ᑐᓴᕋᑦᓴᐃᑦ

ᑐᓴᕋᑦᓴᓕᐊᖑᑦᓴᐅᑎᒋᒋᐊᓖᑦ
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᓯᔾᔩᔪᑦ ᐸᕐᓇᐅᑎᒥᓂᑦ 2020-ᒥ ᐱᓕᕆᐊᓂᑦ ᐃᑦᑕᕐᓂᓴᓕᕆᓂᐅᑉ ᐃᓗᐊᓂ ᐅᒦᔭᕈᑕᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐱᔾᔪᑎᒋᓪᓗᒍ ᓄᕙᔾᔪᐊᕐᓇᖅ 19 ᑭᒡᒐᖅᑐᐃᔪᑦ ᑕᒪᑐᒥᖓ ᐱᓇᓱᐊᖅᑕᒥᓐᓂᑦ ᖃᓄᖅᑑᕈᑎᖃᖅᑐᑦ ᐊᓯᐊᒍᑦ ᑖᒃᑯᐊ ᐃᑦᑕᕐᓂᓴᐃᑦ ᖃᐅᔨᓴᖅᑕᐅᓂᖏᑦ ᐱᓕᕆᐊᖑᒍᓐᓇᕐᒪᖔᑕ, ᓄᑖᓂᓪᓗ ᓴᐳᔾᔨᒍᑎᓂᑦ ᐋᖅᑮᔪᓐᓇᕐᒪᖔᑕ ᐱᖃᑕᐅᓗᑎᒃ ᖃᓄᖅᑑᕈᑕᐅᔪᑦ ᖃᓪᓗᓈᑦ ᓄᓇᖓᓂ ᐱᓯᒪᔪᑦ ᑲᓇᑕᐅᑉ ᐃᓗᐊᓂ.

ᔫᓂ 26, 2020ᒐᑎᓄ, ᑯᐸᐃᐸᐃᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ

ᐅᓂᒃᑳᖅᑕᐅᓯᒪᔪᖅ ᒪᓕᑦᑐᒍ ᓱᕐ ᔮᓐ ᕗᕋᐃᖕᓕᓐ 1845ᒥᑦ ᕿᓂᓚᐅᖅᓯᒪᓂᕋᖅᑕᐅᒻᒪᑦ ᐅᑭᐅᖅᑕᖅᑐᒥ ᐊᑉᖁᑎᖓ ᑕᕆᐅᒃᑯᑦ ᐊᑐᖅᓱᑎᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᓱᓕ ᖃᐅᔨᔭᐅᒍᒪᓯᒪᐃᓐᓇᕐᒪᑦ ᐊᒥᓱᓄᑦ ᑕᒫᓂ ᑲᓇᑕᒥ ᐊᒻᒪᓗ ᓯᓚᕐᔪᐊᓗᑦᑖᒥ. 2019ᒥᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᓄᐃᓪᓗ ᑲᑐᔾᔨᑎᖃᕐᓂᖏᑦ ᐱᒻᒪᕆᐅᓚᐅᕐᒪᑦ ᖃᐅᔨᖃᑎᖃᕋᓱᐊᖅᑎᓪᓗᒋᑦ ᐅᒦᔭᕐᑐᕕᓂᕐᓂᑦ, ᐃᑲᔪᕐᓂᖃᓚᐅᕐᒪᑦ ᑐᑭᓯᑲᓐᓂᕋᓱᐊᖃᑎᒌᑦᑎᓪᓗᒋᑦ ᒥᑦᓵᓄᑦ ᕗᕋᐃᖕᓕᓐ ᐊᐅᓚᖅᓂᖓᑦ.

ᐅᓪᓗᒥ, ᒥᓂᔅᑕ ᐊᕙᑎᓕᕆᔩᑦ ᓯᓚᐅᓪᓗ ᐊᓯᔾᔨᐸᓪᓕᐊᔪᓕᕆᔨᖏᓐᓄᑦ ᒥᓂᔅᑕ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᔮᓇᑕᓐ ᐅᐃᓪᑭᓐᓯᓐ, ᐊᒻᒪᓗ ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᖏᑦ, ᑐᓴᖅᑎᑦᓯᖅᑲᐅᒻᒪᑕ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᓯᔾᔩᓚᐅᐱᓪᓚᓐᓂᐊᕐᒪᑕ ᖃᐅᔨᓴᖅᑕᐅᓂᖏᓐᓄᑦ ᐅᒦᔭᕈᑕᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᓯᕗᒧᐊᑉᐸᓪᓕᐊᖁᓪᓗᒍ ᐅᖃᖃᑎᖃᕐᓂᐅᔪᖅ ᐃᓄᓐᓂᑦ ᐱᔾᔪᑎᒋᓪᓗᒋᑦ ᐊᒥᓱᑦ ᐃᑦᑕᕐᓂᓴᐃᑦ ᐱᔭᐅᓚᐅᖅᑐᑦ 2019−ᖑᑎᓪᓗᒍ ᖃᐅᔨᓇᓱᐊᕐᓂᖃᖅᑎᓪᓗᒋᑦ.

