᒪᕆᐅᓂᖏᓐᓄᑦ ᑕᒡᕘᓇ. ᖃᐅᔨᓴᐃᕙᓪᓕᐊᑎᓪᓗᒋᑦ ᒥᕐᖑᐃᓯᕐᕕᒃᑯᑦ, ᓂᕆᐅᒋᔭᐅᔪᖅ ᑕᒪᓐᓇ ᓇᓗᓇᐃᖅᑕᐅᓯᒪᓂᖓ ᐊᓯᔾᔨᕈᓐᓇᕐᓂᖓᓄᑦ. ᐃᒃᐱᒋᑦᑎᐊᕐᓗᒋᑦ ᓱᓕᔫᓂᖏᑦ ᑕᒪᒃᑯᐊ ᐊᒻᒪᓗ ᑕᒪᕐᒥᒃ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᑦ ᐱᒻᒪᕆᐊᓗᒃ. ᑕᐃᒪᐃᒻᒪᑦ, ᐊᔾᔨᐅᙱᑦᑐᒃᑯᑦ ᐸᐸᑐᕆᐊᖃᕐᓂᖅ ᓄᓇᒃᑯᑦ ᐃᓚᐅᖃᑕᐅᑎᑕᐅᓯᒪᔪᖅ ᐊᑐᖅᖢᑎᒃ ᑭᒡᓕᖃᕐᕕᖕᓂᒃ ᐊᔾᔨᒌᙱᑦᑑᑕᐅᔪᒃᑯᑦ ᐊᖏᓂᖃᖅᑐᒃᑯᑦ ᓂᕈᐊᖅᑕᐅᓯᒪᔪᒃᑯᑦ ᓄᓇᒋᔭᐅᔪᒃᑯᑦ. ᓄᓇᐃᑦ ᖃᓄᐃᑦᑑᓂᖏᓐᓄᑦ ᒪᓕᒃᑕᒃᓴᑦ ᓴᖅᑭᑎᑕᐅᕙᓪᓕᐊᔪᑦ ᐸᒡᕕᓵᖅᑕᐅᖁᓇᒋᑦ ᐊᑐᓂ ᐊᑐᖅᑕᐅᔪᓐᓇᖅᑐᑦ.

ᑭᒡᓕᖃᕐᕕᐅᔪᒃᑯᑦ ᑕᖕᒫᕈᓐᓇᙱᑦᑐᑦ ᓄᓇᒧᙵᐅᓯᒪᔪᑦ ᓇᓗᓇᐃᔭᖅᑕᐅᓯᒪᔪᒃᑯᑦ ᓄᓇᐃᑦ ᐊᕕᒃᑐᖅᓯᒪᓂᖏᑦᑎᒍᑦ I-ᑯᑦ ᐃᓕᖅᑯᓯᑐᖃᑎᒍᑦ ᐱᒻᒪᕆᐅᑎᑕᐅᔪᒃᑯᑦ.

ᐃᓚᐅᖃᑕᐅᑉᓗᒋᑦ ᐃᑦᓴᕐᓂᑕᓕᕆᓂᒃᑯᑦ ᑕᐃᑉᓱᒪᓂᑐᖃᕐᓗ ᐊᑐᖅᑕᐅᕙᓚᐅᖅᑐᓂᒃ ᖃᐅᔨᓴᐃᓂᖃᖅᑎᓪᓗᒋᑦ, ᓯᕗᓪᓕᖅᐸᐅᑎᑕᐅᓂᐊᖅᑐᑦ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᑦ ᐊᔾᔨᐅᙱᑦᑑᓂᕋᖅᑕᐅᔪᑦ ᐊᒻᒪᓗ ᐃᒃᐱᒍᓱᒃᓴᕋᐃᓐᓇᕋᖅᑕᐅᔪᑦ ᒥᕐᖑᐃᓯᕐᕕᐅᑉ ᐃᓗᐊᓂ (ᓇᓗᓇᐃᔭᐅᑎ 1).

ᓇᓗᓇᐃᔭᐅᑎ 1 ᐊᔾᔨᐅᙱᑦᑑᓂᕋᖅᑕᐅᔪᑦ ᐊᒻᒪᓗ ᐃᒃᐱᒍᓱᒃᓴᕋᐃᓐᓂᕋᖅᑕᐅᔪᑦ ᐃᓕᖅᑯᓯᑐᖃᑎᒍᑦ ᐊᑐᖅᑐᒃᓴᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒥ
ᓄᓇᐅᑉ ᑕᐃᒎᓯᖓ ᐊᒻᒪᓗ/ ᐅᕝᕙᓘᓐᓃᑦ ᓇᓃᓐᓂᖓ ᓄᓇᐃᑦ ᓇᓗᓇᐃᒃᑯᑕᖏᑦ ᖃᓄᐃᑦᑑᓂᖓ ᑭᒡᓕᖃᕐᕕᐅᔫᑉ ᐊᖏᓂᖓ (km)
ᐊᒃᖢᖏᑦᑕᐅᑎᑕᓕᒃ * 70X249 ᐃᓂᒋᔭᐅᔪᖅ ᐊᒃᖢᓈᒃᑯᑦ ᕿᑎᒡᕕᖕᒧᑦ 1.0
ᐅᒃᑯᒃᓯᓴᓕᖕᒥ ᑲᖏᖅᖣᑉ ᓂᐅᕕᕐᕕᕕᓂᐅᑉ ᐃᓂᖓ ᐊᒻᒪᓗ ᐊᒃᑐᐊᓂᓖᑦ ᐃᓂᒋᔭᐅᔪᑦ **

70X331

ᓂᐅᕕᕐᕕᕕᓂᖅ 1+ (ᐊᔾᔨᐅᙱᑦᑐᖅ)
70X332 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ
70X461 ᐅᒃᑯᓯᒃᓴᓕᒃᑯᑦ ᑲᖏᖅᖢᒃ
70X330 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ
70X521 ᐊᒪᕈᕐᒧᑦ ᑮᔭᖃᑦᑕᕕᓃᑦ
70X518 ᐃᓗᕕᖃᕐᕕᒃ
70X462 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ
ᓄᕗᒃᖡᑦ *** ᕿᑭᖅᑕᖅ ᕿᑭᖅᑕᐃᑦ 70X222 ᐃᒃᓯᕋᕐᔪᐊᒃᑯᑦ 1+ (ᐊᔾᔨᐅᙱᑦᑐᖅ)
70X237 ᕿᑭᖅᑕᓱᒡᔪᒃ ᑲᓂᒋᔮᓃᑦᑐᓪᓗ
70X223 ᕿᑭᖅᑕᐃᑦ ᓄᕗᒃᓖᒃ ᕿᑭᖅᑕᖅ
ᓂᐅᕕᕐᕕᕕᓂᖅ/ ᐃᒡᓗᔪᐊᕐᓇᖅ 70X403 ᓄᓇᓯᐅᑎ A 0.5
70X404 ᐃᒡᓗᔪᐊᕐᓇᖅ 1.0
ᐊᑦᑎᖕᓂᖅᓴᖅ ᐱᖅᓯᒪᓂᒃ ᑰᒃ 70X360 Falcon Pinnacle 1.0
70X259 ᓴᑲᒧᖅᑐᖅ 0.5
ᓴᕐᕙ ᐃᓂᒋᔭᐅᕙᒃᑐᖅ 70X467 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ 1.0
70X471 ᓴᕐᕙ 1.0
70X78 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ 0.5
ᑎᓂᑦᑐᒃᑐᖅ ᓄᕗᐊ 70X1 ᓄᕗᐊ A 1+ (ᐊᔾᔨᐅᙱᑦᑐᖅ)
70X2 ᓄᕗᐊ B
70X3 ᓄᕗᐊ C
70X4 ᓄᕗᐊ D
70X505 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ
70X516 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ
70X506 ᐃᓗᕕᖃᕐᕕᒃ
ᓯᓚ ᑰᒃ Bluffs 70X305 ᓯᓚ ᑰᒃ Bluffs A 0.5
ᑲᖏᖅᖢᐊᕐᔪᒃ, ᐅᐊᖕᓇᖓᓂ ᓯᒡᔭ 70X270 ᑲᖏᖅᖢᐊᕐᔪᒃ ᓄᓇ, ᐊᑭᐊᓂ ᑎᑭᓚᒃ ᓄᕗᐊᑕ 1.5
70X513 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ 1.0
70X266 ᓄᓇ ᐃᓂᒋᔭᐅᖃᑦᑕᓚᐅᖅᑐᖅ 0.5
ᑎᔨᐊᕐᔪᐊᖅ 70X52 ᑎᔨᐊᕐᔪᐊᖅ 1.0
ᒪᑦᑐᖅ ᐱᑕᖃᙱᑦᑐᖅ ᔪᐊᔾᔨ ᑭᓕᕝᓚᓐ ᑎᒥᒋᓚᐅᖅᑕᖓᑕ ᐃᓂᖓ ᕿᓇᓗᒐᓕᕆᕝᕕᒃ 2.5
ᖃᐅᕐᓇᖅ ᐅᑭᐅᒃᑯᑦ ᐃᒡᓗᒋᔭᖅ 70X318 ᖃᐅᕐᓇᖅ ᐅᑭᐅᒃᑯᑦ ᐃᒡᓗᒋᔭᐅᖃᑦᑕᓚᐅᖅᑐᖅ 0.5
ᖃᒪᓈᓗᒃ 70X338 ᖃᒪᓈᓗᒃ 1.0
Cape Dobbs 70X151 Cape Dobbs 1.5
ᑯᒑᕐᔪᒃ ᑰᕋᓛᖅ 70X280 ᑰᕋᓛᖅ A 5.0
70X281 ᑰᕋᓛᖅ B 5.0
ᑲᖏᖅᖢᐊᕐᔪᒃ ᑲᖏᓪᓕᖅ/ᑲᖏᖅᖢᐊᕐᔪᒃ ᐱᑕᖃᙱᑦᑐᖅ ᐅᒥᐊᕐᔪᐊᕕᓂᖅ ᔩᓂ ᐊᒻᒪᓗ ᐳᑭᖅᑕᓖᑦ ᐃᒡᓗᖃᕐᕕᕕᓂᖓ #3 5.0
* ᐳᓚᕋᖅᑕᐅᔪᓐᓇᔾᔮᙱᑦᑐᖅ ᐊᒃᖢᖏᑕᐅᑎᑕᓕᒃ ᑭᓯᐊᓂ ᓄᓇᒧᑦ ᒪᓕᒃᑕᒃᓴᑦ ᓴᖅᑭᑎᑕᐅᒃᐸᑕ.
** ᐳᓚᕋᕐᓂᖅ ᓂᐅᕕᕐᕕᕕᓂᕐᒧᑦ ᓇᓗᓇᐃᖅᑕᐅᓯᒪᔪᖅ ᐳᓚᕋᖅᑎᓄᑦ ᖃᐅᔨᔾᔪᑕᐅᔪᓐᓇᕐᓂᖓᓄᑦ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐊᒻᒪᓗ ᒪᑐᐃᖓᓂᐊᖅᑐᖅ ᐳᓚᕋᖅᑎᓄᑦ ᒪᓕᒃᑕᒃᓴᖃᕐᓗᑎᒃ. ᐳᓚᕋᖅᑐᑦ ᑕᒪᑐᒧᙵ ᐱᖃᑎᖃᖃᑦᑕᕆᐊᖃᕐᓂᐊᖅᑐᑦ ᐊᖏᖅᑕᐅᓯᒪᔪᒧᑦ ᑕᑯᒋᐊᖅᑎᑦᑎᔨᒧᑦ ᐊᒻᒪᓗ/ᐅᕝᕙᓘᓐᓃᑦ ᑲᓇᑕᒥ ᒥᕐᖑᐃᓯᕐᕕᖕᒥ ᓴᓇᔨᒧᑦ.
*** ᓄᕗᒃᖡᑦ, ᖃᖓᒃᑲᓐᓂᖅ, ᑎᑎᕋᐅᓯᐅᖃᑦᑕᓚᐅᖕᒥᔪᖅ ᐊᔾᔨᒋᖏᑕᖓᓂᒃ, ᐃᓄᒃᑎᑑᖅᓯᒪᔪᖅ ᖃᑉᓗᓈᑑᓕᖅᑎᑕᐅᓇᓱᒃᖢᓂ. ᐊᓯᖏᑦᑕᐅᖅ ᑎᑎᕋᖅᑕᐅᓯᒪᖕᒥᔪᑦ ᑕᒡᕙᓂ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᐊᐅᓚᑦᑎᓂᖕᒧᑦ ᐸᕐᓇᐅᑎᒧᑦ ᐃᒪᐃᓕᖓᔪᑦ ᓄᕗᑦᓕᒃ ᐊᒻᒪ ᓄᕗᒃᖡᑦ.

