ᐱᒻᒪᕆᐅᔪᑦ ᖃᐅᔨᒪᒋᐊᓕᑎᑦ ᓂᐅᕐᕈᓂᐊᕈᕕᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓄᑦ

ᐅᖁᒪᐃᓐᓂᓂᐊᕐᑎᒃᑯᑦ ᒪᓕᒐᖏᑦ ᐊᑦᓱᔾᔫᒥᐅᓕᕐᑎᓪᓗᒋᑦ ᓄᓇᕗᒥ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᒪᑐᐃᖅᓯᑲᓐᓂᓚᐅᕐᖓᑕ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓂᑦ ᐳᓚᕋᑎᓄᑦ ᒫᔾᔨ 18, 2022ᖑᑎᓪᓗᒍ. ᑐᑭᓯᒋᐊᒃᑲᓂᕈᒪᒍᕕᒃᑦ, ᐅᖃᓕᒫᕈᓐᓇᕐᑕᑎᑦ ᐅᖃᓕᒫᕋᑦᓴᑦ ᑎᑎᖅᑲᖏᑦ.

ᓄᕙᕐᔪᐊᕐᓇᖅ ᑰᕕᑦ-19 ᐱᔾᔪᑎᒋᓪᓗᒍ, ᐱᔨᑦᓯᕈᑏᑦ ᐃᓪᓗᖁᑎᖏᓪᓗ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᑭᓪᓕᖃᕐᑎᑕᐅᒻᒪᑕ ᓱᓕ ᒫᓐᓇᒃᑯᑦ. ᓂᐅᕐᕈᔪᒪᔪᑦ ᓯᕗᕐᖓᑐᖄᒍᑦ ᐅᐸᓗᖓᐃᔭᐃᒋᐊᓖᑦ ᑎᑭᓚᐅᖏᓂᖏᓂ ᐱᔨᑦᓯᕈᑏᑦ ᑕᒪᐅᓐᖓᕈᑎᖕ ᐊᑐᐃᓐᓇᐅᓂᐊᕋᓗᐊᕐᒪᖔᑕ. ᐱᕙᓪᓕᐊᖏᓐᓇᕐᖓᓂᓛᖕ ᑐᓴᕋᑦᓴᑦ ᐊᓯᔾᔨᑲᑕᐃᓐᓇᕐᖓᑕ ᑐᓴᐅᒪᑎᑦᓯᖃᑦᑕᓂᐊᕐᑐᒍᑦ ᐊᓯᐊᓂᑦ ᑐᓴᕋᑦᓴᑕᖃᓕᕐᒪᖔᑦ.