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᒪᓕᒻᒪᑕ ᐅᖃᐅᔾᔨᒋᐊᕈᑎᖏᓐᓂᑦ ᐋᓐᓂᐊᖃᕐᓇᖏᑦᑐᓕᕆᔩᑦ ᖃᐅᔨᒪᔨᑕᖏᓐᓂᑦ ᓱᓕᓗ ᑕᒪᑐᒥᖓ ᓯᐊᒻᒪᑦᑕᐃᓕᑎᑦᓯᓇᓱᐊᖃᑕᐅᖏᓐᓇᕐᓂᐊᕐᒪᑕ ᓄᕙᓐᓇᐅᔪᒥᑦ (ᓄᕙᓐᓇᕐᔪᐊᒥᑦ 19), ᓄᓇᕗᑦ ᐃᓄᖏᓪᓗ ᐅᓗᕆᐊᓇᖅᑐᒦᖁᓇᖏᑦ. ᑕᐃᒪᐃᒻᒪᑦ, ᐱᓕᕆᐊᖑᓂᖏᑦ ᐅᒦᔭᕈᑎᒥᓃᒃ ᓄᖅᑲᖅᑎᑕᐅᒋᐊᖃᕐᒪᑦ ᐊᐅᓚᓂᐅᔪᒥ 2020−ᒥ, ᖃᓂᒌᓗᐊᕐᓗᑎᒃ ᐱᓕᕆᒌᒋᐊᖃᓚᖓᓚᐅᕐᒪᑕ ᑎᑭᑲᐃᓐᓇᐸᑦᑐᑦ ᓄᓇᖃᖅᑐᓪᓗ ᐱᓗᐊᖅᑐᒥᑦ ᐱᑐᐃᓐᓇᐅᖏᑦᑐᒦᑎᓪᓗᒋᑦ ᐅᑭᐅᖅᑕᖅᑐᒦᑦᑐᑦ ᓄᓇᓖᑦ, ᐅᓗᕆᐊᓇᕐᓂᖓ ᐊᑦᑕᓇᓗᐊᕐᒪᑦ ᐊᐃᑦᑐᐃᒍᑕᐅᓇᔭᕐᓂᖅᐸᑦ ᓄᕙᓐᓂᕐᔪᐊᖅ 19.