ᓄᓇᐅᑉ ᐊᕕᒃᑐᖅᓯᒪᓂᖓ II – ᒥᕐᖑᐃᓯᕐᕕᐅᑉ ᓄᓇᖓ

ᓄᓇᐅᑉ ᐊᕕᒃᑐᖅᓯᒪᓂᖓ II ᐃᓗᓕᖃᖅᑐᖅ ᓄᓇᑐᐃᓐᓇᕐᒥᒃ ᐊᒻᒪᓗ ᐸᐸᑐᖅᑕᐅᓯᒪᔪᑦ ᓄᓇᐅᑉ ᖃᓄᐃᓐᓂᕆᓯᒪᔭᖓᒍᑦ. ᓄᓇ ᐸᒡᕕᓵᖑᓯᒪᙱᖦᖢᓂ ᐃᓄᖕᓄᑦ ᐃᓱᒪᒋᔭᐅᓯᒪᔪᖅ ᑕᐃᒪᐃᑦᑕᕆᐊᖃᕐᓂᖓᓄᑦ. ᓄᓇᐅᑉ ᐊᕕᒃᑐᖅᓯᒪᓂᖓ II ᐱᕕᒃᓴᖃᖅᑎᑦᑎᔪᖅ ᐳᓚᕋᖅᑎᓄᑦ ᑕᑯᔪᓐᓇᖁᑉᓗᒋᑦ ᒥᕐᖑᐃᓯᕐᕕᐅᑉ ᓄᓇᖁᑎᖓᓂᒃ ᐊᒻᒪᓗ ᐱᒻᒪᕆᐅᓗᐊᙱᑦᑐᒃᑯᑦ ᐱᔨᑦᓯᕋᖅᑕᐅᔭᕆᐊᓕᒃ ᐱᖁᑎᑖᖅᑐᕆᐊᖃᖅᖢᓂᓗ. ᓄᓇᐅᑉ ᐊᕕᒃᑐᖅᓯᒪᓂᖓ II ᐊᖏᓂᖅᓴᒃᑯᑦ, ᐳᓚᕋᖅᑏᑦ ᐱᕕᒃᓴᖃᖅᑐᑦ ᖃᐅᔨᔪᓐᓇᖁᑉᓗᒋᑦ ᖃᓄᖅ ᐃᒃᐱᖕᓇᕐᒪᖔᑦ ᐅᖓᓯᒃᑐᒦᖦᖢᓂ ᐃᓄᑑᔫᔭᕐᓂᕐᒥᒡᓗ. ᐃᑯᒪᓅᖅᑐᑦ ᐱᖁᑎᑦ ᑕᐃᑯᙵ ᑎᑭᑎᑕᐅᔪᓐᓇᙱᑦᑐᑦ ᒪᓕᒐᖅᑕᖃᖅᑐᕐᓗ ᖃᐅᔨᓴᖅᑏᑦ ᐃᑯᒪᓅᖅᑐᓂᒃ ᐊᑐᕐᓗᑎᒃ ᑕᐃᑯᙵᕆᐊᖃᕋᔭᖅᐸᑕ, ᒥᕐᖑᐃᓯᕐᕕᖕᒥᓘᓐᓃᑦ ᖃᐅᓚᑦᑎᔩᑦ ᐊᒻᒪᓗ ᐃᑲᔪᕆᐊᖅᑏᑦ ᐊᒻᒪᓗ ᐃᓕᓐᓂᐊᖅᑎᑦᑎᒍᑏᑦ ᐱᔾᔪᑎᖃᖅᑐᑦ ᒥᕐᖑᐃᓯᕐᕕᖕᒧᑦ ᐊᖏᖅᑕᐅᓯᒪᔪᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᐊᒻᒪᓗ ᒪᓕᒃᑐᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᒪᓕᒐᖏᓐᓂᒃ ᐊᑐᐊᒐᖏᓐᓂᒡᓗ.

ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ ᐊᖏᔪᐊᓗᒃ ᓄᓇ ᖃᐅᔨᒪᔭᐅᔪᕐᓗ ᐆᒪᔪᖃᒃᑲᐅᓂᖓᓄᑦ ᐊᒻᒪᓗ ᐱᕈᖅᑐᖃᖅᓯᒪᓂᖓᓄᑦ ᐃᓅᒡᒍᑕᐅᓯᒪᔪᑦ ᐃᓄᖕᓄᑦ ᑕᐃᒪᙵᓂᐊᓗᒃ. ᓄᓇᐅᑉ ᐊᕕᒃᑐᖅᓯᒪᓂᖓ ᐊᒻᒪᓗ ᐊᒃᑐᐊᓂᓖᑦ ᒪᑐᓯᒪᕙᒃᑐᑦ, ᑐᕌᖓᓂᖃᖅᑐᑦ ᓄᖑᑎᕆᑦᑕᐃᓕᔭᕆᐊᖃᕐᓂᕐᒧᑦ ᓄᓇᒥᙶᖅᑐᓂᒃ ᒥᕐᖑᐃᓯᕐᕕᖕᒥ ᑲᒪᒋᔭᖃᖅᑎᓪᓗᒋᑦ ᓴᐳᔾᔨᓯᒪᔭᕆᐊᖃᕐᓂᖕᒥᒃ ᐆᒪᔪᓂᒃ ᐊᒻᒪᓗ ᐆᒪᔪᖃᕐᕕᖕᓂᒡᓗ (ᓄᓇᙳᐊᖅ 4). ᐱᔭᕆᐊᖃᖅᑐᒃᑯᑦ ᒪᓕᒃᖢᒍ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᖅ ᐊᖏᓂᖅᓴᖅ ᒥᕐᖑᐃᓯᕐᕕᐅᑉ ᓄᓇᖓ ᑕᒡᕘᓇ ᐱᖃᑕᐅᓯᒪᔪᖅ. ᐃᓚᐅᖃᑕᐅᙱᑦᑐᑐᐊᑦ ᓄᓇᖓᒍᑦ ᓄᓇᐃᑦ ᐊᕕᒃᑐᖅᓯᒪᓂᖏᑦᑎᒍᑦ ᐊᑖᒍᑦ ᐅᖃᐅᓯᐅᓯᒪᔪᑦ ᐱᒻᒪᕆᐅᑎᑕᐅᔪᑦ ᐃᓕᖅᑯᓯᑐᖃᑎᒍᑦ ᐃᓂᒋᔭᐅᖃᑦᑕᖅᓯᒪᔪᑦ ᐊᒻᒪᓗ ᑕᐃᑉᑯᐊ ᐊᑖᒍᑦ ᑕᐃᔭᐅᓯᒪᔪᑦ ᒥᕐᖑᐃᓯᕐᕕᖕᒧᑦ ᑎᑭᑉᐸᓪᓕᐊᑉᓗᓂ ᓇᐅᒃᑰᕐᕖᑦ ᐊᒻᒪᓗ ᒥᑉᐸᓪᓕᐊᓂᒃᑯᑦ ᐊᕕᒃᑐᖅᓯᒪᔪᒃᑯᑦ ᐋᖅᑭᒃᓯᒪᔪᑦ (ᓄᓇᙳᐊᖅ 5).

ᐱᒻᒪᕆᐅᔪᑦ ᓄᓇᒃᑯᑦ ᐋᖅᑭᐅᒪᓂᕆᔭᐅᔪᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃᑯᑦ ᒥᐊᓂᕆᔭᐅᒃᑲᓐᓂᕆᐊᓖᑦ (ᖃᓄᖅ ᐊᑯᓂᐅᑎᒋᔪᖅ ᒪᑐᓯᒪᑎᑕᐅᓇᔭᕐᓂᖏᓐᓄᑦ ᐋᖅᑭᖁᔭᐅᓯᒪᔪᑦ) ᐅᑯᐊᖑᔪᑦ:

  • ᑐᒃᑐᑦ ᓄᕐᕆᐅᕐᕕᖏᑦ (ᐅᑭᐅᑉ ᐃᓗᐊᓂ ᒪᑐᖃᑦᑕᖅᑐᑦ ᒪᐃ ᕿᑎᐊᓂ ᔪᓚᐃ 1-ᒧᑦ). ᖃᖓ ᑕᐃᒪᐃᓕᐅᖃᑦᑕᕋᔭᕐᓂᖏᑦ ᐊᓯᔾᔨᖃᑦᑕᑐᐃᓐᓇᕆᐊᓖᑦ ᑕᒪᓐᓇ ᐊᐅᓚᑦᑎᓂᕐᒧᑦ ᐸᕐᓇᐅᑎ ᐊᑐᖅᑕᐅᑎᓪᓗᒍ, ᒪᓕᒡᓗᒋᑦ ᐅᑉᓗᒥᒧᑦ ᑐᑭᓯᒋᐊᕈᑎᒃᓴᑦ ᑲᒪᒋᔭᐅᓯᒪᔪᑦ. ᐅᐸᒍᑎᔪᓐᓇᕐᓂᖅ ᑐᒃᑐᑦ ᓄᕐᕆᐅᕐᕕᖏᓐᓄᑦ ᓇᓗᓇᐃᔭᖅᑕᐅᓯᒪᔫᑉ ᓄᕐᕆᐅᕐᓃᑦ ᐃᓗᐊᓂ ᐅᐸᒍᑎᑦᑕᐃᓕᒪᔭᕆᐊᖃᕐᓇᖅᑐᖅ, ᐃᓚᐅᖃᑕᐅᑉᓗᒍ ᓄᓇᐅᑉ ᐊᕕᒃᑐᖅᓯᒪᓂᖓᓄᑦ ᓈᓴᐅᑎᓕᒃ 3ᒥ ᐅᐸᒍᑎᓂᐊᕐᓗᓂ ᓇᐅᒃᑰᕐᕕᒃ ᑐᕌᖅᑐᑦ ᑖᑉᑯᓄᙵ ᓄᓇᓄᑦ.
  • ᓇᓄᐃᑦ ᓯᑎᖃᕐᕕᖏᑦ (ᐅᑭᐅᑉ ᐃᓗᐊᓂ ᑕᐃᒪᐃᑉᐸᒃᑐᑦ ᒫᑦᓯ 1ᒥ ᔪᓚᐃ 1ᒧᑦ). ᖃᖓ ᑕᐃᒪᐃᓕᐅᖃᑦᑕᕋᔭᕐᓂᖏᑦ ᐊᓯᔾᔨᖃᑦᑕᑐᐃᓐᓇᕆᐊᓖᑦ ᑕᒪᓐᓇ ᐊᐅᓚᑦᑎᓂᕐᒧᑦ ᐸᕐᓇᐅᑎ ᐊᑐᖅᑕᐅᑎᓪᓗᒍ, ᒪᓕᒡᓗᒋᑦ ᐅᑉᓗᒥᒧᑦ ᑐᑭᓯᒋᐊᕈᑎᒃᓴᑦ ᑲᒪᒋᔭᐅᓯᒪᔪᑦ. ᐅᐸᒍᑎᔪᓐᓇᕐᓂᖅ ᓇᓄᐃᑦ ᓯᑎᖃᕐᕕᖏᓐᓄᑦ ᐱᑎᑕᐅᑦᑕᐃᓕᓯᒪᓲᑦ, ᐃᓚᐅᖃᑕᐅᑉᓗᒍ ᓄᓇᐅᑉ ᐊᕕᒃᑐᖅᓯᒪᓂᖓ 3 ᐅᐸᒍᑎᓂᐊᕐᓗᓂ ᓇᐅᒃᑰᕐᕖᑦ ᑐᕌᖅᑐᑦ ᑖᑉᑯᓄᙵ ᓄᓇᓄᑦ.
  • ᐱᑦᓯᐅᓛᑦ, ᒥᑏᑦ, ᐊᒻᒪᓗ ᐊᓯᖏᑦ ᐅᑉᓗᖃᓲᑦ (ᐅᑭᐅᑉ ᐃᓗᐊᓂ ᒪᑐᖃᑦᑕᖅᑐᑦ ᑎᖕᒥᐊᑦ ᐅᑉᓗᕐᒥᓃᓕᕌᖓᑕ). ᒥᕐᖑᐃᓯᕐᕕᖕᒥ ᐳᓚᕋᖅᑏᑦ ᑕᑯᖃᑦᑕᑐᐃᓐᓇᕆᐊᖃᕐᒥᔪᑦ ᐅᑉᓗᖃᕐᕕᐅᔪᓂᒃ ᐅᖓᓯᒃᑐᒥ ᐊᒻᒪᓗ ᐃᒃᐱᒍᓱᑦᑎᐊᕆᐊᓖᑦ ᐊᕙᑎᑦᑎᓐᓃᑦᑐᓂᒃ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᑲᓇᑕᒥᐅᑕᐃᑦ ᐆᒪᔪᓕᕆᓂᖕᒧᑦ ᐱᔨᑦᑎᕋᖅᑏᑦ ᐊᑐᐊᒐᖏᓐᓂᒃ ᐸᒡᕕᓴᐅᖁᖏᖦᖢᒋᑦ ᑎᖕᒥᐊᓂᒃ ᐃᒪᖕᒥᐅᑕᖕᓂᒃ ᐊᒻᒪ ᑎᖕᒥᐊᖃᕐᕖᑦ, ᐱᖃᓯᐅᑎᓗᒍ ᐊᐅᓚᑦᑎᑦᑎᐊᖕᓂᖕᒥᒃ ᐸᒡᕕᓴᐃᑦᑕᐃᓕᔾᔪᑎᓂᒃ ᑎᖕᒥᐊᖃᕐᕕᓄᑦ.

ᓄᓇᙳᐊᖅ 4. ᓄᓇᐅᑉ ᐊᕕᒃᑐᖅᓯᒪᓂᖓ II ᓄᓇ ᐊᒻᒪᓗ ᐅᑭᐅᑉ ᐃᓗᐊᓂ ᒪᑐᓯᒪᓂᐅᓲᑦ

A map of Ukkusiksalik National Park, detailing wilderness areas and seasonal closure areas. The seasonal closure areas are listed as caribou calving, polar bear denning and guillemot colony areas 

ᓄᓇᙳᐊᖅ 5. ᒥᕐᖑᐃᓯᕐᕕᖕᒥ ᐊᑐᕈᓐᓇᕐᓂᕐᒧᑦ ᓇᐅᒃᑰᕐᕖᑦ ᐊᒻᒪᓗ ᒥᑦᑕᕐᕕᒃᑯᑦ ᓄᓇᒃᑯᑦ ᐃᓂᖃᕐᕕᐅᔪᑦ

A map of Ukkusiksalik National Park, identifying the locations of access routes and landing zones in the park 

ᓄᓇᐅᑉ ᐊᕕᒃᑐᖅᓯᒪᓂᖓ III – ᓄᓇᖁᑎᒋᔭᐅᔪᖅ ᐊᕙᑎᒃᑯᑦ

ᓄᓇᐅᑉ ᐊᕕᒃᑐᖅᓯᒪᓂᖓ III-ᑯᑦ, ᐳᓚᕋᖅᑏᑦ ᖃᐅᔨᔪᓐᓇᖅᑐᑦ ᒥᕐᖑᐃᓯᕐᕕᐅᑉ ᓄᓇᖁᑎᖓᓂᒃ ᐊᒻᒪᓗ ᐃᓕᖅᑯᓯᑐᖃᓕᕆᓂᒃᑯᑦ ᐃᑦᓴᕐᓂᑕᖃᕐᕕᖏᓐᓂᒃ ᐱᙳᐊᕐᓂᒃᑯᑦ ᑲᒪᒋᔭᐅᔭᕆᐊᓖᑦ ᖃᑉᓰᓐᓇᐅᔪᒃᑯᑦ ᓄᓇᒃᑯᑦ ᐱᔨᑦᓯᕋᖅᑕᐅᔾᔪᑎᓂᒃ ᐊᒻᒪᓗ ᐱᖁᑎᑖᕆᐊᖃᕐᓂᒃᑯᑦ. ᐃᑯᒪᓕᒃᑯᑦ ᑎᑭᑕᐅᔪᓐᓇᖃᑦᑕᖅᑐᑦ ᐃᓚᖏᑦ, ᐊᐅᓚᑕᐅᔪᑦ ᓄᓇᐃᑦ ᑭᓯᒥ.

ᐊᐅᓚᑦᑎᓂᐊᕐᓗᓂ ᐳᓚᕋᖅᑐᓂᒃ ᒥᕐᖑᐃᓯᕐᕕᖕᒧᑦ, ᖃᑉᓯᑲᓪᓚᑦ ᓄᓇᐃᑦ ᒥᕐᖑᐃᓯᕐᕕᖕᒥ ᓇᓗᓇᐃᖅᑕᐅᓯᒪᔪᑦ ᓄᓇᐅᑉ ᐊᕕᒃᑐᖅᓯᒪᓂᖏᑦᑎᒍᑦ III-ᑯᑦ ᓄᓇᖁᑎᒋᔭᐅᔪᖅ ᐊᕙᑎᒃᑯᑦ. ᑕᒪᓐᓇ ᓇᓗᓇᐃᖅᑕᐅᓯᒪᔪᖅ ᐱᕕᒃᓴᖃᖅᑎᑦᑎᔪᖅ ᐊᑐᕈᓐᓇᕐᓂᕐᒧᑦ ᐃᑯᒪᓕᖕᓂᒃ ᐃᖏᕐᕋᔾᔪᑎᒃᓴᓂᒃ. ᐅᖓᓯᒃᑑᑎᓪᓗᒍ ᒥᕐᖑᐃᓯᕐᕕᒃ, ᑕᒪᒃᑯᐊ ᐱᒻᒪᕆᐊᓗᐃᑦ ᓄᓇᒧᙵᐅᔾᔨᖃᑦᑕᖅᑐᑦ ᐳᓚᕋᖅᑏᓪᓗ ᒥᕐᖑᐃᓯᕐᕕᓕᐊᖃᑦᑕᕈᓐᓇᖁᑉᓗᒋᑦ ᐊᒻᒪᓗ ᐊᑐᕈᓐᓇᖁᑉᓗᒋᑦ ᓇᓗᓇᐃᖅᑕᐅᓯᒪᔪᓂᒃ ᓄᓇᓂᒃ ᐳᓚᕋᖅᑏᑦ. ᒫᓐᓇᐅᔪᖅ ᓯᑕᒪᑦ ᐊᐳᑎᒃᑯᑦ ᓇᐅᒃᑰᕐᕖᑦ, ᐅᒃᑯᓯᒃᓴᓕᒃ ᐊᒻᒪᓗ ᒪᕐᕉᒃ ᑎᖕᒥᓲᓄᑦ ᒥᑦᑕᕐᕖᑦ ᓇᓗᓇᐃᔭᖅᑕᐅᓯᒪᔪᑦ ᒥᕐᖑᐃᓯᕐᕕᖕᒥ (ᓄᓇᙳᐊᖅ 5). ᐊᒻᒪᓗᑦᑕᐅᖅ ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᖅ ᐃᓗᓕᖃᖅᑐᖅ ᐱᕕᒃᓴᖃᕐᓂᕐᒧᑦ ᒥᕐᖑᐃᓯᕐᕕᒃᑰᕈᓐᓇᕐᓂᕐᒧᑦ ᐅᔭᕋᒃᓯᐅᕈᑕᐅᔪᓐᓇᕋᔭᖅᑐᒃᑯᑦ ᐊᒻᒪᓗ ᑕᐃᒪᐃᑉᐸᑕ ᓄᓇᐅᑉ ᐊᕕᒃᑐᖅᓯᒪᓂᕆᔭᖏᑦ ᑕᑯᒋᐊᖅᑕᐅᒃᑲᓐᓂᕆᐊᖃᕋᔭᖅᑐᑦ ᐃᑲᔪᖅᑐᐃᓂᐊᕐᓗᓂ ᑕᐃᒪᐃᑦᑐᖅᑕᖃᕋᔭᖅᐸᑦ ᐱᓕᕆᐊᖑᔪᒪᔪᒥᒃ.