  • ᑲᓇᑕᒥ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᐊᓪᓚᕝᕕᖏᑦ ᐸᓐᓂᑦᑑᒥ ᕿᑭᖅᑕᕐᔪᐊᒥᓗ ᓱᓕ ᒪᑐᓯᒪᒻᒪᑕ ᐊᓯᐊᒍᑦ ᖃᐅᔨᒃᑲᕐᑕᐅᓚᐅᖏᓂᑦᑎᓂ. ᒥᕐᖑᐃᓯᕐᕕᐅᑉ ᐃᖅᑲᓇᐃᔭᕐᑎᖏᓐᓂᑦ ᖃᐅᔨᒋᐊᕈᒪᒍᕕᑦ, ᐃᕐᖕᓃᓐᓈᕈᑎᒃᑯᑦ ᑎᑎᕋᕈᓐᓇᕐᑐᑎᑦ ᐅᕗᖓ nunavut.info@pc.gc.ca ᐅᕝᕙᓘᓐᓃᑦ ᐅᖄᓚᐅᑎᒃᑯᑦ ᕿᒪᐃᕕᒻᒧᑦ ᓂᐱᓕᐅᕈᓐᓇᕐᑐᑎᑦ ᐅᖄᓚᕕᐅᔪᒪᓗᑎᑦ ᐅᕗᖓ 867-473-2500. ᐃᖅᑲᓇᐃᔭᕐᑏᑦ ᑭᐅᑦᓴᐅᑎᒋᓇᓱᐊᕋᔭᕐᑐᑦ ᐱᔪᓐᓇᕐᓯᑐᐊᕈᑎᖕ, ᑭᓯᐊᓂᓕ ᐃᒻᒪᖃ ᐅᓪᓗᓂ ᖃᑦᓯᑲᓪᓚᓐᓂᑦ ᑭᐅᔭᐅᓇᓱᐊᕋᔭᕐᑐᑎᑦ.
  • ᖃᐅᔨᒪᒋᐊᓕᓐᓂᑦ ᐃᓕᓐᓂᐊᕈᑏᑦ, ᐊᑎᓕᐅᕐᕖᓪᓗ, ᐱᔪᓐᓇᐅᑎᑖᕐᕖᓪᓗ ᐊᒻᒪ ᐊᑭᓕᕆᐊᓖᑦ ᓄᐊᑕᐅᖃᑦᑕᕐᑐᑦ ᐅᖓᓯᑦᑑᒦᑦᑐᓄᑦ. ᐳᓚᕋᑏᑦ ᖃᐅᔨᒃᑲᐃᒋᐊᓖᑦ ᑲᓇᑕᐅᑉ ᒥᕐᖑᐃᓯᕐᕕᖓᑕ ᐃᖅᑲᓇᐃᔭᕐᑎᖏᓐᓂᑦ ᐱᓇᓱᐊᕈᓰᒃ ᒪᕐᕉᒃ ᓯᕗᕐᖓᒍᑦ ᑎᑭᕝᕕᑦᓴᐅᑎᖓᑕ ᐅᓪᓗᖓᓂᑦ ᐊᒻᒪ ᐱᕕᖃᕐᑎᑕᐅᔪᓐᓇᓛᕐᖓᑕ ᖃᐅᔨᒪᒋᐊᓕᖏᓐᓂᑦ ᐃᓕᓐᓂᐊᕐᑎᑕᐅᓗᑎᑦ.
  • ᐃᖏᕐᕋᔾᔪᑎᑦᓴᑦ ᑲᓇᑕᐅᑉ ᒥᕐᖑᐃᓯᕐᕕᖓᓄᑦ ᐅᑎᒧᓪᓗ ᐋᖅᑭᑦᓱᕐᑕᐅᒋᐊᓖᑦ ᓚᐃᓴᓐᓯᓕᒻᒧᑦ ᐊᐅᓪᓚᕈᔾᔨᓂᖕᒥᑦ ᓇᖕᒥᓂᖃᕐᑐᒧᑦ. ᑎᑎᕋᕐᑕᐅᔪᓐᓇᕐᑐᑦ ᑲᑎᖅᓱᖅᑕᐅᓯᒪᔪᑦ ᐅᕙᓐᖓᑦ ᐳᓚᕋᑏᑦ ᑐᓴᕋᑦᓴᖏᑦ ᑲᑎᖅᓱᖅᓯᒪᔪᑦ  ᐅᕝᕙᓘᓐᓃᑦ ᖃᐅᔨᒋᐊᕐᓗᑎᑦ ᑲᓇᑕᐅᑉ ᒥᕐᖑᐃᓯᕐᕕᖏᓐᓄᑦ ᒫᓐᓇᓂᓴᐅᓂᕐᐹᓂᑦ ᑎᑎᕋᕐᓯᒪᔪᖁᑎᖏᓐᓂᑦ ᓚᐃᓴᓐᓯᓖᑦ ᐊᐅᓪᓚᕈᔾᔨᕙᑦᑐᑦ ᓇᖕᒥᓂᓕᓐᓂᑦ ᐳᓚᕋᑦᑐᓕᕆᔨᓂᒧᓪᓗ ᑲᒻᐸᓂᓂᑦ.
  • ᐳᓚᕋᑏᑦ ᒪᓕᒋᐊᓖᑦ ᑕᒪᐃᓐᓂᑦᓯᐊᖅ ᐊᐅᓪᓚᖃᑦᑕᕐᑐᑦ ᒪᓕᒋᐊᓕᖏᓐᓂᑦ ᐊᒻᒪ ᑭᒃᑯᑐᐃᓐᓇᕐᓄᑦ ᐅᖁᒪᐃᓐᓂᓂᐊᕐᑏᑦ ᐊᑐᖅᑕᐅᖁᔭᖏᓐᓂᑦ ᐅᕙᓐᖓᑦ ᑲᓇᑕᐅᑉ ᒐᕙᒪᒃᑯᖏᑦ (ᖃᓪᓗᓈᑎᑐᑦ ᑭᓯᐊᓂ) ᐊᒻᒪ ᓄᓇᕗᑦ ᒐᕙᒪᒃᑯᖏᑦ.