ᐅᓇ ᐃᓱᒪᓕᐊᖑᔪᖅ ᐱᓯᒪᔪᖅ ᐅᖃᐅᔾᔨᒋᐊᕈᑎᖏᓐᓂᑦ ᑲᑐᔾᔨᓪᓗᑎᒃ ᐃᓄᐃᑦ /ᒐᕙᒪᒃᑯᑦ ᒥᕐᖑᐃᓯᕐᕕᒻᒧᒃ ᐸᕐᓇᐃᔩᑦ ᐊᐅᓚᑦᑎᔩᓪᓗ ᑲᑎᒪᔨᕋᓛᖏᑕ ᐊᑐᓕᖁᔨᒍᑎᖏᓐᓂᑦ ᑐᕌᖓᓪᓗᓂ ᑕᒪᐃᓐᓄᑦ ᓄᓇᕗᒻᒥ ᑲᓇᑕᒥ ᒥᕐᖑᐃᓯᕐᕕᓕᕆᔨᑦ, ᑕᒪᓐᓇᓗ ᐱᓗᐊᖅᑐᒥᑦ ᓈᒻᒪᓈᖃᑎᖃᖅᓯᒪᓪᓗᓂ ᓄᓇᕗᒻᒥ ᒥᕐᖑᐃᓯᕐᕖᑦ ᐅᐸᒐᐃᓪᓗ ᒪᑐᓯᒪᔪᑦ ᐳᓚᕋᑦᑎᓄᑦ ᐊᒻᒪᓗ ᐱᓕᕆᒻᒪᕆᒋᐊᑐᓐᖏᑦᑐᓄᑦ ᑎᑭᒐᓱᐊᕐᓂᖓᓂ ᐊᐅᒡᒍᓯ 31, 2020, ᐱᓐᖏᑕᑐᐊᕆᓪᓗᒋᑦ ᐃᓄᐃᑦ ᐱᔪᓐᓇᐅᑎᒥᓂᑦ ᐊᑐᖅᑐᑦ ᒪᓕᓪᓗᒍ ᐃᓗᐊᓃᑦᑐᖅ ᓄᓇᕗᑦ ᐊᖏᕈᑎᖓᑕ. ᐅᓯᑲᑦᑕᐅᑏᑦ ᐅᓯᒍᓐᓇᖅᑐᑦ ᐅᖓᑖᓄᑦ 12ᓂᑦ ᐃᓄᓐᓂᑦ ᓱᓕ ᐃᓯᕈᓐᓇᖅᑎᑕᐅᓐᖏᑦᑐᑦ ᐅᑭᖅᑕᖅᑑᑉ ᓯᓈᖏᑕ ᐃᒪᖏᓐᓄᑦ (ᐱᖃᑕᐅᑎᑕᐅᓪᓗᑎᒃ ᓄᓇᑦᓯᐊᕗᑦ, ᓄᓇᕕᒃ ᐊᒻᒪᓗ ᓛᐸᑐᐊᑉ ᓯᓂᖏᑦ) ᑎᑭᓪᓗᒍ ᐆᑦᑑᕙ 31, 2020.

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᖃᐅᔨᓴᖅᑎᑦᓯᓂᖃᔾᔮᓐᖏᒃᑲᓗᐊᖅᑎᓪᓗᒋᑦ ᐃᑦᑕᕐᓂᓴᓕᕆᓂᐅᑉ ᐃᓗᐊᓂ ᐅᒦᔭᕈᑕᕕᓂᕐᓂ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᓗᐊᓂ 2020, ᑖᓐᓇ ᑭᒡᒐᖅᑐᐃᕕᒃ ᓯᕗᒧᐊᑉᐸᓪᓕᐊᑎᑦᓯᓚᖓᔪᖅ ᐅᖃᖃᑎᒋᕙᓪᓗᒋᑦ ᐃᓄᐃᑦ ᐱᓪᓗᒋᑦ ᐸᕐᓇᒍᑕᐅᔪᑦ 2021ᒧᑦ ᖃᐅᔨᓴᕈᑕᐅᒍᒪᔪᑦ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᒪᐅᑉ ᐃᖅ`ᑳᓂ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᖃᑎᒌᑦ ᓯᕗᒧᐊᑉᐸᓪᓕᐊᒍᓐᓇᖅᓯᖁᓪᓗᒋᑦ 2020ᒥᑦ ᐱᖃᑕᐅᓗᑎᒃ ᐊᓯᖏᑦ ᐱᓕᕆᐊᑦ ᐃᓗᐊᓂ ᐅᒥᐊᖅ ᑕᐃᕕᑎ ᑖᒻᓴᓐ - ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓄᑖᖑᓂᖅᐹᖅ ᖃᐅᔨᓴᕐᑎᖏᑕ ᐅᒥᐊᖓ. ᐱᓕᕆᐊᖑᒍᓐᓇᖅᓯᑐᐃᓐᓇᕆᐊᓖᑦ ᖃᓪᓗᓈᓂ ᑲᓇᑕᐅᑉ ᐃᓗᐊᓂ ᐱᖃᓯᐅᔾᔭᐅᑐᐃᓐᓇᕆᐊᖃᕐᓂᐊᖅᓱᑎᒃ ᐃᑲᔪᖅᑐᐃᔪᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᑦᑕᕐᓂᓴᓕᕆᔨᖏᓐᓂᑦ, ᓯᓚᐅᑉ ᐊᓯᔾᔨᐸᓪᓕᐊᓂᖓᓂᑦ ᐊᒻᒪᓗ ᐆᒪᔪᐃᑦ ᖃᐅᔨᓴᖅᑕᐅᓂᖏᓐᓂᑦ, ᓄᑖᓪᓗ ᓴᐳᑎᔭᐅᔪᑦ ᓄᓇᐃᑦ ᒥᐊᓂᕆᔭᐅᔪᑦ ᐃᓴᒻᒥᔭᐅᒍᒪᔪᓪᓗ ᐃᓱᒪᒋᔭᐅᓂᖏᑦ.