ᐊᐳᑎᒃᑯᑦ ᓇᐅᒃᑰᕐᕖᑦ:

  • ᓯᓚᐅᑉ ᑰᖓᑕ ᓇᐅᒃᑰᕐᕕᖓ
  • ᐱᒃᓯᒪᓂᐅᑉ ᐅᐊᖕᓇᖓᒍᑦ ᓇᐅᒃᑰᕐᕕᖓ
  • ᐱᒃᓯᒪᓂᐅᑉ ᓂᒋᐊᒍᑦ ᓇᐅᒃᑰᕐᕕᖓ
  • ᑕᓯᐅᔭᐅᑉ ᓇᐅᒃᑰᕐᕕᖓ

ᐃᑯᒪᓅᖅᑐᑦ ᐊᑐᖅᑕᐅᔪᓐᓇᖅᑎᓪᓗᒋᑦ ᓄᓇᒃᑯᑦ ᐊᑐᖅᑕᐅᔪᓐᓇᖅᑐᖅ ᑭᓯᒥ ᐅᑭᐅᒃᑯᑦ ᐊᖅᑯᑎᑕᖃᙱᒻᒪᑦ ᑕᐅᕙᓂ. ᐱᖓᓱᑦ ᓇᐅᒃᑰᕐᕖᑦ ᓇᓗᓇᐃᖅᑕᐅᓚᐅᖅᑐᑦ ᓇᐅᔮᓂᙶᖅᑐᑦ ᐊᒻᒪᓗ ᐊᑕᐅᓯᖅ ᒥᕐᖑᐃᓯᕐᕕᐅᑉ ᓂᒋᐊᓂᙶᖅᑐᖅ. ᑕᐃᒪᐃᒻᒪᑦᑕᐅᖅ ᐊᓯᖏᓐᓂᒃ ᒥᕐᖑᐃᓯᕐᕕᖕᓂᒃ ᓄᓇᕗᒥ, ᑭᓯᒥ ᑎᑭᑦᑐᑦ ᑎᑭᑎᑕᐅᔪᑦ ᓄᓇᒧᙵᐅᔾᔨᕙᒃᑐᓄᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᓴᓇᔨᖏᓐᓄᑦ ᐊᑐᕈᓐᓇᖃᑦᑕᕐᓂᐊᖅᑐᑦ ᐊᐳᑎᒃᑯᑦ ᐃᖏᕐᕋᔾᔪᑎᓂᒃ ᐊᑐᕐᓂᐊᕐᓗᑎᒃ ᒥᕐᖑᐃᓯᕐᕕᖕᒥ. ᓄᑖᑦ ᓇᐅᒃᑰᕐᕖᑦ ᐱᑕᖃᓕᑐᐃᓐᓇᕆᐊᓖᑦ ᓯᕗᓂᒃᓴᑉᑎᓐᓂᒃ. ᐃᖏᕐᕋᓂᖅ ᑐᒃᑐᑦ ᓄᕐᕆᐅᕐᕕᖏᑦᑎᒍᑦ ᐊᒻᒪᓗ ᓇᓄᑦ ᓯᑎᖃᕐᕕᖏᑦᑎᒍᑦ ᐊᑐᖅᑕᐅᖃᑦᑕᖅᑐᑦ ᑭᓯᐊᓂ ᓇᓗᓇᐃᖅᑕᐅᓯᒪᔪᒃᑯᑦ ᐅᑭᐅᑉ ᐃᓗᐊᓂ ᐱᑎᑕᐅᑦᑕᐃᓕᖃᑦᑕᕐᓂᐊᖅᑐᑦ.

ᐅᒃᑯᓯᒃᓴᓕᒃ ᐊᒻᒪᓗ ᑕᓯᐅᔭᖅ:

  • ᐅᒃᑯᓯᒃᓴᓕᖕᒥᒃ - ᑕᓯᐅᔭᕐᒥᒃ ᐊᑐᕐᓂᖅ

ᐃᒪᐅᑉ ᐊᐅᓚᓂᖓ ᐅᒃᑯᓯᒃᓴᓕᐅᑉ ᐹᖓᒍᑦ ᑎᑎᕋᐅᑕᐅᓯᒪᔪᖅ 8 knots-ᓄᑦ ᖁᑦᑎᖕᓂᖃᖃᑦᑕᕐᓂᖓᓄᑦ. ᐃᒪᐅᑉ ᑎᓂᓐᓂᕆᕙᒃᑕᖓ ᐅᓕᓐᓂᕆᕙᒃᑕᖓ ᐊᔾᔨᖃᖅᑑᔭᖅᑐᖅ ᐃᖃᓗᐃᑦ ᑎᓂᓐᓂᖓᓂᒃᔭᐅᓕᓐᓂᖓᓂᒃ ᓄᓇᕗᒥ ᐊᒻᒪᓗ ᖁᑦᑎᒃᑐᐊᓘᕙᒃᖢᑎᒃ ᐅᐱᓐᓇᖅᑐᒃᑯᑦ. ᐃᑎᕆᐊᖅᖢᓂ ᒥᕐᖑᐃᓯᕐᕕᖕᒧᑦ ᓴᓪᑦ ᑎᒍᑦ ᐅᒃᑯᓯᒃᓴᓕᖕᒧᑦ ᐊᔪᕐᓇᙱᑦᑐᖅ ᑭᓯᐊᓂ ᖃᐅᔨᒪᑦᑎᐊᖃᑦᑕᕆᐊᓖᑦ ᑎᓂᓐᓂᕆᔭᐅᕙᒃᑐᓂᒃ ᐅᓕᓐᓂᕆᔭᐅᕙᒃᑐᓂᒡᓗ ᑎᑭᓐᓇᓱᐊᕐᓂᐊᕐᓗᓂ ᒥᕐᖑᐃᓯᕐᕕᖕᒧᑦ ᐊᑦᑕᓇᖅᑐᖃᙱᓐᓂᒃᑯᑦ. ᑎᑭᓐᓇᓱᒡᓗᓂ ᐃᒪᒃᑯᑦ ᒥᑭᓂᖅᓴᒃᑯᑦ ᑕᓯᐅᔭᕐᒧᑦ ᐱᔪᓐᓇᕐᓂᓖᑦ ᓇᐅᒃᑰᕐᕕᖓ ᓇᓗᓇᐃᖅᑕᐅᓯᒪᑉᓗᓂ ᓇᓗᓇᐃᖅᑕᐅᓯᒪᔪᖅ ᓄᓇᐅᑉ ᐊᕕᒃᑐᖅᓯᒪᓂᖓᒍᑦ III-ᑯᑦ. ᑕᐅᕘᓈᕐᓂᖅ ᐃᒪᒃᑯᑦ ᑎᑭᑉᐸᓪᓕᐊᑉᓗᓂ ᑕᓯᐅᔭᕐᒧᑦ ᐅᓗᕆᐊᓇᖅᑐᖅ ᐊᒻᒪᓗ ᑕᐅᕘᓇᖁᔨᓇᔭᙱᑦᑐᒍᑦ ᑲᒪᔨᖃᙱᑦᑐᓂᒃ ᐳᓚᕋᖅᑎᓂᒃ (ᓄᓇᙳᐊᖅ ᐃ).

ᓄᓇᙳᐊᖅ ᐃ. ᑕᓯᐅᔭᕐᒧᑦ ᑎᑭᓐᓂᐊᕐᓗᓂ ᓇᐅᒃᑰᕆᐊᖃᕐᓂᖅ ᐃᒪᒃᑯᑦ

A map of Ukkusiksalik National Park, detailing the Ford Lake access channel. A suggested course of travel is drawn in a blue line. The locations of nearby cultural resources are identified by orange stars and purple triangles 

ᑎᖕᒥᓲᓄᑦ ᓇᐅᒃᑰᕐᕖᒃ:

  • ᓯᓚ ᑐᔪᕐᒥᕕᐅᑉ ᒥᕝᕕᖓFootnote 8
  • ᑕᓯᐅᔭᐅᑉ ᒥᕝᕕᖓ

ᑎᖕᒥᓲᑦ ᑎᑭᑦᑐᓐᓇᕐᕕᖏᑦ ᓇᓗᓇᐃᖅᑕᐅᓯᒪᔪᒃᑯᑦ ᓄᓇᒃᑯᑦ ᒥᕐᖑᐃᓯᕐᕕᐅᑉ ᐃᓗᐊᒍᑦ ᐱᕕᒃᓴᖃᖅᑎᑕᐅᓂᐊᖅᑐᑦ. ᐱᓕᕆᖃᑎᖃᕐᓗᑎᒃ ᐃᓄᖕᓂᒃ, ᐊᒻᒪᓗ ᓄᓇᓕᐅᑉ ᑎᒥᖁᑎᖏᓐᓂᒃ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᓂᒃ ᓇᓗᓇᐃᔭᐃᓂᕐᒧᑦ ᓄᑖᓂᒃ ᒥᕝᕕᐅᖃᑦᑕᕋᔭᖅᑐᓂᒃ. ᓂᕈᐊᖅᑕᐅᔪᑦ ᓄᓇᐃᑦ ᐊᒃᑐᖅᓯᓂᖃᓗᐊᖅᑕᐃᓕᒪᓂᐊᖅᑐᑦ ᓄᓇᑐᐃᓐᓇᕐᒧᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᓂᒃ, ᐃᓄᐃᑦ ᐊᖑᓇᓱᒃᑐᑦ, ᐊᒻᒪᓗ ᐊᓯᖏᑦ ᒥᕐᖑᐃᓯᕐᕕᖕᒥ ᐊᑐᓲᑦ, ᐳᓚᕋᖅᑎᓂᒃ ᖃᓄᖅ ᐱᕙᓪᓕᐊᑎᑦᑎᔪᓐᓇᕐᓂᕐᒥᒃ ᑲᔪᓯᑎᑦᑎᓯᒪᓗᑎᒃ. ᑐᕌᒐᕆᔭᐅᔪᖅ ᓴᓇᒃᑲᓐᓂᕈᒪᙱᓐᓂᖅ ᐅᕝᕙᓘᓐᓃᑦ ᐋᖅᑭᐅᒪᑎᑦᑎᔭᕆᐊᖃᖃᑦᑕᕐᓂᖅ ᒥᑦᑕᕐᕕᒋᔭᐅᔪᓂᒃ ᒥᕐᖑᐃᓯᕐᕕᖕᒥ, ᑭᓯᐊᓂ ᓇᓗᓇᐃᔭᐃᔪᒪᓂᖅ ᖁᓕᒥᒎᓕᖕᓄᑦ ᒥᑦᑕᕐᕕᐅᓇᔭᖅᑐᒥᒃ ᐅᕝᕙᓘᓐᓃᑦ ᓇᓂ ᑎᖕᒥᓲᑦ ᒥᑦᑎᐊᖃᑦᑕᖅᓯᒪᖕᒪᖔᑕ. ᒥᑦᑕᕐᕖᑦ ᓯᓚᑖᓂ ᒥᕐᖑᐃᓯᕐᕕᐅᑉ ᐃᓄᐃᑦ ᓄᓇᖁᑎᖏᓐᓂᒃ ᐊᒻᒪᓗ ᒐᕙᒪᑐᖃᒃᑯᑦ ᓄᓇᖁᑎᖏᓐᓂᒃ ᐃᓱᒪᒋᔭᐅᓇᔭᕐᒪᑕᑦᑕᐅᖅ, ᐅᖃᖃᑎᖃᖅᑎᓪᓗᒋᑦ ᐅᖃᖃᑎᒋᔭᐅᔭᕆᐊᓕᖕᓂᒃ.