ᑐᐊᕕᕐᓇᕐᑐᓕᕆᔩᑦ ᐱᔨᑦᓯᕈᑎᖏᑦ ᐊᒻᒪ ᐳᓚᕋᑏᑦ ᐊᑦᑕᓇᖅᑐᒦᖁᓇᒋᑦ

ᐊᐅᔪᐃᑦᑑᕐ ᒥᕐᖑᐃᓯᕐᕕᖓᒍᑦ ᐃᖏᕐᕋᓂᐊᕈᕕᑦ, ᐊᐅᓪᓚᖃᑎᒋᓯᒪᔭᑎᑦ ᐃᖅᑲᐅᒪᔭᕆᐊᓖᑦ ᐊᑦᑕᓇᕐᑐᒃᑰᕈᓐᓇᕋᕕᑦ ᖃᖅᑲᓕᒃᑯᑦ ᒪᓃᑦᑐᒥ ᐅᑭᐅᖅᑕᖅᑐᒦᓐᓂᕐᓂ ᐃᖅᑲᓇᐃᔭᕐᑎᑭᑦᑐᒥ ᐃᒻᒪᖃᓗ ᖃᓄᐃᓕᔪᖃᑳᓪᓚᑉᐸᑦ ᐊᑯᓂᑲᓪᓚᒃ ᕿᓂᖅᑎᓂᑦ ᑎᑭᑦᑐᖃᕋᓱᒐᔭᕐᖓᑦ (ᐃᒻᒪᖃ ᐅᓪᓗᕋᓴᓂᑦ). ᐊᑦᑕᓇᕐᑐᓕᕆᔪᓐᓇᕐᑐᑦ, ᐋᓐᓂᖅᑐᓕᕆᔪᓐᓇᕐᑐᑦ ᐊᒻᒪ ᑐᐊᕕᕐᓇᕐᑐᓕᕆᔪᓐᓇᕐᑐᑑᒐᔭᕐᖓᑕ ᑭᓯᐊᓂ ᐊᐅᓪᓚᖃᑎᒋᓯᒪᔭᑎᑦ. ᐃᖏᕐᕋᖃᑎᑎᑦ ᖃᐅᔨᒪᒋᐊᓖᑦ ᐊᔪᖅᑕᒥᓂᖕ ᐊᒻᒪ ᐃᒻᒥᓂᖕ ᐊᓐᓇᐅᒪᔪᓐᓇᕐᓗᑎᑦ ᖃᓄᐃᓕᔪᖃᑳᓪᓚᑉᐸᑦ.

ᐊᐅᓪᓚᖃᑎᒋᓯᒪᔭᓐᓂᑦ ᐃᑲᔪᕐᑕᐅᔪᖃᕆᐊᖃᕐᐸᑦ ᕿᓂᕐᑎᓄᑦ ᐸᖅᓴᐃᔨᓄᓪᓘᓐᓃᑦ ᓯᕕᑐᔪᒦᑉᐸᑕ 25ᒥ ᐄᒐᖓᔪᒥ ᐊᒻᒧᖅᑲᒥ, ᓄᓇᕗᑦ ᓯᓚᑖᓂᑦ ᑎᑭᑎᑦᓯᒋᐊᖃᕋᔭᕐᖓᑕ. ᖁᓛᒎᓕᒃᑯᑦ ᐊᐃᔭᐅᔪᖃᕆᐊᖃᕐᐸᑦ ᐊᑐᐃᓐᓇᐅᖏᓐᓇᖏᒻᒪᑕ (ᖁᓛᒎᓕᒃ ᐃᖅᑲᓇᐃᔭᕐᑎᖏᓪᓗ), ᓯᓚᕈᔫᑉᐸᑦ ᓱᑯᑦᓯᐊᓄᓪᓗ ᒥᒃᑲᔭᕐᒪᖔᑕ. ᐊᐅᓪᓚᖃᑎᒋᓯᒪᔭᑎᑦ ᐃᖏᕐᕋᑉᐸᑕ ᐊᑦᑎᓂᖅᓴᒃᑯᑦ ᓲᕐᓗ ᐊᒃᓵᕐᔪᒃ ᐊᖅᑯᑖᒍᑦ, ᕿᓂᖅᑏᑦ ᐸᖅᓴᐃᔩᓪᓗ ᐃᒻᒪᖃ ᖃᒧᑕᐅᔭᒃᑯᑦ ᐃᖏᕐᕋᔪᓐᓇᕐᑐᑦ.

ᕿᒥᕐᕈᓗᒋᑦ ᐳᓚᕋᑏᑦ ᐊᑦᑕᓇᕐᑐᒦᕐᔭᐃᕐᓂᖏᑦ ᐃᓚᖓᓃᑦᑐᖅ ᖃᓄᖅ ᐊᑦᑕᓇᖅᑐᒦᑦᑕᐃᓕᒪᒋᐊᑦᓴᖅ ᐊᐅᔪᐃᑦᑐᖅ ᒥᕐᖑᐃᓯᕐᕕᖓᓃᓪᓗᓂ.