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᒥᖅᑳᖃᑎᖃᕈᓐᓇᖅᑐᑦ ᑐᑭᓯᒋᐊᕈᑕᐅᒍᓐᓇᖅᑐᓂᑦ ᑖᒃᑯᐊ ᐱᓕᕆᐊᑦ ᒥᑦᓵᓄᑦ ᐃᓗᓕᖏᑦ ᓇᓗᓇᐃᖅᑕᐅᓚᐅᖅᑎᓪᓗᒋᑦ.

ᐅᖃᖅᑕᐅᓯᒪᔪᑦ

“ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᑐᕆᐊᓕᒻᒥᑦ ᖃᓄᐃᒋᐊᕈᑎᖃᕐᒪᑕ ᐱᔾᔪᑎᒋᓪᓗᒍ ᓯᐊᒻᒪᑎᑦᓯᑕᐃᓕᖃᑕᐅᒋᐊᖃᕐᓂᕐᒥᑦ ᓄᕙᓐᓇᐅᔪᒥᑦ (ᓄᕙᓐᓇᕐᔪᐊ 19) ᐊᒻᒪᓗ ᓴᐳᒻᒥᔭᐅᖏᐊᖃᕐᓂᖓᓂᑦ ᓄᓇᕗᑦ ᓄᓇᓕᖏᓪᓗ. 2019ᒥ ᖃᐅᔨᓴᕐᓂᖅ ᐊᔾᔨᐅᓚᐅᓐᖏᒻᒪᑦ ᐊᕐᕌᒍᖓ ᐃᑦᑕᕐᓂᓴᐃᑦ ᖃᐅᔨᓴᖅᑕᐅᑎᓪᓗᒋᑦ ᐅᑯᐊ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᑲᑐᔾᔨᖃᑎᒋᓗᒋᑦ ᐃᓄᐃᑦ, ᓱᓕ ᐱᓇᓱᐊᓚᖓᒻᒪᑕ ᐱᓕᕆᐊᖑᓯᒪᔪᑦ ᑲᔪᓰᓐᓇᖁᓪᓗᒋᑦ ᖃᐅᔨᔭᐅᓇᓱᐊᕐᓗᑎᓪᓗ ᐱᖁᑎᑐᖃᐃᑦ ᐱᔭᐅᓚᐅᖅᑐᑦ ᑕᒡᕙᓐᖓᑦ ᑯᐄᓐ ᐅᒥᐅᖁᑖᓂᑦ ᐃᕆᐸᔅ ᐊᒻᒪᓗ ᑕᒪᒃᑮᓐᓂᑦ ᐅᒦᔭᕐᓂᑯᒥᓃᓐᓂᖏᓛᒃ. ᑲᑐᔾᔨᓗᑕ, ᓂᕆᐅᑦᓯᐊᖅᐳᒍᑦ ᖃᐅᔨᑎᑦᓯᓛᕈᒪᕗᒍᓪᓗ ᐱᒻᒪᕆᔪᓂᑦ ᓴᖅᑭᖅᑐᓂᑦ ᑖᒃᑯᓇᓐᖓᑦ ᐱᔪᓂᑦ.”

ᓂᖅᑐᕐᓇᖅᑐᖅ ᔮᓇᑕᓐ ᐅᐃᓪᑭᓐᓴᓐ,
ᒥᓂᔅᑕ ᐊᕙᑎᓕᕆᔩᑦ ᓯᓚᐅᓪᓗ ᐊᓯᔾᔨᐸᓪᓕᐊᓂᖓᓐᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᒥᕐᖑᐃᓯᕐᕕᓐᓂᑦ ᑲᓇᑕᒥ