ᒪᕐᕉᒃ ᒥᕐᖑᐃᓯᕐᕕᐅᑉ ᐃᓗᐊᓂ ᓄᓇᐃᑦ ᓇᓗᓇᐃᖅᑕᐅᓚᐅᖅᑐᑦ ᒥᕝᕕᐅᔪᓐᓇᖃᑦᑕᕐᓂᖏᓐᓄᑦ. ᑖᑉᑯᐊ ᓄᓈᒃ ᐅᑯᐊᖑᔪᑦ: ᒫᓐᓇᐅᔪᖅ ᒥᑦᑕᕐᕕᒋᔭᐅᔪᖅ ᓯᓚ ᑐᔪᕐᒥᕕᖕᒥ, ᐊᒻᒪᓗ ᐊᐅᔭᒃᑯᑦ ᐳᑦᑕᓛᓲᑦ ᑎᖕᒥᓲᑦ ᑎᑭᑦᑐᓐᓇᖃᑦᑕᕐᓂᖏᓐᓄᑦ ᑕᓯᐅᔭᕐᒧᑦ. ᓯᑯᒃᑯᑦ ᒥᑦᑐᓐᓇᖃᑦᑕᕋᔭᖅᑐᒃᓴᐅᔪᑦ ᑖᑉᑯᓇᓂ ᓄᓇᓂᒃ. ᑕᒪᕐᒥᒃ ᑎᖕᒥᓲᑦ ᒥᖃᑦᑕᕐᓂᖏᑦ ᒥᕐᖑᐃᓯᕐᕕᖕᒧᑦ ᐊᖏᖅᑕᐅᓯᒪᖃᑦᑕᕆᐊᓖᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᒪᓕᒡᓗᑎᒃ ᒪᓕᒐᓂᒃ.

ᓄᓇᐅᑉ ᐊᕕᒃᑐᖅᓯᒪᓂᖓ III – ᓯᓚ ᑐᔪᕐᒥᕕᐅᑉ ᐃᓂᖓᑕ ᐃᓗᐊᒍᑦ

ᒥᕐᖑᐃᓯᕐᕕᒃ ᓴᖅᑭᑎᑕᐅᖕᒪᑦ ᒪᕐᕉᒃ ᐊᑐᖅᑐᐊᕈᑏᒃ ᐊᐅᓚᑕᐅᔫᒃ ᐃᓄᓕᕆᔨᑐᖃᒃᑯᓐᓄᑦ ᐃᓚᐅᖃᑕᐅᑎᑕᐅᓚᐅᙱᑦᑑᒃ ᓄᓇᓂᒃ ᓅᑦᑎᓂᕐᒧᑦ ᒥᕐᖑᐃᓯᕐᕕᖕᒧᑦ. ᑕᒪᒃᑯᐊ ᐊᑐᖅᑐᐊᕈᑏᒃ ᐊᑐᖅᑕᐅᔫᒃ ᓄᓇᒥ ᑐᔪᕐᒥᕕᓕᐊᖑᓯᒪᔪᒃᑯᑦ. ᓄᓇ ᐊᕙᑎᓕᕆᓂᒃᑯᑦ ᐊᕕᒃᑐᖅᓯᒪᓂᖓ ᐃᓕᔭᐅᓯᒪᔪᑦ ᑖᑉᑯᐊᒃ ᐊᑐᖅᑐᐊᕈᑏᒃ ᓯᓚᑖᒍᑦ, ᐊᐅᓚᑦᑎᔩᑦ ᑐᔪᕐᒥᕕᖕᒥ ᐱᕕᒃᓴᖃᖅᑎᖦᖢᒋᑦ ᐊᐅᓚᑦᑎᔪᓐᓇᕐᓂᕐᒧᑦ ᑕᐃᒪᐃᖏᓐᓇᖅᓯᒪᑎᓪᓗᒋᑦ (ᑕᑯᓗᒍ ᓄᓇᙳᐊᖅ ᐱ).

ᓄᓇᙳᐊᖅ ᐱ. ᓯᓚ ᑐᔪᕐᒥᕕᐅᑉ ᓄᓇᐅᑉ ᐊᕕᒃᑐᖅᓯᒪᓂᖓ III ᐃᓗᖓ

A map of Ukkusiksalik National Park, detailing the Sila Lodge zone III buffer. Zones I, II and III are represented on the map. The locations of nearby cultural resources are identified by orange stars and purple triangles 

ᑲᖏᖅᖢᐊᕐᔪᒃ ᓄᓇᐅᑉ ᐊᕕᒃᑐᖅᓯᒪᓂᖓ III

ᒥᕐᖑᐃᓯᕐᕕᒃ ᓴᖅᑭᑎᑕᐅᓚᐅᖅᑎᓪᓗᒍ, ᓄᓇᕗᑦ ᒐᕙᒪᒃᑯᖏᑦ ᑕ ᐊᕙᑎᓕᕆᔨᒃᑯᖏᑦ ᖃᐅᔨᓴᐃᕝᕕᒃᑕᖃᓚᐅᖅᑐᑦ ᐃᒡᓗᕋᓛᕐᒥ ᑲᖏᖅᖢᐊᕐᔪᖕᒥᒃ ᐅᒃᑯᓯᒃᓴᓕᖕᒥ. ᑕᐃᒪᐃᑦᑐᖃᐃᓐᓇᕆᐊᓕᒃ ᑕᐃᑲᓂ ᖃᐅᔨᓴᐃᕝᕕᖕᒥ ᖃᐅᔨᓴᐃᓇᔭᖅᑐᓄᑦ ᐆᒪᔪᑦ ᖃᑉᓯᐅᓕᕐᓂᖏᓐᓄᑦ ᒐᕙᒪᒃᑯᑦ ᐊᕙᑎᓕᕆᔨᒃᑯᖏᓐᓄᑦ. ᐊᒻᒪᓗᑦᑕᐅᖅ, ᑕᐅᕙᓐᓇ ᐊᑐᖅᑕᐅᕙᒃᑐᖅ ᐃᓄᖕᓄᑦ ᐊᖑᓇᓱᒃᑎᓄᑦ ᐊᖑᓇᓱᒃᑐᓄᑦ ᐊᒻᒪᓗ ᐃᖏᕐᕋᔪᓄᑦ ᒥᕐᖑᐃᓯᕐᕕᒃᑯᑦ. ᓄᓇ ᐊᕙᑎᒃᑯᑦ ᓇᓗᓇᐃᕐᕕᐅᓯᒪᔪᖅ ᑭᒡᓕᖃᕐᕕᖓ ᑕᐅᕘᓇ. ᐊᒻᒪᓗᑦᑕᐅᖅ ᐃᓂᖃᖅᑎᑦᑎᓯᒪᔪᑦ ᐊᖏᓪᓕᒋᐊᕆᐊᖃᕋᔭᖅᐸᑦ ᐱᖁᑎᒋᔭᐅᔪᖅ ᑕᐅᕙᓂ ᐃᑲᔫᑖᐅᖁᑉᓗᒍ ᓯᕗᓂᒃᓴᒥ ᒥᕐᖑᐃᓯᕐᕕᒃᑯᑦ ᐊᐅᓚᑦᑎᓂᕐᒧᑦ ᐱᓕᕆᐊᒃᓴᖅ, ᐱᔭᕆᐊᖃᕈᑎᒃ (ᓄᓇᙳᐊᖅ ᑎ).

ᓄᓇᙳᐊᖅ ᑎ. ᑲᖏᖅᖢᐊᕐᔪᒃ ᓄᓇᐅᑉ ᐊᕕᒃᑐᖅᓯᒪᓂᖓ III

A map of Ukkusiksalik National Park, detailing the Douglas Harbour zoning. Zones I, II and III are represented on the map. The locations of nearby cultural resources are identified by orange stars and purple triangles 

ᓄᓇᐃᑦ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᑦ ᐃᓄᖕᓄᑦ

ᓇᓗᓇᐃᖅᓯᔪᒪᓂᖅ ᑲᓇᑕᒥ ᒥᕐᖑᐃᓯᕐᕕᒋᔭᐅᔪᒃᑯᑦ ᓄᓇᒥᒃ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᒥᒃ ᐃᓄᖕᓄᑦ ᐃᓗᓕᖃᖁᑉᓗᒍ ᓄᓇᒥᒃ ᐃᓄᖕᓄᑦ ᐊᑐᖅᑕᐅᖃᑦᑕᖅᑐᒃᓴᐅᔪᒥᒃ ᓱᓕ ᑕᐃᒪᐃᖏᓐᓇᖅᑐᓄᑦ ᑕᐃᒪᙵᓂᐊᓗᒃ ᒥᕐᖑᐃᓯᕐᕕᒡᓘᓐᓃᑦ ᓴᖅᑭᑎᑕᐅᓚᐅᖅᑳᖅᑎᓐᓇᒍ ᐊᒻᒪᓗ ᐃᓕᑕᕆᔪᒪᑉᓗᒍ ᒪᓕᒃᑕᒃᓴᖓ 6-1 ᐃᓄᐃᑦ ᐱᕚᓪᓕᕈᑎᒃᓴᖏᓐᓄᑦ ᐊᖏᕈᑎᓕᐊᒃᑯᑦ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃᑯᑦ ᑲᓇᑕᒥ ᐅᖃᖅᓯᒪᔪᖅ “ᐃᓄᐃᑦ ᐃᓚᐅᓂᖃᓪᓚᕆᖕᒪᑕ ᐱᒻᒪᕆᐊᓗᒃᑯᑦ ᓄᓇᒧᑦ”. Iᑕᐃᒪᓪᓚᑦᑖᖅᑐᖅ, ᐃᓄᐃᑦ ᐃᓚᐅᖃᑕᐅᑎᑕᐅᙱᑉᐸᑕ ᓄᓇᒥ ᐅᒃᑯᓯᒃᓴᓕᖕᒥ ᒥᕐᖑᐃᓯᕐᕕᖕᒥ ᑲᒪᑦᑎᐊᙱᓐᓂᐅᓇᔭᖅᑐᖅ ᑎᒥᖁᑎᒋᔭᐅᔪᒧᑦ ᐸᐸᑐᕐᓂᐊᕐᓗᓂ ᓄᓇᐅᑉ ᖃᓄᐃᓐᓂᕆᓯᒪᔭᖓᓄᑦ ᓱᓕᔪᒃᑯᑦ. ᒪᓕᒃᑕᒃᓴᑦ ᐳᓚᕋᖅᑎᓄᑦ ᐊᑐᕐᓂᐊᕐᓗᑎᒃ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᒃᑯᑦ ᐃᓄᖕᓄᑦ ᐃᓕᔭᐅᔪᓐᓇᖅᑐᑦ, ᑭᓯᐊᓂ ᑕᐃᒪᐃᑦᑐᓂᒃ ᐊᑐᓕᖁᔭᐅᔪᓂᒃ ᓴᖅᑭᑎᑦᑎᓯᒪᓚᐅᙱᑦᑐᑦ ᒫᓐᓇᐅᔪᖅ ᑖᑉᑯᑎᒎᓇᖅ ᒪᕐᕉᔪᒃᑯᑦ ᓄᓇᒃᑯᑦ ᓇᓗᓇᐃᖅᑕᐅᓯᒪᔪᒃᑯᑦ ᒥᕐᖑᐃᓯᕐᕕᖕᒥ (ᑕᑯᓗᒍ ᓄᓇᙳᐊᖅ 6).