“ᓱᓕ ᖁᓱᓪᓘᒥᓇᖅ˙ᑑᒐᓗᐊᖅ ᐱᓕᕆᐊᖑᔪᑦ ᑲᔪᓯᔾᔮᓐᖏᒻᒪᑕ ᑕᕙᓂ ᐊᕐᕌᒍᒥ ᑲᔪᓯᑦᓯᐊᓚᐅᖅᑎᓪᓗᒋᑦ ᐱᓕᕆᓂᐅᓚᐅᖅᑐᑦ 2019ᒥ ᑖᒃᑯᐊ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ, ᑖᒃᑯᐊ ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᖏᑦ ᐃᑲᔪᖅᑐᐃᒻᒪᑕ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᓱᒪᓕᐊᖏᓐᓂᑦ ᑭᓪᓕᖃᖅᑎᑕᐅᑲᐃᓐᓇᑎᓪᓗᒋᑦ ᐱᓕᕆᐊᖑᔪᓐᓇᖅᑐᑦ ᓄᓇᕗᒻᒥ ᐊᒡᒋᖅᑐᓂ ᐱᓕᕆᕕᑦᓴᐅᑲᐃᓐᓇᕐᓂᖓᓂ, ᐱᑲᑕᐅᓗᑎᒃ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ. ᐱᒻᒪᕆᐅᒻᒪᑦ ᑕᒻᒪᓐᓇ, ᐃᓄᓐᓄᑦ ᐊᒻᒪᓗ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᖃᐅᔨᑎᑦᓯᖏᐊᖃᕐᓂᖏᑦ ᖃᐅᔨᔭᐅᔪᓂᑦ ᑐᑭᓯᔭᐅᔪᓂᓪᓗ ᐱᓯᒪᔪᓂᑦ ᑖᒃᑯᓇᓐᖓᑦ ᕗᕋᐃᖕᓕᓐ ᐅᒥᐊᕐᔪᐊᖏᑦ, ᓴᐳᑎᔭᐅᑦᓯᐊᖁᓪᓗᖏᑦ ᓄᓇᓕᐅᔪᑦ ᐅᓗᕆᐊᓇᖅᑐᒨᖅᑎᑕᐅᖁᓇᒋᓪᓗ ᑭᒃᑯᑐᐃᓐᓇᐃᑦ ᑎᑭᑕᐅᓐᓂᖅᑲᑕ ᓄᕙᓐᓇᕐᔪᐊᖅ 19ᒧᑦ ᒫᓐᓇ ᐱᓗᐊᖅᑐᒥᑦ ᐅᓗᕆᐊᓇᖅᑐᖃᑐᐃᓐᓇᕆᐊᖃᖅᑎᓪᓗᒍ.”

ᕗᕆᑦ ᐱᑐᓯᓐ,
ᐃᒃᓯᕙᐅᑕᖅ, ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᑦ

ᖃᐅᔨᑲᐅᑎᒋᒍᑏᑦ ᐊᑐᓪᓚᑖᖅᓯᒪᔪᓂᑦ

  • ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ ᓯᕗᓪᓕᐸᐅᕗᖅ ᑲᑐᔾᔨᓂᒃᑯᑦ ᐊᐅᓚᑕᐅᓪᓗᓂ ᑲᓇᑕᒥ ᐃᑦᑕᕐᓂᓴᖃᕐᕖᑦ ᐃᓗᐊᓂ ᓄᓇᕘᒥ. ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᓚᒋᓕᐅᔾᔭᐅᓚᐅᖅᑐᖅ ᑖᑦᓱᒧᖓ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ 2017-ᖑᑎᓪᓗᒍ, ᒪᓕᒐᖅᑎᒍᑦ ᓴᐳᑎᔭᐅᒍᓐᓇᖅᓯᖁᓪᓗᒍ ᐅᒦᔭᕐᕕᒥᓂᐅᑉ ᓇᓛ ᐊᑖᓂ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐱᖁᔭᕐᔪᐊᖓᓄᑦ. ᐅᒦᔭᕈᑕᐅᔪᕕᓂᖅ ᑯᐄᓐ ᐅᒥᐅᖁᑖ ᐃᕆᐸᔅ ᐃᓚᓕᐅᑎᔭᐅᓚᐅᖅᑐᖅ ᐃᑦᑕᕐᓂᓴᖃᕐᕖᑦ ᑲᓇᑕᒥ ᑎᓕᓯᓂᖓᒍᑦ 2015ᒥᑦ.
  • ᓴᖅᑭᖅᑕᐅᔪᑦ 2016ᒥᑦ, ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᑲᐃᓐᓇᖅᑕᖏᑦ, ᐃᓚᖃᖅᑐᑎᒃ ᓄᓇᓕᓐᓃᓐᖔᖅᑐᓂᑦ ᑭᒡᒐᖅᑐᐃᔪᓐᓇᖅᑐᓂᓪᓗ ᐱᓯᒪᔪᓂᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᐃᓄᐃᑦ ᐱᖁᑎᖏᓐᓂᑦ ᓇᐅᑦᓯᖅᑐᖅᑏᑦ, ᓄᓇᕗᑦ ᒐᕙᒪᖓ ᐊᒻᒪᓗ ᓇᐅᑦᓯᑐᖅᑏᑦ ᐳᓚᕋᑦᑐᓕᕆᔩᓪᓗ, ᐅᖃᐅᔾᔨᒋᐊᓚᐅᕐᒪᑕ ᐊᐅᓚᑕᐅᖁᓪᓗᖏᑦ ᐅᒦᔭᕐᓂᑯᐃᑦ ᐃᓂᓪᓚᑦᑐᖃᓚᐅᓐᖏᓐᓂᖓᓂ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑏᑦ ᐋᖅᑭᑦᑕᐅᓚᐅᓐᖏᓐᓂᖏᓐᓂ ᐊᑯᓐᓂᖏᓐᓂ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ.
  • ᑕᐃᒪᓐᖓᑦ 2017ᒥ, ᐸᐸᑦᓯᔩᑦ ᐊᐅᓚᓂᖃᖅᓯᒪᓕᖅᑐᖅ ᐱᓕᕆᐊᖃᖅᑐᑎᒃ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᐃᑦᑕᕐᓂᓴᖃᕖᑦ ᑲᓇᑕᒥ, ᐱᓕᕆᖃᑕᐅᓪᓗᑎᒃ ᐃᓄᐃᑦ ᐅᖅᓱᕐᑑᒥᐅᑦ ᑲᑐᔾᔨᓂᒃᑯᑦ ᒥᐊᓂᖅᓯᔪᑦ ᓴᐳᒻᒥᔭᐅᖁᓪᓗᒋᑦ ᖃᐅᔨᓴᖅᑕᐅᖁᓪᓗᒋᓪᓗ ᕗᕋᐃᖕᓕᓐ ᐅᒦᔭᕈᑎᕕᓂᖏᒃ ᑕᒪᓐᓇᓗ ᐃᑲᔪᖅᓯᔭᐅᓪᓗᓂ ᐃᓄᐃᑦ ᖃᐅᔨᒪᔭᖏᑦ ᐊᑐᕐᑕᐅᓪᓗᑎᒃ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᓚᑕᐅᒍᓐᓇᖁᓪᓗᒍ ᒥᐊᓂᕆᔭᐅᓗᓂᓗ ᐃᑦᑕᕐᓂᓴᖃᕐᕖᑦ ᑲᓇᑕᒥ.