ᐅᒃᑯᓯᒃᓴᓕᒃ ᑲᓇᑕᒥ ᒥᕐᖑᐃᓯᕐᕕᒃ, ᐅᑯᐊ ᑕᒡᕙ ᓇᓗᓇᐃᖅᑕᐅᓯᒪᔪᑦ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᓄᑦ ᐃᓄᖕᓄᑦ:

ᓄᓇᙳᐊᖅ 6. ᓄᓇᐃᑦ ᐱᒻᒪᕆᐅᑎᑕᐅᔪᑦ ᐃᓄᖕᓄᑦ

A map of Ukkusiksalik National Park, detailing areas of special importance to Inuit. Zones I, II and III are represented on the map. The locations of nearby cultural resources are identified by orange stars and purple triangles 

ᐊᑦᑎᖕᓂᖅᓴᒃᑯᑦ ᐱᖅᓯᒪᓂᐅᑉ ᑰᖓ

ᑕᒪᓐᓇ ᓄᓇ ᐱᒻᒪᕆᐊᓘᓯᒪᔪᖅ ᐅᑭᐅᑉ ᐃᓗᐊᓂ ᐃᓂᒋᔭᐅᖃᑦᑕᖅᓯᒪᓂᖓᓄᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐃᓂᒋᔭᐅᖃᑦᑕᖅᓯᒪᔪᖅ ᐃᓄᖕᓄᑦ ᓄᓇᓕᖕᒧᑦ ᓅᑎᑕᐅᖅᑳᕐᓇᑎᒃ ᒫᓐᓇᓵᕐᓚᒃ, ᑭᓯᐊᓂᓕ ᐃᓂᒋᔭᐅᔪᑦ ᐱᒻᒪᕆᐅᑎᑕᐅᓚᐅᖅᑐᑦ ᐊᔾᔨᒌᙱᑦᑑᑕᐅᔪᒃᑯᑦ ᐱᕕᒃᓴᕆᔭᐅᓯᒪᔪᒃᑯᑦ ᐅᑭᐅᑉ ᐃᓗᐊᓂ ᐃᓄᖁᑎᒋᔭᐅᓚᐅᖅᑐᓄᑦ. ᖃᑉᓯᑲᓪᓚᑦ ᐃᓕᖅᑯᓯᑐᖃᑎᒍᑦ ᐃᓂᒋᔭᐅᔪᑦ, ᐃᓚᐅᖃᑕᐅᑉᓗᒍ ᖃᕐᒪᕕᓃᑦ, ᑐᐱᕐᕕᕕᓃᑦ, ᐱᕈᔭᖃᕐᕕᕕᓃᑦ, ᐅᒃᑯᓯᒃᓴᖅᑖᕐᕖᑦ, ᐊᒻᒪᓗ ᓴᐳᑎᖃᕐᕖᑦ ᑕᐅᕙᓃᑦᑐᑦ.

ᕿᑭᖅᑕᓱᒡᔪᒃ/ᓄᕗᒃᖡᑦ/ᖃᓂᒋᔮᓃᑦᑐᓪᓗ ᕿᑭᖅᑕᐃᑦ

ᑖᑉᑯᐊ ᕿᑭᖅᑕᐃᑦ ᐅᒃᑯᓯᒃᓴᓕᐅᑉ ᐃᓗᐊᓃᑦᑐᑦ ᐱᒻᒪᕆᐅᑎᑕᐅᓯᒪᔪᑦ ᐃᓂᒋᔭᐅᖃᑦᑕᓚᐅᕐᓂᖏᓐᓄᑦ ᐊᒻᒪᓗ ᐃᓂᒋᔭᐅᔪᖅ ᓄᕕᑦᓖᒃ ᐃᒃᓯᕋᕐᔪᐊᑦ ᐃᓂᒋᖃᑦᑕᓚᐅᖅᑕᖓᓄᑦ. ᐃᓄᐃᑦ ᑖᑉᑯᓇᓂ ᕿᑭᖅᑕᓃᖃᑦᑕᓚᐅᖅᑐᑦ ᐅᑭᐅᒃᑯᑦ ᐊᐅᒃᑲᕐᓂᖃᕐᓂᖓᓄᑦ ᑕᐅᕙᓂ ᐊᒻᒪᓗ ᑕᐃᒪᐅᓂᖓᓄᑦ ᓯᓈᖓ.

6.3 ᐳᓚᕋᖅᑏᑦ ᐊᑦᑕᓇᖅᑐᒦᖁᓇᒋᑦ ᒪᓕᒋᐊᖃᖅᑕᖏᑦ ᐅᕝᕙᓘᓐᓃᑦ ᒪᑐᓯᕝᕖᑦ

ᐃᓱᒪᑕᐅᑉ ᑎᓕᓯᔾᔪᑎᖓ ᑕᐃᒪᐅᔪᖅ ᐅᖃᖅᓯᒪᔪᖅ ᐳᓚᕋᖅᑏᑦ ᐊᑎᓕᐅᕆᐊᖃᖃᑦᑕᕐᓂᖏᓐᓄᑦ ᐅᐸᒍᑎᔭᕌᖓᒥᒃ ᒥᕐᖑᐃᓯᕐᕕᖕᒧᑦ ᐊᒻᒪᓗ ᐊᑎᓕᐅᖅᑕᐅᓯᒪᓂᕐᒥᓂᒃ ᐲᖅᓯᔭᕆᐊᖃᖃᑦᑕᕐᓂᖏᓐᓄᑦ ᒥᕐᖑᐃᓯᕐᕕᖕᒥ ᐊᓂᔭᕌᖓᒥᒃ. ᑕᒪᓐᓇ ᒪᓕᒃᑕᒃᓴᖅ ᑕᐃᒪᐅᔪᖅ ᐅᓗᕆᐊᓇᖅᑐᖃᖃᑦᑕᕐᓂᖓᓄᑦ ᒥᕐᖑᐃᓯᕐᕕᖕᒥ ᐊᑐᕐᓂᐊᕐᓗᓂ ᓄᓇᕗᒥ ᐊᒻᒪᓗ ᒥᕐᖑᐃᓯᕐᕕᖕᒥ ᓴᓇᔪᑦ ᑭᐅᓯᔪᓐᓇᖃᑦᑕᖁᑉᓗᒋᑦ ᑐᐊᕕᕐᓇᖅᑐᓂᒃ ᑐᐊᕕᕐᓇᖅᑐᖅᑕᖃᕋᔭᖅᐸᑦ.

6.4 ᐃᖃᓗᒐᓱᖕᓂᖅ ᐳᓚᕋᖅᑎᓄᑦ

ᒫᓐᓇᐅᔪᖅ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᑕᖅᑕᐃᓕᑎᑦᑎᓂᕐᒧᑦ ᐃᓱᒫᓘᑎᖃᙱᑦᑐᑦ ᐃᖃᓗᖃᕐᓂᖓᓄᑦ ᒥᕐᖑᐃᓯᕐᕕᖕᒥ. ᐃᓄᐃᑦ ᐅᖃᐅᓯᕆᖃᑦᑕᖅᑕᖏᑦ ᒪᓕᒃᖢᒋᑦ, ᒥᕐᖑᐃᓯᕐᕕᐅᑉ ᐃᓗᐊᓂ ᐃᓚᖓᓂᒃ ᐃᖃᓗᓕᒻᒪᕆᐊᓗᒎᖅ ᑕᕆᐅᕐᒥᐅᑕᓂᒃ ᐊᒻᒪᓗ ᐃᖃᓗᒐᓱᖃᑦᑕᖅᓯᒪᓕᖅᑐᑦ ᑕᐃᒪᙵᓂᐊᓗᒃ.

ᓇᓪᓗᐊᕐᓂᖅ ᐃᓄᓪᓚᑦᑖᖑᙱᑦᑐᓄᑦ ᖁᕕᐊᓲᑕᐅᑐᐃᓐᓇᖁᑉᓗᒍ ᐊᐅᓚᑕᐅᓂᐊᖅᑐᖅ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐃᖃᓗᒐᓱᖕᓂᕐᒧᑦ ᐱᔪᓐᓇᐅᑎᖓᒍᑦ, ᑲᓇᑕᒥ ᒥᕐᖑᐃᓯᕐᕕᒃᑯᑦ ᐃᖃᓗᒐᓱᖕᓂᕐᒧᑦ ᒪᓕᒐᕆᔭᐅᔪᖅ (C.R.C., c. 1120) ᐋᖅᑭᒋᐊᖅᑕᐅᓯᒪᓕᖅᐸᑦ ᐃᓚᐅᖃᑕᐅᑎᓐᓂᐊᕐᓗᒍ ᐅᒃᑯᓯᒃᓴᓕᒃ ᒥᕐᖑᐃᓯᕐᕕᒃ. ᒪᓕᒃᑕᒃᓴᑦ ᐋᖅᑭᒃᓱᖅᑕᐅᔪᓐᓇᕋᔭᖅᑐᑦ ᖃᑉᓯᓐᓇᔭᕐᓂᖏᓐᓄᑦ ᐊᒻᒪᓗ ᖃᓄᐃᑦᑐᓄᑦ ᐃᖃᓗᖕᓄᑦ ᐃᖃᓗᒃᑕᐅᔪᓐᓇᕋᔭᖅᑐᓄᑦ ᐅᑉᓗᑕᒫ$ᑯᑦ. ᒥᕐᖑᐃᓯᕐᕕᖕᒥ, ᑭᒡᓕᖃᕐᕖᑦ ᓇᖕᒥᓂᖅ ᐃᖃᓗᒍᑎᒃᑯᑦ ᒪᓕᑐᐃᓐᓇᕆᐊᓖᑦ ᓄᓇᕗᒥ ᒪᓕᒐᕆᔭᐅᕙᒃᑐᓄᑦ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ. ᐊᒻᒪᓗᑦᑕᐅᖅ, ᖁᕕᐊᓲᑎᖃᕐᓗᑎᒃ ᐃᖃᓗᒐᓱᒐᔭᕐᓂᕐᒧᑦ, ᐃᓱᒪᒋᔭᐅᔪᖅ ᐱᓕᕆᖃᑎᒌᖕᓂᒃᑯᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᔨᒃᑯᑦ ᑲᑎᒪᔨᕋᓛᖏᓐᓄᑦ ᐃᖃᓗᒃᑕᐅᔪᑦ ᐃᖃᓗᒃᑐᒧᑦ ᐱᔭᐅᔪᓐᓇᕋᔭᕐᓂᖏᓐᓄᑦ (ᓂᕆᔭᐅᔪᓐᓇᖁᑉᓗᒋᑦ) ᐃᒪᕐᒧᓪᓗ ᐅᑎᖅᑎᑕᐅᑐᐃᓐᓇᖃᑦᑕᙱᓪᓗᑎᒃ. ᐊᒻᒪᓗᑦᑕᐅᖅ ᖁᕕᐊᓱᖕᓂᒃᑯᑦ ᐃᖃᓗᒐᓱᖕᓂᕐᒧᑦ ᐊᐅᓚᑦᑎᔾᔪᑎᓄᑦ ᑐᒃᓯᕋᐅᑏᑦ ᐃᓚᐅᖃᑕᐅᑎᑦᑎᓗᑎᒃ ᐅᑯᓂᙵ: ᐃᖃᓗᒃᑐᑦ ᐃᖃᓘᑎᒥᓂᒃ ᐱᓯᒪᓂᐊᖅᑐᑦ ᓯᑕᒪᕌᕈᓐᓇᕐᓗᑎᒃ ᐅᑉᓗᑕᒫᒃᑯᑦ ᐊᑐᓂ ᐃᓄᐃᑦ ᐊᒻᒪᓗ ᐊᑭᓖᓗᑎᒃ ᐃᖃᓗᒐᓱᖕᓂᕐᒧᑦ ᑭᒡᓕᖃᕐᕖᑦ ᑕᐅᕙᓂ (ᓄᓇᙳᐊᖅ 7) ᑮᓇᐅᔾᔭᒃᓴᕋᓱᖕᓂᒃᑯᑦ ᐃᖃᓗᒍᓐᓇᐅᑎᒃᑯᑦ.

ᓄᓇᙳᐊᖅ 7. ᑮᓇᐅᔭᓕᐅᕐᓂᒃᑯᑦ ᐃᖃᓗᒐᓱᒍᑏᑦ

A map of Ukkusiksalik National Park, detailing commercial fishing quotas related to specific areas in the park. The quota areas are identified in blue 

7.0 ᓇᐃᓪᓕᒋᐊᖅᓯᒪᔪᒃᑯᑦ ᖃᓄᖅᑑᕐᓂᖅ ᐊᕙᑎᒥ ᖃᐅᔨᓴᐃᓂᖃᖅᑎᓪᓗᒋᑦ

ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐱᓕᕆᐊᒃᓴᖃᕐᒪᑕ ᖃᐅᔨᓴᐃᖃᑦᑕᕆᐊᖃᕐᓂᕐᒥᒃ ᐊᒻᒪᓗ ᐋᖅᑭᒋᐊᖅᓯᖃᑦᑕᕆᐊᖃᕐᓂᕐᒥᒡᓗ ᐊᐅᓚᑦᑎᓂᕐᒧᑦ ᖃᓄᐃᓕᐅᕈᑎᖏᑦᑎᒍᑦ ᐊᒃᑐᖅᓯᓂᖃᖅᑎᓪᓗᒍ ᓄᓇᒧᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔪᓐᓇᖅᑐᓄᑦ. ᒪᓕᒃᖢᒍ ᒥᓂᔅᑕᒡᒍᑏᑦ ᐃᒪᓐᓈᖅᑐᕈᑎᖏᑦ ᐊᕙᑎᓕᕆᓂᒃᑯᑦ ᖃᐅᔨᓴᐃᓂᕐᒧᑦ ᒪᓕᒐᕐᒥ, ᐸᕐᓇᐅᑎᒥ ᐊᒻᒪᓗ ᐃᑲᔫᑎᒃᑯᑦ ᑐᒃᓯᕋᐅᑎᓄᑦ (2010), ᖃᓄᖅᑑᕐᓂᕐᒧᑦ ᐊᕙᑎᒃᑯᑦ ᖃᐅᔨᓴᐃᓂᖃᓚᐅᕐᒪᑕ ᐅᒃᑯᓯᒃᓴᓕᒃᑯᑦ ᑲᓇᑕᒥ ᒥᕐᖑᐃᓯᕐᕕᒃᑯᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᖓᓄᑦ. ᖃᓄᖅᑑᕐᓂᕐᒧᑦ ᐊᕙᑎᒃᑯᑦ ᖃᐅᔨᓴᐃᓂᖃᓚᐅᖅᑐᑦ ᐊᑐᓕᖅᑎᕆᔪᒪᑉᓗᑎᒃ ᐊᕙᑎᓕᕆᓂᒃᑯᑦ ᐃᓱᒪᒃᓴᖅᓯᐅᕈᑕᐅᓯᒪᔪᓂᒃ ᐱᕙᓪᓕᐊᑎᑦᑎᓂᒃᑯᑦ ᐃᓄᐃᑦ ᒪᓕᒐᖏᓐᓄᑦ, ᐸᕐᓇᐅᑎᖏᓐᓄᑦ, ᐊᒻᒪᓗ ᐃᑲᔫᑎᒃᑯᑦ ᐊᑐᓕᖁᔭᐅᔪᓄᑦ ᐃᑲᔪᖅᑐᐃᓂᕐᒧᑦ ᐊᕙᑎᓕᕆᓂᒃᑯᑦ ᐃᓱᒪᒃᓴᖅᓯᐅᕈᑕᐅᔭᕆᐊᓕᖕᓂᒃ. ᐅᓇ ᑕᒡᕙ ᓇᐃᓪᓕᒋᐊᖅᓯᒪᔪᒃᑯᑦ ᐊᕙᑎᓕᕆᓂᒃᑯᑦ ᖃᐅᔨᓴᕈᑕᐅᓚᐅᖅᑐᖅ.

ᒥᕐᖑᐃᓯᕐᕕᒃ ᐊᐅᓚᑦᑎᓂᕐᒧᑦ ᐸᕐᓇᐅᑎ ᑲᔪᓯᑎᑦᑎᓂᐊᖅᑐᖅ ᖁᑦᑎᖕᓂᖅᓴᒃᑯᑦ ᒥᐊᓂᖅᓯᔾᔪᑎᓂᒃ ᓄᓇᒃᑯᑦ ᐊᔾᔨᐅᙱᑦᑑᑎᓪᓗᒍ ᓱᓕᔪᒃᑯᓪᓗ ᓄᓇᓪᓚᑦᑖᕐᒦᓐᓂᖓᓄᑦ ᓄᓇᖁᑎᒋᔭᐅᔪᒥ ᐊᒻᒪᓗ ᐸᐸᑐᑦᑎᐊᕈᒪᓂᕐᒧᑦ ᐃᓕᑕᖅᓯᔪᒪᓂᕐᒧᓪᓗ ᐃᓄᐃᑦ ᓇᑭᙶᖅᓯᒪᓂᖏᓐᓄᑦ ᓄᓇᐅᑉ ᖃᓄᐃᓐᓂᕆᔭᖓ ᒪᓕᒡᓗᒍ. ᐊᕙᑎᓕᕆᓂᒃᑯᑦ ᐃᓕᖅᑯᓯᑐᖃᑎᒍᓪᓗ ᖃᓄᐃᓐᓂᕆᔭᖓ ᒥᕐᖑᐃᓯᕐᕕᐅᑉ ᐃᒪᓐᓇᐃᑦᑐᖅ ᐅᒃᑯᓯᒃᓴᓕᒃ ᒪᕐᕉᖕᓂᒃ ᐊᐅᒃᑲᕐᓂᖃᖅᖢᓂ ᐱᒻᒪᕆᐅᔪᒃᑯᑦ ᐊᑐᖅᑕᐅᔪᓐᓇᖅᑐᒃᑯᑦ ᐱᔾᔪᑎᖃᖅᑐᖅ ᐊᔾᔨᒌᙱᑦᑑᑕᐅᔪᓄᑦ ᐳᐃᔨᓄᑦ ᐆᒪᔪᓄᑦ ᐊᒻᒪᓗ ᐃᒻᒪᖄ 450 ᖃᐅᔨᒪᔭᐅᔪᑦ ᐃᓕᖅᑯᓯᑐᖃᑎᒍᑦ ᑐᕌᖓᓂᓖᑦ ᐃᓂᒋᔭᐅᔪᑦ.

ᐊᑐᓕᖅᑎᕆᓂᖅ ᐸᕐᓇᐅᑎᒥᒃ ᓴᖅᑭᑦᑎᓂᖃᕐᓂᐊᖅᑐᖅ ᐱᐅᔪᒃᑯᑦ ᐃᑲᔫᑖᐅᔪᓐᓇᖅᑐᒃᑯᑦ. ᑐᑭᓯᐅᒪᓂᖅ ᐊᒻᒪᓗ ᐊᐅᓚᑦᑎᓂᖅ ᓄᓇᒥ ᐃᓕᖅᑯᓯᑐᖃᑎᒍᓪᓗ ᐊᑐᖅᑕᐅᔪᓐᓇᖅᑐᓂᒃ ᐃᑲᔫᑕᐅᓂᐊᖅᑐᖅ ᖃᐅᔨᓴᕈᑕᐅᓯᒪᔪᒃᑯᑦ ᐊᒻᒪᓗ ᕿᒥᕐᕈᓂᐅᔪᒃᑯᑦ ᐱᓕᕆᖃᑎᒌᖕᓂᒃᑯᑦ ᑲᒪᒋᔭᐅᓯᒪᔪᑦ ᓄᓇᖅᑲᑎᒌᖕᓄᑦ ᐊᒻᒪᓗ ᑭᕙᓪᓕᕐᒥ ᐱᓕᕆᖃᑎᒌᒃᑐᓄᑦ ᐊᒻᒪᓗ ᐃᓚᐅᖃᑕᐅᑎᑦᑎᓯᒪᔪᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᓄᓇᒥ ᓱᓕᔪᒃᑯᑦ ᖃᐅᔨᓴᕈᑎ ᐱᕙᓪᓕᐊᑎᑕᐅᖏᓐᓇᕐᓂᐊᖅᑐᖅ. ᐊᕙᑎᓕᕆᓂᒃᑯᑦ ᐱᒻᒪᕆᐅᑎᑕᐅᔪᑦ ᐳᓚᕋᖅᑎᓄᑦ ᖃᐅᔨᔭᐅᖃᑦᑕᖅᓯᒪᔪᒃᑯᑦ ᐱᕚᓪᓕᖅᑎᑦᑎᓂᐊᖅᑐᑦ ᓴᖅᑭᑎᑦᑎᕙᓪᓕᐊᑎᓪᓗᒋᑦ ᑐᑭᓯᒋᐊᕈᑎᒃᓴᒃᑯᑦ ᐊᑐᖅᑐᒃᓴᓂᒃ ᐊᒻᒪᓗ ᐳᓚᕋᕐᓂᒃᑯᑦ/ᐆᒪᔪᓕᕆᓂᒃᑯᓪᓗ ᑕᑯᔪᓐᓇᖅᓯᓂᒃᑯᑦ ᒪᓕᒃᑕᒃᓴᕆᔭᐅᓂᐊᖅᑐᓂᒃ.