  • ᑕᐃᒪᓐᖓᑦ 2018ᒥ, ᑕᒪᕐᒥᑦ ᓄᑖᑦ ᓇᓂᔭᐅᔪᑦ ᐃᑦᑕᕐᓂᓴᐃᑦ ᐱᓯᒪᔪᑦ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐊᖁᑖ ᑎᐅᕐᕈᕐ ᑲᑐᔾᔨᓂᒃᑯᑦ ᓇᓐᒥᓂᕆᔭᐅᒻᒪᑎᒃ ᒐᕙᒪᒃᑯᖏᓐᓄᑦ ᑲᓇᑕᒥ ᐃᓄᓐᓄᓪᓗ. ᐊᐃᑉᐳᓘ 2019ᒥ, ᒐᕙᒪᑦ ᑲᓇᑕᒥ ᐊᒻᒪᓗ ᐃᓄᐃᑦ ᐱᖁᑎᖏᓐᓂᑦ ᓇᐅᑦᓯᑐᖅᑏᑦ ᐊᑎᓕᐅᖃᑎᒌᓚᐅᕐᒪᑕ ᑐᑭᓯᐅᒪᖃᑎᒌᓐᓂᒃᑯᑦ ᐊᖏᖃᑎᒌᒍᑎᒥᑦ ᐃᓗᓕᖏᓪᓗ ᓇᓗᓇᐃᔭᖅᓯᒪᓪᓗᑎᒃ ᖃᓄᖅ ᑖᒃᑯᐊ ᑎᒥᐅᔫᒃ ᐱᓕᕆᖃᑎᒌᓐᓂᐊᕐᒪᖔᑎᒃ ᓴᐳᑎᔭᐅᖁᓪᓗᒋᑦ, ᖃᐅᔨᓴᖅᑕᐅᓂᖏᑦ, ᒥᐊᓂᕆᔭᐅᓂᖏᑦ ᐊᒻᒪᓗ ᐊᒥᖅᑳᖅᑕᐅᓂᐊᕐᒪᖔᑕ ᕗᕋᐃᖕᓕᓐ ᐃᑦᑕᕐᓂᓴᖏᑦ.
  • ᐊᐅᒡᒍᓯ 2019ᒥ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑕᑯᑦᓴᕈᖅᑎᑦᓯᓚᐅᕐᒪᑕ ᐊᔾᔨᐅᓐᖏᓪᓚᕆᑦᑐᒥᑦ, ᑕᑯᔭᐅᓚᐅᖅᓯᒪᓐᖏᑦᑐᓂᑦ ᖃᖓᓕᒫᖅ, ᐊᔾᔨᓕᐅᖅᓯᒪᔪᓂᑦ ᐊᐅᓚᔫᓕᐅᕈᒻᒧᑦ ᑕᑯᑦᓴᐅᔪᓐᓇᖅᑐᑦ ᐅᓇ ᓇᕿᓪᓗᒍ video footage ᑯᐄᓐ ᐅᒥᐊᖁᑖ ᑎᐅᕐᕈᔅ ᒥᑦᓵᓄᑦ ᐃᓚᒋᔭᐅᒻᒪᑦ ᑖᓐᓇ ᐊᖏᓂᖅᐸᐅᖃᑕᐅᓪᓗᓂ, ᐱᑐᐃᓐᓇᐅᖏᓐᓂᖅᐹᖑᓪᓗᓂᓗ ᐃᒪᐅᑉ ᐃᖅᑳᓂ ᐃᑦᑕᕐᓂᓴᐅᓪᓗᓂ ᐱᓕᕆᐊᖑᓂᖓ ᑲᓇᑕᒥ ᐊᑐᖅᓯᒪᔪᓕᒫᓂ. ᐱᓕᕆᐊᖑᓂᖓ ᓯᕗᓪᓕᖅᐹᖑᒻᒪᑦ ᖃᐅᔨᔭᐅᔪᑦ ᑕᑯᑦᓴᕈᖅᑎᑕᐅᓂᖏᑦ ᐅᒥᐊᕐᔪᐊᒥᓂᐅᑉ ᐃᓗᐊ ᖃᓄᐃᑦᑑᒻᒪᖔᑦ ᑯᐃᓐ ᐅᒥᐊᖁᑖ ᑎᐅᕐᕈᕐ, ᒥᕐᖑᐃᓯᕐᕕᓕᕆᔨᕖᑦ ᑲᓇᑕᒥ ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᓕᕆᔨᑦ ᐱᓕᕆᖃᑎᒌᑦ, ᐱᓕᕆᖃᑎᖃᖅᑐᑎᑦ, ᐃᓄᐃᑦ ᓇᓂᓯᓯᒪᓕᖅᑐᑦ 350 ᐅᖓᑖᓂᑦ ᐃᑦᑕᕐᓂᓴᕐᓂᑦ ᑕᕙᓐᖓᑦ ᑯᐃᓐ ᐅᒥᐅᖁᑖ ᐃᕆᐸᔅ.

ᐊᑦᑐᐊᓂᖏᑦ ᑎᑎᕋᖅᑕᐅᔪᑦ

  • ᐃᓄᑦᑎᑑᖅᑐᑦ - ᓄᑖᑦ ᑐᓴᕋᑦᓴᓕᐊᖑᔪᑦ

ᐊᑦᑐᐊᔪᑦ ᑕᒪᑐᒧᖓ ᑐᑭᓯᒋᐊᕐᕕᑦᓴᐃᑦ

  • ᓄᕙᔾᔪᐊᕐᓇᖅ 19 ᐊᒻᒪᓗ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ Places
  • ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ
  • ᐅᒥᐊᖅ ᑕᐃᕕᑎ ᑖᒻᓴᓐ - ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᖃᐅᔨᓴᕐᑎᖏᑕ ᐅᒥᐊᖓ.
  • @ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᑦᑕᕐᓂᓴᓕᕆᔩᑦ

ᖃᐅᔨᒋᐊᕐᕕᐅᔪᓐᓇᖅᑐᑦ

ᑐᓴᕋᑦᓴᓂᑦ ᐱᓕᕆᔩᑦ
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ
855-862-1812
pc.medias-media.pc@canada.ca