ᓴᖅᑭᑎᑦᑎᓂᖅ ᓈᒻᒪᒃᑐᓂᒃ ᐱᓕᕆᕝᕕᖕᓂᒃ ᒥᐊᓂᖅᓯᓂᒃᑯᑦ, ᓴᖅᑭᑎᑦᑎᓂᒃᑯᑦ, ᐊᒻᒪᓗ ᖁᕝᕙᖅᑎᕆᓂᒃᑯᑦ ᒥᕐᖑᐃᓯᕐᕕᖕᒥ ᐊᐅᓚᑕᐅᓂᐊᖅᑐᖅ ᐊᒻᒪᓗ ᐋᖅᑭᒋᐊᖅᑕᐅᕙᒡᓗᓂ ᐊᕙᑎᕗᑦ ᐊᒃᑐᖅᑕᐅᓂᖃᖅᑎᓪᓗᒍ ᖃᐅᔨᒋᐊᖅᑕᐅᓂᕆᖃᑦᑕᕐᓂᐊᖅᑕᖓᒍᑦ ᓄᓇᕗᒥ ᐸᕐᓇᐃᓂᒃᑯᑦ ᒥᐊᓂᖅᓯᓂᒃᑯᓪᓗ ᖃᐅᔨᒋᐊᕈᑎᒃᑯᑦ ᐱᖁᔭᒃᑯᑦ. ᐊᓯᖏᑦ ᖃᓄᐃᓕᐅᕈᑕᐅᔪᒪᔪᑦ ᐊᑐᓕᖁᔭᐅᓯᒪᔪᑦ ᐸᕐᓇᐅᑎᒃᑯᑦ ᓈᒻᒪᒃᑐᒃᑯᑦ ᐊᒃᑐᖅᓯᓂᖃᕋᔭᖅᖢᑎᒃ ᓲᕐᓗ ᐃᓚᕚᓪᓕᕐᓗᑎᒃ ᖃᐅᔨᓴᕈᑏᑦ ᕿᒥᕐᕈᔾᔪᑎᓪᓗ ᓄᓇᓕᕆᓂᒃᑯᑦ ᐃᓕᖅᑯᓯᑐᖃᓕᕆᓂᒃᑯᓪᓗ ᐊᑐᖅᑕᐅᔪᓐᓇᖅᑐᒃᑯᑦ ᐊᒻᒪᓗ ᖁᕝᕙᖅᑎᕆᓂᕐᒧᑦ ᐳᓚᕋᖅᑐᑦ ᖃᐅᔨᖃᑦᑕᖅᓯᒪᓂᐊᖅᑕᖏᓐᓂᒃ ᐱᕙᓪᓕᐊᑎᑦᑎᓂᒃᑯᑦ ᑐᑭᓯᒋᐊᕈᑎᒃᓴᒃᑯᑦ ᐊᑐᖅᑐᒃᓴᓂᒃ ᐊᒻᒪᓗ ᐳᓚᕋᕐᓂᒃᑯᑦ/ᐆᒪᔪᓕᕆᓂᒃᑯᓪᓗ ᑕᑯᔪᓐᓇᖅᓯᓂᒃᑯᑦ ᒪᓕᒃᑕᒃᓴᕆᔭᐅᓂᐊᖅᑐᓂᒃ. ᐊᒻᒪᓗᑦᑕᐅᖅ, ᓴᖅᑭᐅᒪᓕᐊᓂᒃᑐᑦ ᒪᓕᒐᒃᓴᑦ ᓲᕐᓗ ᒥᕐᖑᐃᖅᓯᕐᕕᒃᑯᑦ ᓄᓇᖓᑕ ᐊᕕᒃᑐᖅᓯᒪᓂᖓᓂᒃ ᒥᐊᓂᖅᓯᓂᒃᑯᑦ ᐊᖏᓂᖅᓴᐅᔪᒥ ᒥᕐᖑᐃᓯᕐᕕᐅᑉ ᓄᓇᖓᓂᒃ I (ᐊᔾᔨᐅᙱᑦᑐᒃᑯᑦ ᐸᐸᑐᑦᑎᐊᕆᐊᖃᕐᓂᖅ), ᓄᓇᖓ II (ᓄᓇ) ᐊᒻᒪᓗ ᐊᔾᔨᐅᙱᑦᑐᒃᑯᑦ ᐱᒻᒪᕆᐅᑎᑕᐅᔪᖅ ᐃᓄᖕᓄᑦ.

ᐃᓅᖃᑎᒌᒃᑐᒃᑯᑦ ᐊᒻᒪᓗ ᓄᓇᖃᖅᑳᖅᓯᒪᔪᒃᑯᑦ ᐱᓕᕆᖃᑎᒌᖕᓂᐅᕙᒃᑐᖅ ᑲᒪᒋᔭᐅᓚᐅᖅᑐᖅ ᐸᕐᓇᐅᑎᒃᑯᑦ. ᐅᒃᑯᓯᒃᓴᓕᒃᑯᑦ ᐱᓕᕆᖃᑎᒌᑐᑦ ᒥᕐᖑᐃᓯᕐᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ, ᐃᓄᐃᓪᓗ ᒥᕐᖑᐃᓯᕐᕕᐅᑉ ᖃᓂᒋᔭᖓᓂᒃ ᑕᓪᓕᒪᐅᔪᓂᒃ ᓄᓇᓖᑦ ᐃᓚᐅᖃᑕᐅᓚᐅᖅᑐᑦ ᐸᕐᓇᐃᓂᒃᑯᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ.

ᐱᑕᖃᙱᑦᑐᖅ ᐱᒻᒪᕆᐅᑎᑕᐅᓯᒪᔪᓂᒃ ᓈᒻᒪᙱᑦᑐᒃᑯᑦ ᐊᕙᑎᓕᕆᓂᒃᑯᑦ ᐊᒃᑐᖅᓯᓂᐅᓇᔭᖅᑐᓂᒃ ᓂᕆᐅᒋᔭᐅᔪᓂᒃ ᐊᑐᓕᖅᑎᖅᑕᐅᑎᓪᓗᒍ ᐅᒃᑯᓯᒃᓴᓕᒃᑯᑦ ᑲᓇᑕᒥ ᒥᕐᖑᐃᓯᕐᕕᒋᔭᐅᔪᒃᑯᑦ ᐊᐅᓚᑦᑎᓂᕐᒧᑦ ᐸᕐᓇᐅᑎ.

8.0 ᐃᖅᑲᐅᒪᔭᐅᔭᕆᐊᓖᑦ

ᑕᒪᑐᒥᙵ ᐊᐅᓚᑦᑎᔨᒃᑯᑦ ᐸᕐᓇᐅᑎᖓᓂᒃ ᐸᕐᓇᐃᑎᓪᓗᑕ ᐊᒥᓱᑦ ᐃᓄᐃᑦ ᐃᓚᐅᖃᑕᐅᓂᖃᓚᐅᖅᑐᑦ. ᑐᓴᕐᕕᒋᓯᒪᑉᓗᒋᑦ ᑖᑉᑯᐊ ᐊᔾᔨᒌᙱᑦᑑᑕᐅᔪᑦ ᑎᒥᖁᑎᒋᔭᐅᔪᑦ ᓴᖅᑭᑎᑦᑎᓯᒪᔪᑦ ᐸᕐᓇᐅᑎᒥᒃ ᐊᐅᑦᑎᓂᕐᒧᑦ ᒥᕐᖑᐃᓯᕐᕕᖕᒥ ᐊᒥᓱᓄᑦ ᐅᑭᐅᓄᑦ. ᐅᑯᐊ ᐃᓄᐃᑦ ᐊᔾᔨᐅᙱᑦᑐᒃᑯᑦ ᑐᓂᓯᓯᒪᔪᑦ ᐊᒻᒪᓗ ᑕᐃᔭᐅᔭᕆᐊᖃᓪᓚᕆᒃᑐᑦ:

ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᐸᕐᓇᐃᔩᑦ

  • ᑖᓇ ᐱᐊᕆ, ᓄᓇᕗᒥ ᐳᓚᕋᖅᑐᓕᕆᔨᒃᑯᓐᓂᕐᒥᐅᑕᖅ
  • ᐃᓕᓴᐱ ᐊᒡᓘᒃᑲᖅ, ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᐊᐅᓚᑦᑎᓂᕐᒧᑦ ᑲᑎᒪᔨᐊᓛᖅ
  • ᔮᓐ ᑕᑎ, ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᐊᐅᓚᑦᑎᓂᕐᒧᑦ ᑲᑎᒪᔨᐊᓛᖅ
  • ᒫᓐᑎ ᔭᐃᖕᒃ, ᒥᕐᖑᐃᓯᕐᕕᖕᒥ ᐊᖓᔪᖅᑳᖅ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃ

ᐅᒃᑯᓯᒃᓴᓕᒃ ᒥᕐᖑᐃᓯᕐᕕᖕᒧᑦ ᐊᐅᓚᑦᑎᓂᕐᒧᑦ ᑲᑎᒪᔨᐊᓛᑦ

  • ᑑᓇ ᒥᓗᖅᑐᖅ, ᓇᐅᔮᑦ
  • ᐃᓕᓴᐱ ᐊᒡᓘᒃᑲᖅ, ᓇᐅᔮᑦ
  • ᔮᑭ ᓇᑯᓛᖅ, ᐃᒃᓯᕙᐅᑕᖅ, ᓴᓪᓕᖅ
  • ᔫᓐ ᓯᒃᑲᑎ, ᖃᒪᓂ’ᑐᐊᖅ
  • ᔮᓐ ᑕᑎ, ᑲᖏᖅᖠᓂᖅ
  • ᓕᐅᕆ ᑕᐅᑐᒃ, ᐃᒡᓗᓕᒑᕐᔪᒃ

ᓇᐅᔮᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑲᒪᔩᑦ ᑲᑎᒪᔨᖏᑦ

  • ᐃᓕᓴᐱ ᑭᓪᓛᐱᒃ, ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓂᙶᖅᑐᖅ
  • ᐅᓄᕆ ᐊᒡᓘᒃᑲᖅ, ᐃᓐᓇᑐᖃᖅ
  • ᔨᒥ ᐃᒥᙶᖅ, ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓂᙶᖅᑐᖅ
  • ᒥᐊᓕ ᑐᒃᑐᕐᔪᒃ, ᐃᓐᓇᑐᖃᖅ/ᐃᒃᓯᕙᐅᑕᖅ
  • ᓵᓚᒪᓐ ᒪᓕᑭ, ᒪᒃᑯᒃᑐᓂᒃ ᑭᒡᒐᖅᑐᐃᔨ